中學畢業個陣開始番，個陣想草錢去畢業旅行。後尾讀ASSO 都keep住炒左年幾兩年賺學費。炒過唔同餐廳同場 都有唔少開心/唔開心既回憶同體驗
後尾的起心肝讀書上番u之後就發誓以後唔再炒散，諗番起個段時間半工讀咁濟真係好勵志又青春
第一次番工番到喊，都係因為俾啲炒散老屎忽恰。就算過左咁多年後都仲好記得
個陣仲細咩都唔識，啲同事見我新仔就推曬濕碎野俾我做執枱、廚房野、試過打左成5、6個鐘頭銀器無抖過，又攰又肚餓等緊收工，已經無hea做，但個陣無啦啦俾個老屎忽炒散一句撻埋黎話我係咪殘障手腳咁慢以後點出社會點點點，又爆粗又剩，佢當正我出氣袋咁鬧。個下真心崩潰覺得好委屈，等條友(蛇王)走左之後自己一個係廚房打住銀器係到啜泣
可能呢啲對於大家黎講係小事但對個陣10幾歲既靚妹既我真係好大打擊，呢個陰影真係記足一世。
當然除左呢件事之外，其他既辛苦同攰我都可以忍到
炒過最鍾意既係文華，番過佢地既F&B同Amber，記得出event/到會就好正，無咁悶，好似出商場做Event、樓盤展，出event個陣啲snacks tray去唔曬個陣啲鬼佬廚仲會請我地啲炒散食幾件，件foie gras lollipop真係好好味
記得一次做宴會到會，真山頂獨立屋豪宅，個主人家鬼佬黎，大開眼界點解香港地有人可以咁有錢
佢地請左啲明星賓客，記得有方力申同何潤東等，又有live show/bar枱set up個啲，成個拍劇場景咁，聽講個餐飯買單都成百萬
個陣做得都算開心，因為好多活動出同埋唔係自助餐個種執碟執死人
如果有機會我會試番曬自己做過既餐廳，雖然宜家對我黎講個感覺會唔同左好多，可能當係一種紀念以前咁努力既自己(?) 雖然可能已經唔同曬人，亦都無可能再見番以前一齊做過野既同事，物事人非。但個情意結會一直都係到
