一如以往要多謝大家支持，因為無大家個故真係寫唔到落去
最近說左個朋友開始上網出故，我是咁講的。
「出故同自己寫文有咩分別呢，就係有人同你互動，會有回應，反映，除左自己愈寫愈好之外仲會好開心，雖然有責任有壓力，但係如果你真係鐘意寫故既，一定會落在其中。」
呢個故一開始既念頭其實就係打機其中一個角色係基督山伯爵，無意抽到佢後覺得佢好型，於是走左去睇小說，睇完後我就覺得…神作啊啊啊啊？！大仲馬好屈機！！
當然，身為同樣寫故既人，原著中一Ｄ鋪排我自己覺得可以寫得更好，因為寫文就係咁，就算寫到大仲馬，雨果，金庸既神級水平，其實都唔會完全岩自己口味，於是我開始諗嗯嗯嗯嗯，呢度咁寫會自然Ｄ，呢度應該描述多Ｄ，呢度應該寫少Ｄ咁…漸漸地，一個屬於我既基督山恩仇記就出現腦海中。
諗起當年我睇ＢＢＣ版既福爾摩斯，其實就係將１８世紀既福爾摩斯故事放到現代，華生由寫書變寫ＢＬＯＧ（雖說我就覺得現代應該少人寫ＢＬＯＧ…），福爾摩斯ＳＥＮＤ短訊之類，結合之前既構想，獅子山恩仇記從此誕生。
開故日期係５個月前，即係４月，轉緊工既我有種重獲新生既感覺，有睇上個故既讀者就知我係ＯＴ到幾乎要斷文咁濟，個時為左唔短，每晚ＯＴ完再手機寫文，真係有種會爆肝既感覺，呢個故我係係相當輕鬆既情況下寫出黎，因為結構完整，寫既時候都無咩點卡關，唔知你睇唔睇得出。
相比起之前兩大系列既「末日系列」同「職業魔法師」，獅子山恩仇記既格局係私人好多，並無咩正邪對立，理想對撼之類，每個人都係只為自己既目標而行動，可以話係一個非常「私利」既故事，但亦因為角色行動只因為自己，可以睇到每個角色發展同成長非常完整，由自己「想要某事」變成察覺自己「需要某物」，寫左兩大系列幾年後算係新嘗試，我自己就滿意既。
最後係鬥智部分，曾經我話過寫鬥智故超傷腦，自己行街搭車都諗緊點樣扭橋扭橋再扭橋，但係今次又打倒昨天的我寫返
點解呢？其實就係因為復仇黎講一係就動武，一係就鬥智，而且原著中既基督山伯爵都係智取佢既仇人，所以呢個故既鬥智定位由一開始定下左，希望扭橋鬥智既橋段滿足到大家，連載期間睇到大家都好投入，好享受，身為作者已經好開心了。我話過，兩大系列未完之前我絕對唔會開第三個系列，所以獅子山伯爵同亞娜既故事暫時到呢度為止，佢地既最後去往係故事尾聲已經有所提及，係菁婷處理緊既事，而係亞娜同佢細佬曾經既夢想，呢度無寫明就留返俾大家自己發掘了。
只不過長期睇既巴打，特別係由第一個「分手師」開始追既巴打可能會發現，係靈隱寺一戰中有個拎住啤酒既怪和尚，有個識好多人既阿強幫過泰思，有叫叫DeepWorld既概念…可以諗下未來會有咩發展，但係鄧泰思同亞娜既旅程真係告一段落。
最後有巴打話想一次性支持下我，我就係度放Payme QR Code出黎，如果你覺得我睇完呢篇故想支持下我既可以按自己意願一次性打賞，有興趣睇埋其他副連載同呢個故既ＩＦ線可以訂閱patreon，我會搵下patreon有冇得ＳＥＴ一次過課金，我都係新手唔太識用
多謝你地陪左我同泰思亞娜佢地咁耐，下一個故會係魔幻故，同樣地唔使睇前作都會睇得明，希望到時都見到大家，我係陳立正，祝大家中秋節快樂！！
幾時出新故？
多謝樓主同埋亞娜bb豬陪我地行咗咁耐
辛苦晒勞動模範樓主
