化鬼龍
2017-05-18 21:18:13
第五節:喜悅(上)
放左學之後差唔多全部時間都係阿欣拖住我行,感覺上如果係單純既好朋友依種行為完全踏過界。
我更加望唔清既係,(我係妳心目中係咩地位?)
阿欣住既地方係一棟比較殘舊既大廈,連架lift每上一層都會發生奇怪既聲音。
「係喎,平時見你行到咁遠搭車其實你住邊架?」阿欣問我
「我住村屋架,平時搭車番學都要半個鐘,成日都要早起身,有機會帶妳黎我屋企睇下。
「好呀,我都想去下啲鄉村地方,打下卡,睇下風景。」阿欣講
叮.........終於到左十八樓阿欣住既樓層,出左lift門阿欣又繼續拖住我行,其實我咁大個仔都未試過比除左阿媽之外既女仔拖過,依種感覺好微妙。
到阿欣門口佢係裙袋到拎條鎖匙開門,本來我諗住阿欣屋企會好殘舊,點知入左裏面同棟大廈完全唔同風格。
映入眼前既係非乾淨常企理既客廳,雖然格局比較細,但係都井井有條。
「今日我daddy同媽子都收夜,所以屋企無人,隨便坐啦,我入去換件衫先。」阿欣未講完就入左房
我坐左係梳發到再慢慢欣賞下阿欣屋企,以我估計佢阿爸定阿媽一定係設計師。
依個時候唔知有啲咩野放左係我塊左邊,凍到我即刻用手拎開,原來係包檸檬茶。
「岩唔岩飲呀?唔鐘意仲有其他野飲喎。」阿欣唔知幾時已經坐左係我隔離
著住便服既阿欣我睇到入哂迷,天寒地凍佢仲著住條短褲,平時著裙都唔覺佢條腿咁白滑。
「係唔係唔岩飲啫?做咩成個人呆左係到?」望阿欣望到入哂神,完全唔記得左佢岩岩問我野黎
「唔係呀,我最鐘意飲檸檬茶,快啲開game抽野啦。」我講
「一早搞掂哂啦,等抽炸。」阿欣一早已經入左點落去
望住抽蛋機啲蛋逐粒逐粒爆開,我個心都好期待中唔中到阿欣想要既寵。
「得返最後一次十抽,希望中啦。」阿欣講
「嗯,希望你中到想要既寵啦。」我講
望住第一行五粒蛋都無爆開,我覺得都無咩機會中到。
估唔到第十粒蛋竟然有動畫爆開,代表依粒蛋係阿欣未有既寵。
【超級稀有】,無錯竟然係最尾一抽中左阿欣想要既龍馬。
阿欣驚喜到叫左出黎,仲無啦啦錫左我塊面一淡。當然我塊面即刻紅哂。
唔通阿欣真係鐘意我?
化鬼龍
2017-05-18 22:36:49
睇黎我應該無估錯啦,我一直以黎既感覺一定係岩既。
「阿欣呀..............其實妳係唔係......」係我想問既時候阿欣打斷左我
「難得咁難都抽得中,不如你留係到請你食餐飯呀。」阿欣好有誠意咁邀請我
「都得既....反正我父母今日都唔係屋企,我都係自己一個食。」我應承左阿欣
時間尚早,我就帶下阿欣打下啲關卡,場面都幾歡樂,我開始慢慢習慣同佢相處。
玩到咁上下,阿欣就去左廚房開始準備今晚既晚餐,而我就係餐到睇下電視等開餐。
阿欣放低左部電話係枱面上,我無意中留意到有一則whatsapp,聯絡人名叫BBG,而幅icon係阿欣同個男仔合照。
依一刻我個心情由天堂跌到落地獄,妳係唔係當我係一隻兵?我個心不停有依個念頭。
「食得啦,快啲埋位啦喎。」阿欣係廚房拎埋最後一碟餸出黎
我無回應,但我都係張食飯枱坐低。
「做咩野呀?你面色好似有啲怪既。」阿欣擔心咁問我
「無野。」我用依兩個字隱藏左我既心情
成餐飯裏面我都無咩點出過聲,最多都係讚下阿欣啲廚藝唔錯,佢問我野都係粗略咁答佢。
食完飯之後阿欣見我咁樣都無聊我講野,我見氣氛咁尷尬就話番屋企做份啲功課做藉口走,阿欣都無挽留我。
行去搭車個段路我一直係到諗,究竟我係唔係兵,阿欣一直都只係利用我?
唉,點解我第一次解開心房去學識同女仔相處,點解要咁對我?