偶然與想像

覺得第二篇好多隱喻未明晒
一開頭「比人距離感」既說法 除咗指女主同教授為人處事 再link返去教授話唔好比社會掩蓋自己既價值之外 有冇其他意思？
除咗想探討公共空間同私密空間探「性」之外
「門常開」係咪只係一種自我安慰既澄清？

唔太記得細節 你有重睇過？

> 俾人距離感
係女主對SP講 然後都有同教授講？

教授門常開
我無留意清楚 劇一開始跪既人 係咪後來上電視既學生？
求情既人 就係SP？
定係 跪嗰個係SP？

教授鬧人時開門 有人要求 基於社會禮儀 應該關門 但教授堅持開門
初時 我第一下感覺係：
個教授係想透過公開嗰個狀況 去展現自己地位 從而得到權力同虐人既快感？
後來見劇情發展 似乎唔係

女主同樣 似乎基於社會禮儀 想要關門
事後教授都話 自己有性快感
但女主想要關門時 教授依然堅持開門
無為自己既性快感 去關門 去令自己可以有私人空間更安心地享受快感

教授事後都唔明女主心態
只係覺得女主奇怪
其實 教授會唔會有d自閉症 唔能夠正常咁體會一般人既心思？

有無人明樓主噏緊乜？

電影中既第一個故事。
女主角同男主角喺男主角公司吵架。
女主角話，如果自己唔鬧醒男主角，男主角唔知自己之前錯既地方係咩，咁就算男主角同女二成功一齊拍拖，男主角都係會重新再犯，再犯同女主角一齊時所犯既錯誤。
女主角覺得男主角所犯嗰個錯誤係咩問題？

我琴日先睇完嚟 我覺得第二套係講人嘅價值

打開門 唔係要行出自己嘅房間
而係等出面嘅人睇到 聽到自己做緊乜
再吸引相類似嘅人入嚟
就好似靚媽因為中意教授而行咗入嚟

我同意send email係象徵緊唔夠打開門
而send錯email 就好似偶然打開咗道門 公開晒
出面嘅人睇到聽到晒成件事
寓意緊 門常開 都有壞處
就係一旦社會唔接受你 你就係咁先

另一樣野點解我覺得套戲係講 人嘅價值觀
係因為教授同靚媽對話嘅事候 靚媽喊咗出嚟
靚媽一直唔受人認同 佢都只係覺得只係 情慾強 依個特徵
佢搵唔到自己嘅價值
直至教授讚佢 把聲好聽
靚媽第一次俾人認同
但因為「門常開」 極速柒咗鑊
去到最後巴士強吻SP 我覺得除咗報復依個咁明顯嘅動機
我覺得係個SP提醒番佢 情慾強 就係佢嘅價值所在

利申：最近一兩個月先認真用腦用心睇戲 依套戲我自己去睇 睇完最黃金個半個鐘只可以同自己討論

1
聽你既解讀 感覺你好善良

2

最近一兩個月先認真用腦用心睇戲

我算少睇戲
但如果 譬如遇到多d你咁樣 會認真解讀劇情既人仔 好似 令睇戲呢樣野吸引好多
支持認真用腦用心睇！

3

打開門 唔係要行出自己嘅房間
而係等出面嘅人睇到 聽到自己做緊乜
再吸引相類似嘅人入嚟
就好似靚媽因為中意教授而行咗入嚟

呢點對我有啟發
我自己無諗到 教授其實都會寂寞 佢都期待被了解被愛
我剩係睇到教授表面既堅強 你就睇到教授有既 溫柔既脆弱

4

去到最後巴士強吻SP 我覺得除咗報復依個咁明顯嘅動機
我覺得係個SP提醒番佢 情慾強 就係佢嘅價值所在

你話強吻係一種報復 呢點我覺得 表現到你既純潔
另外 後句 你睇到既 係SP提醒返靚媽價值 係人類正面既關係 都有趣

對呢個畫面 我偏向理解為：
靚媽一開始對SP係反感
靚媽聽到SP可以結婚 更加妒忌而反感
但又正正 聽到呢個消息 又勾起佢既惡意同情欲：
嗰種 佢地本來之前所身處既 婚外情 偷情 背叛
特別係呢種禁忌中惡意既快感

如果靚媽對SP係想報復 唔係個吻本身係報復
而係 靚媽想勾引將會結婚既SP出軌 令佢愧對正室 陷入不道德
呢個更係靚媽想做既報復手段

由之前同教授既事發 去到遇SP既時間
靚媽都內疚 痛苦 裝作一個有德之人

但到重遇SP 而聽到佢要結婚既時候 靚媽充滿能量而激情地強吻SP嗰下
佢又終於做返自己：
好難話嗰種 追求情欲或越軌 係絕對既錯
但至少 肯定係主流社會不容

5

另一樣野點解我覺得套戲係講 人嘅價值觀

比起直接講人既價值觀同價值
我更偏向會描述為
套戲係講 社會主流價值觀 對個人獨特性既壓迫

靚媽一開始 唔只係唔受外人認同 基至佢自己都內化社會主流既眼光
自己都唔認可自己既價值 而用社會主流既標準 去評價自己既價值

然後教授 解放靚媽既眼界
然後事發 靚媽既眼界又被內疚遮蔽
最後 聽到SP要結婚 而本能地產生一種引人越軌既欲望 佢又解放返自己既眼界

就似要描述 人類逃避唔開 社會主流 同 個人價值 兩者既交戰
一方有時勝 但之後一定有敗陣 又贏 又敗陣 不斷來回既狀態

印象中女主角批評男主角以前唔敢面對女主角，然後攬住男主角，問佢有冇勇氣去相信不確定嘅事

愛一個人唔容易。唔知對方係咪真心，唔知能否一生一世，有時更加唔知自己係咪鐘意對方。愛情除左好似魔法咁，仲係充滿不確定性，所以令到男主角唔願意交出真心同女主角相處（男主角同女主好友講過自己從未與前女友坦誠相對）
呢個都呼應標題magic (or something less assuring)

答得好完美

我#31個問題 主要問#30

好奇 如果明白故事細節既人 係咪就會 比較明白我之前扮角色既自白？
譬如 #5係扮故事一女主既心底話

好奇#30 係咪本身都未必答到#31既問題 所以先唔明白我扮d角色？

不過都只係好奇

好少人會用#5嘅表達方式去討論劇情
我覺得最難明係#5.4，唔明點解會諗到自己係神，思路有啲跳躍

另外，我所理解嘅女主角，係唔會講出#5.3嘅說話
女主角其實關心自己多過關心人地，佢唔知自己係咪鐘意男主角，但因為佔有慾而想同男主角復合。佢唔會由男主角嘅角度去諗邊個結局更好

女主角同好友講出真相後超級後悔，所以去想像如果冇講真話嘅結果。嗰刻女主角冇可能認為講出真相反而係好結局

仲有，就算男主跑去追女二，都唔代表對女主角冇留戀，可能佢日後都會掛住女主，就好似第三篇嘅老公

樓主講到女主角攤牌可以令男主角學識愛，不過點解作出二選一就等於學識愛？

我覺得男主角到最後都唔知自己最愛係邊個。假如喺office冇俾人打斷左，佢同女主角應該會復合。假如三個人冇喺餐廳撞到，女主角可能仲有機會。
我覺得男主角跑去追女二係出於本能反應，就好似當初男主角都想出去追女主角，不過當時被下屬阻住。
我覺得「選擇」同「做決定」有時都幾偶然。換左另一個場合、另一個時機，所做嘅選擇同決定都可能唔同

1
真 睇到你解釋 就覺得你解得合理好多

2
不過都答返當初思路：

> #5.4，唔明點解會諗到自己係神，思路有啲跳躍

神係點樣？
當初諗既神
係無去諗自己利益 只係想 隨心地介入世界 想幫助下世界運行

我當初理解既女主角：
似上述既神 無咩具體立場
對男主角 無鍾意到 好想一定要得到
都無話唔鍾意到 完全唔想得到

得到同得唔到都唔太在意 只係想喺公司爭論中
隨住對話有既機遇 而即興發揮

女主角應該都有佔有欲
但我偏向覺得 種佔有欲未強烈或明確到 好想好想復合

如果話有最想既野 最想就係 喺同男主角對話期間 靜待對話既方向會點發展
無一個真正一定想要去既目的地

目的地可能係吻 可能係不歡而散 可能係男主角真係忍唔住暴力傷害自己

如果office俾人打斷有影響 我偏向覺得 最大既影響 係中斷左一個未知既結果
而唔係中斷左復合

3
> 女主角同好友講出真相後超級後悔，所以去想像如果冇講真話嘅結果。嗰刻女主角冇可能認為講出真相反而係好結局

可能我睇得唔夠仔細或有偏見
但對我嚟講 會覺得 漫無目的望天既嗰個女主角
係喺兩個可能性中 既共同結果

女主角都係carefree
Nothing care

4
我Click歪左負 其實想正 不過改唔返

我覺得女主角唔係carefree

女主角有好強嘅佔有慾，知道好友鐘意左前度就即刻去office，目的就係想同男主角復合。

女主角知道自己會傷害到好友，都依然要男主角當場做選擇。呢度就可以知道女主角真係好想同男主角一齊

攤牌之後，女主角同時冇左男主角同好友，覺得好傷心，後悔如果冇咁做就好，所以去想像另一個選擇

「望天既嗰個女主角 係喺兩個可能性中既共同結果」呢個睇法似乎有啲牽強。
我覺得望天只能發生喺女主角嘅想像入面。
女主角望天嘅表情係釋懷同睇開左。但真實世界入面佢失戀又冇左朋友，而且仲好後悔，佢真係可以瞬間就睇得開？

其實我見大多數人既理解

想像好似係前者（攤牌）多過係後者（因為結局影城市相 呼應返開頭拍攝 亦都係邏輯上接住女主角起咖啡室離開）

不過點講都好 套戲都無講明邊個係想像 任君解讀都ok既

我自己一睇 感覺係 兩個都係現實
係平行世界
當中既選擇 無必然性
就只取決於 女主既偶然既靈感

但處理完其他身外事 就會回歸必然
獨處時 身邊唔再有其他人時
就回歸 自己一個 作為真正既自己 嗰個就只得唯一既必然
就係望天望風景既佢

第一篇既的士內對話
我覺得有d 長

1
好depend on 點理解女主角
雖然我都覺自己牽強

女主角對男主角 係執著 定無所謂
女主角對佔有欲本身點睇 係自己可以有但他人唔可以有？
我覺得女主聲稱既出軌 就係反抗男主既佔有欲 同佔有欲當中既不信任

如果女主係佔有欲強既人 呢個前提下 對男主同朋友既失去 會長期痛苦

但如果女主本身佔有欲唔強
視一切只係遊戲
就似夜晚喺辦公室 同男主 漫無目的咁刺激男主擺佈男主 令佢一時嬲一時flirty一時軟弱一時溫柔
咁對男主同朋友既失去 就會 係有一時既痛
但好快 又回復正常看天

2
我對女主係佔有欲強 定對玩弄偶然更感興趣
我偏向覺得後者既理解較有趣

不過覺得 前者都好合理
而如果基於前者 就覺得你既理解同推斷都好好 好適合

1
我覺得營造得幾靚
女二對理想愛情既幻想
柏拉圖式愛情既詩意
女主對理想既輕輕取笑 同表達羡慕

我自己睇既時候 感覺到漫無目的
唔確定主要想講咩
剩係覺得 種經驗幾有趣：

睇戲 唔係睇演員將回憶演出嚟
而係 透過演員講白 只得文字 而其畫面 要觀眾腦補
呢點幾有趣
特別係 劇情後 男主女二既相遇畫面 好似後來地 有助之前劇情畫面既填補

2
因為幻想夠足 足得煩厭
後來女主搵男主既一twist 就張力夠大

個人幾享受 甚至覺得 如果前戲過長 都係必要既手段
透過對比 令其後劇情可以有真正快感

我自己傾向前者係現實，後者係想像，原因係鏡頭嘅運用
女主角攤牌之後，用手掩住臉，鏡頭隨即急速zoom向女主角，好似想窺探佢嘅腦海，想知佢諗緊咩，接下來嘅劇情，變成冇攤牌嘅發展，所以我覺得後者(包括望天)係想像

另外，第一篇嘅故事發展都對應番戲名—偶然與想像。
以偶然知道好友鐘意左ex作為故事開端，又以想像另一個選擇作為故事結尾

將兩個結局解讀為平行世界，我都覺得可以，不過好似解釋唔到導演點解要運用快速zoom近嘅鏡頭

我覺得你嘅解讀似乎只有偶然呢個元素(即係平行世界嘅出現係女主偶然既靈感etc)，但好似講唔到想像嘅要素。
觀眾見到有兩個平行世界，知道有唔同結果，但我睇唔到有咩野可以想像

睇完第一同第三個故事，令我覺得做人幾無奈。㨂左A之後後悔，又會想像㨂左B、C會點，想像中嘅世界好似永遠都比現實好。甚至乎好似無論做出咩選擇，結果都會後悔，就好似第一篇女主角後悔講左出口，第三篇女主角又後悔當初冇講出口，感覺上講唔講都會後悔

1
鏡頭運用 我自己唔識睇
不過覺得 聽完你講 再睇一次 應該唔同理解！

2
偶然 三段都明顯
想像 段三明顯
段二 就勉強喺男主既創作 同出事後既留白 同女主對SP既flirt既留白？

段一 如果唔計女二一開始對關係既想像
女主個交叉位係最match想像主題

女主掩面 我唔記得有無記錯
A：係可能一發生 掩面 放手 抬頭 可能二就接住發生？

前事 係正事發生前既預演 定
後事 係正事發生後 想像其他可能？

如果我無記錯A 咁會覺得 A呢個表達 係一種靚既對稱
我偏向覺得 理解為兩可能係一樣重 無辦法確定 係最靚既狀態

不過唔排除我係唔記得明確既細節

3
如果一切都無可避免要後悔
咁 同樣都可以 一切無可避免不後悔

譬如 你描述既女主 會傾向後悔？
我描述既女主 可能唔反映戲中想表達既女主
但可能做到既話 會偏向係一個 一切無可避免不後悔既人？

不過其一問題係 會唔會 嗰種人係正常人唔會想做？

關於想像呢個主題，我覺得第一篇係呈現人後悔嘅時候會不自覺想像另一個更好嘅結局

我估第二篇想講我地唔應該成日想像不切實際嘅事，反而應該把握現在
當教授講佢好想喺得獎前鼓勵女主角，隨即又講咁樣去想像係多餘，因為正正係出於教授得獎，兩個人先有對話嘅機會
經歷左sd錯email事件，女主角好後悔，我估佢成日都會想像如果冇sd錯email，如果當初冇錄音etc。不過呢啲想像無補於是，無法拯救女主角。女主角最後放棄想像，決定把握現在，去做番自己最鐘意嘅出軌，咁先可以move on。

第三篇就係講人可以主動利用想像去化解遺憾

去做番自己最鐘意嘅出軌，咁先可以move on。

呢句笑左
正經咁講啲社會不容既野 有種喜感

另 戲名同主題有想像二字 但你意思似話 故事二可能講 想像既壞處
即 偶然同想像 編導未必一定想正面歌頌 可以係批判
呢點幾有啟發
我自己無特別諗 編導有可能對兩者反感

反感同批判呢兩個字又誇張左啲

套戲只不過指出左當人後悔時，會不斷諗如果，而呢種想像好容易加深後悔感

導演利用第二篇同第三篇嘅故事，分別提出左兩個攞脫困局嘅出路

講起喜感，我見戲院有人有時睇睇下會笑，我好想知笑位喺邊

雖然呢套戲唔悶，但睇嘅時候投入唔到，講唔上好睇，但又講唔上唔好睇
如果以舞台劇嘅形式去呈現，效果會唔會好啲？反正套戲主要都係由對話支撐

如果我要總結三故中 編導既創作動機 偏向會歸納成
1 女主作為善用偶然既無心者 遊戲者 連當中既情緒同感受 都唔係為固態既利益
而只係善用偶然 去刺激自己或他人既情緒取樂

2 每人既自我理解 其實都只係誤解
接受過偶然既挑戰後 仍然留低既 先係真相

男教授以為自己信念好強 到偶然中既徹底失敗 先見真章 好可能先發現自己對他人眼光既在意
女主 由有欲 到自認有德 到有欲
男SP由性伴 到自以為文青 自以為教授所害 到煽動報仇後 回歸做普通打工仔 到甚至成婚

3 當下偶然既真情 勝過由過去執著地留到現在 以為必然既情

我好鍾意呢部戲 而鍾意既位：
a 我本身鍾意偶然呢個概念
b 戲中既突兀唔自然 更突顯當中理念既味道 我鍾意呢精突兀
c 感覺見到編導既精神
好既故仔 應該令人信 故事係真實發生？
呢套就走偏 令我好覺得 嗰個只係編導所擺佈既世界
一切偶然 只係編導以其美感偏好去刻意設計既必然
但正好 透露編導本身既品味而 令我因為鍾意編導個人 從而鍾意佢呢部戲

咩叫做無心者？咩叫做固態嘅利益？
樓主覺得女主角喺office係漫無目的咁同男主角對話？
我覺得係有目的。
女主角想同男主角復合，但又唔知點開口。男主角最初想趕走女主角，但女主角又賴死唔走，同時都唔准男主角離開
當女主角終於道左歉，男主角原諒女主角，女主角表露自己嘅意圖，向男主角坦白自己不能夠作任何承諾，問男主角仲願唔願意一齊

我覺得女主角嘅心理同一般人一樣，eg.聽到男主角讚女主角好友，女主角隨即覺得自卑同不安，即刻就問點解男主角鐘意自己

第二篇邊度出現過錯誤嘅自我理解？
冇人知道教授嘅後續，好難去判斷教授有冇誤判自己
女主角從來都冇自認有德，佢一直都知道自己係唔道德，不過佢都會繼續咁做
男sp冇自認係文青，佢講左自己睇唔起文學。

當下偶然既真情 勝過由過去執著地留到現在 以為必然既情

呢句睇唔明，我覺得過去同現在都係真情，點樣分出勝負？