召喚歌唱求學巴絲及你問我答(六)

無轉TG吖
都係@Hugo38983

我又翻嚟繼續update個post啦~
係我潛水嘅呢兩三個月入面，我不停陸續咁收到來自各位唔同嘅求救以及查詢

係呢度我除咗要對你哋挖墳嘅能力表示由衷嘅敬意之餘，我亦更加要多謝你哋
多謝你哋令我明白原來真係有唔少人需要我，等緊我繼續分享歌唱上嘅嘢

事不宜遲，馬上進入正題

發聲基礎1：高音與低音I
Hey！之前唔係話講完氣息就會講聲帶畢業啦咩？點解無端端走嚟講高音低音嫁！吔屎啦你！

各位先稍安勿躁，點解無端端要講高音低音，轉頭你哋就會明白架啦

每一個初學嘅，自學嘅，亦或係遇到瓶頸嘅，佢哋往往想要突破/達到嘅嘢，就係紮實咁上高音
但上高音之前，我哋要瞭解我哋嘅高音低音係點樣發出嚟嘅

大家可以試下拉一條橡筋，當佢被拉長嘅時候彈佢，橡筋之間嘅距離會變窄，佢就會震得好快，同埋震一個比較高嘅音，而當中，需要彈橡筋嘅力量會比較大

但係當放鬆小小嘅時候，橡筋拉得比較短嘅時候，橡筋之間嘅距離就會變寬，佢就會震得慢啲，同埋會震得低音啲，而當中，需要彈橡筋嘅力量會比較細

而且，當佢被拉長嘅時候，條橡筋會變幼，放鬆嘅時候，就會粗翻小小


點解無啦啦會講彈橡筋呢？
因為，聲帶發出高低音嘅方式大致上同拉橡筋，彈橡筋係完全無分別嘅
而聲帶嘅運作又係點樣同彈橡筋拉上聯繫？
大家諗一諗，我之後會話比大家知

有無開班教？想學

有
但我唔知我有無時間剩
你tg我先，有緣就教啦

各位聖誕快樂希望今個聖誕大家都開開心心
我就好開心嘅

發聲基礎I：高音與低音II
上次就講到橡皮筋係拉長放短嘅情況下彈佢會有咩聲出
唔知大家有無諗到佢同聲帶閉合有咩聯繫呢

大家睇下以下呢幅圖：

圖中果兩條嘢，其實就係我哋嘅聲帶
睇落係唔係好似條橡皮筋呢

其實，係唔介入任何主動調整嘅情況下，聲帶係上高音，落低音嘅時候都會好似條橡皮筋咁拉長縮短，同埋拉近放遠

因此，本身上高音落低音嘅時候，聲帶閉合嘅程度本身就會有所改變，即使我哋唔做任何嘅調整

（所以高低音其實係同聲帶閉合有關，我無離題）

所以，大家就會明白，點解係歌唱上，無論係用啱嘅方法又好，錯嘅方法都好，係上高音嘅時候，都必然會覺得需要使用嘅力量，會比低音嚟得多

但係……到底點解好多人唱歌嘅時候，上到高音反而唔係變實在，而係變咗假聲，噴一堆氣嘅？！？！
呢一樣嘢，我之後會解釋

請期待，下回分解

各位朋友，新年快樂
先祝各位新一年一切平安，諸事順利，煩惱遠離！！！
今日嚟繼續同大家講下發聲嘅部分~

發聲基礎II：高音與低音III
上次就提到一個問題：既然上高音會用力，但係點解好多人係唱高音嘅時候往往會突然有種虛弱無力，好似漏氣嘅感覺呢？

呢樣嘢，就牽涉到控制聲帶伸縮以及閉合嘅肌肉了
呢樣嘢，其實網上有非常非常多嘅詳細介紹同討論，大家隨便一搵就搵到。
但係可能對於一般人嚟講，太深太仔細嘅嘢可能會難以令人掌握，所以我係度嘗試簡單咁同大家講下：

係控制聲帶上，主要有兩組肌肉嚟控制我哋嘅聲帶（實際上有三至四組，但方便講就暫以兩組表示）低音肌肉及高音肌肉

低音肌肉會閉合+縮短聲帶，係呢個過程上同時會令聲帶變厚
高音肌肉會拉長聲帶，係呢個過程上同時會令聲帶變薄

咁……有乜嘢肌肉係令聲帶拉開唔閉合嫁……？
呃……其實呢……你只要放鬆唔用力，聲帶就唔會閉合嘅……所以呢……膠少陣plz

呢兩大組肌肉，係歌唱上係會互相配合嚟幫助我哋上高落低，以及營造唔同嘅音色效果

但絕大部分人係歌唱上，都無法平衡呢兩組肌肉嘅使用
絕大部分非專業訓練嘅人係歌唱上，都只會係同一時間內係用咗一組肌肉唱歌，導致兩組肌肉之間並無施力嘅平衡點，以及銜接點。

而高音肌肉同低音肌肉係使用時，都會令聲帶產生截然不同嘅音色
所以，當啲人係唱歌嘅時候一直強用低音肌肉嘅時候，一上高音，低音肌肉就無辦法繼續維持運作，同時會瞬間切換到高音肌肉發聲
咁樣的話，一上高音就會好似太監咁虛弱無力了……


下次，再同大家講多啲高低音肌肉

點解可以咁有心機打但無人睇

隨緣啦呢啲，我都係佛系更新
有人睇固然好，無人睇自然以後會有有緣人睇到

大家好
消失咗兩個月，經歷埋復活節之後……
就等緊之後嘅佛誕了
今日一時興起，繼續同大家講下唱歌

發聲基礎III：混聲前導

上次講到因為絕大多數未經專業發聲訓練嘅朋友仔，並唔識去合理調動高低音肌肉去唱合適嘅音高，所以好容易就會導致破音，高音漏氣，扯喉嚨等等嘅情況出現

咁到底呢個問題要點解決呢？
係呢度，我想一反常態，唔直接講個答案住。而係從問題去思考解決嘅可能性。

當下嘅問題，係出自於因為肌肉唔協調而產生問題。
而肌肉有兩組，要如何處理唔協調嘅問題呢~
以下有兩個方向：

1.唔去協調佢哋，單純用某一種肌肉
2.死死氣認命，協調佢

篇幅所限，我暫時先講第一個方向：
單純用一組肌肉，就可以避免咗需要協調嘅問題
然而，問題就正正出係度
用低音肌肉嘅話，咁就失卻上高音嘅能力，而夾硬上，就成為大家所講嘅扯頸/扯喉嚨
用高音肌肉的話，雖然可以輕鬆上高音，但咁就犧牲咗聲帶閉合嘅能力，亦難以落翻低音，呢個就係所謂嘅雞仔聲/太監聲
用大多數普通人嘅講法嚟講，低音肌肉模式嘅發聲就係真聲，另一者，就係假聲了

聰明嘅各位睇到呢度，就會發現
要解決問題，始終都係要死死氣咁行第二條路：協調好高低音肌肉嘅運作

而呢一條路嘅結果，就係混聲嘅由來


下次，就同大家講下混聲

















p.s.後續有關混聲嘅內容，入面會有同唔少主流歌唱教育門派，系統，以及老師嘅意見，理論，認知有所衝突以及顛覆嘅地方。
所以為咗保護佢哋嘅利益，以及保護我自己，係後續嘅內容我會儘可能唔提及任何外間嘅系統理論，只以自身系統嘅角度去簡介混聲呢一回事，儘可能避免任何衝突。
然而如果睇緊呢個post嘅巴絲覺得我講嘅內容唔入肉，唔夠喉嘅話，歡迎私下以TG/ig/任何搵得到我嘅途徑，深入交流

發聲基礎IV：混聲

混聲到底係咩嚟呢？
其實混聲就如字面意思一樣：混出來的聲音

但到底混什麼呢？
混的，其實並不是聲音，而是混合高音及低音肌肉一起運作所發出的聲音，這才是混聲真正的意義所在

另一重意義，則是混合低音以及高音發聲模式的一種發聲方式，這也是混聲的意思（此處因牽涉各人不同的身體感受，會較為複雜，因此以下內容將由橙字內容繼續拓展）

因此，有一種很主流的說法
是混聲是連接不同共鳴的發聲方法

在低音之中，低音肌肉的主導下，適當加入高音肌肉的力量
在高音之中，高音肌肉的主導下，適當加入低音肌肉的力量
令全音域都保持一致的音色

聰明嘅大家就會留意到，其實係唔同嘅音域入面
高低音肌肉嘅使用比例係有所調整的
大家要明白一樣嘢：保持不變的係音色，而成就呢一件事嘅背後，係需要係唔同嘅音域，調整高/低音肌肉所使用嘅力量比例，甚至係發聲嘅音量都要配合調整，先可以做到音色一致嘅效果

至於要點樣做
我諗......應該就好難凈係用文字就教得到大家
所以混聲嘅內容暫時就講到呢度啦

之後會講咩？其實我自己都唔知
睇下自己心情/大家想知啲咩/直接唔再講


大家如果有咩想知，想問
可以即管留言

想問下唱歌點樣啲字唱得連啲，唔好逐隻”凳”出嚟？

首先可以試下先唔好唱歌
念口簧/急口令嘅方式唸個歌詞先
一般人係講嘢同好快講嘢嘅時候都會好連貫
到你掌握咗個感覺之後
再試下配合旋律''唸''出嚟
咁樣就會連貫好多了

N年冇唱歌 加上封左K房幾年
生疏晒又想學返唱歌

想學唱歌嘅話可以搵我吖（笑

其實就算想自學，網路上都有好多免費嘅資源
最重要嘅都係自己有無可以練聲嘅地方
無嘅話，學完無得練都係無用

雜談：起床的聲音和開聲I

大家好，小弟好耐好耐都無上同大家分享歌唱知識了！
(雖然正常都無乜人會期待呢個post會持續更新就係……)

最近突然諗到一樣嘢，所以就嚟上水同大家分享一下
標題提及起床的聲音和開聲，但其實我主要想講嘅係起床的聲音

大家有無經歷過
每一日起身嘅時候，一講嘢都有種辛苦/聲沙嘅感覺？
相信呢樣嘢對於每一個人嚟講都係司空見慣，甚至已經覺得係應該/好正常嘅事

如果大家去查詢呢樣嘢
幾乎清一色嘅解釋係：
聲帶肌肉經過一晚嘅睡眠，肌肉無運作需要熱身方可回到狀態；聲帶經過一晚睡眠，沒有充足水分補充，因此導致粘膜濕度不足，較難發聲

以上嘅講法雖然無錯，但大家有沒有思考到當中嘅''BUGS''？
對於後者嘅角度嚟講，姐係一早多飲水進食，令身體恢復相對水分充足嘅水平，自然把聲就無問題啦！
但事實係……用處不大

其實真正嘅重點係前者度
經過一晚睡眠，肌肉得到充分嘅休息同修復
理論上唔係應該會比起平常長期使用嘅狀態嚟得更好咩？

但係事實係……幾乎每個人起身都聲沙

咁……到底係咩事一回事？而呢樣嘢當中又有乜嘢秘密呢？
呢度我先賣個關子，比大家思考一下
上面嘅理論同講法確實係無錯
而呢個講法，到底內藏咗乜嘢意思呢？

答案，不日更新時將會揭曉


大家有咩想知想問都可以隨便問，順便比下我知下大家有咩想知，咁樣我就可以繼續分享對大家有用嘅知識鳥

想跟隊學唱歌感覺自己把聲太低 好多“正常”歌都唱唔到

可以嚟學吖

好鍾意唱歌
但無乜技巧
有機會都想學下