點解醒獅個樣唔同嘅呢? 點認? 有乜分別?
其實獅頭款式可分為佛、鶴兩種庄(裝?),就係源自於廣東佛山、鶴山兩個地方,不論傳統、新派醒獅所有獅頭都離不開呢兩種款式。
佛山獅 / 佛山庄 / 佛庄
最早亦可謂最正宗嘅設計,源於佛山
外型呈立體四方形
最易辨認係上唇翹起,露出牙齒
相貌比較威猛
獅頭亦比較重
鶴山獅 / 鶴山庄 / 鶴庄
由鶴山人馮庚長(1852-1907)基於佛庄所變化出嚟,馮亦創出新嘅舞動方法同獅鼓打法,為舞獅注入新元素。
鶴庄形狀較呈立體長方形
最易辨認係嘴唇唔翹起,呈水平U形,尤如鴨嘴
相貌比較溫文
較佛庄輕盈, 可以做出更多靈巧動作, 舞動時俾人感覺亦冇佛庄咁惡
相信新加玻馬拉最早引入嘅應該係鶴山獅,新派獅亦多用鶴庄
每日頭條 - 關於新加坡舞獅的那些事兒
https://kknews.cc/news/z6vjlxg.html
佛鶴庄
就係佛、鶴兩種設計混合
以我理解係基於佛庄設計,嘴用鶴庄鴨嘴,而嘴縮短到貼近面部,呈佛庄立體四方外型
不過其他資料講又唔太一樣,我都唔太肯定
就算同一隻庄唔代表相同形狀,視乎紥作師傅同客人喜好,形狀長少少短少少、鼻大定細等,冇統一標準。
咁應該用邊款? 某啲門派或團體會傾向用某一款式,例如洪拳、蔡李佛派傳統係用佛庄,否則冇乜所謂。
令我奇怪嘅係,現代資訊發達,可以交流更多創意,但咁多年都冇人可以再創經典,改出佛、鶴以外又受歡迎嘅獅頭