是咁啲，事源前幾日開咗個 post 關於英國國會對「香港人」英文串法冇共識嘅情況，同埋討論咗英國政府將「Hong Konger」依個串法納入官方《國籍及國家標準列表》，所以就諗，如果英國政府有行動，美國會唔會都有呢? 咁就發現原來真係有!!!
美國聯邦政府印刷局係專門為聯邦政府唔同部門負責編輯、印刷、出版、發行工作嘅官方機構，原來都有將「Hong Konger (香港人)」列入佢地官方《格式指南》入面嘅國籍列表
根據美國法律，印刷局有權決定官方出版物嘅風格同格式，但千祈唔好覺得格式冇乜所謂，只係平時miss要人寫論文個陣雞蛋入面挑骨頭先咁介意格式，其實只要對比翻新華社等等機構對每一個用字嘅執著程度，當中嘅政治含意，就知道風格同格式嘅重要性
如果係咁嘅話，當英國政府同美國聯邦政府都採用「Hong Konger (分開)」嘅時候，係咪意味著已經可以同「Hongkonger (黐埋)」、「-ese」字根，或者其他版本嘅英文串法講拜拜呢? 但睇翻之前嘅討論，相信都係要等將來透過民主議會或公投決定，再刊憲落實，大家先會接受到以邊個串法作準
孤陋寡聞及03年遊行
其實有一點要講講，「Hong Konger」列入美國官方《格式指南》國籍列表依件事，可能單純係小弟自己孤陋寡聞，舊聞當新聞
因為對比翻依本《格式指南》不同年份嘅版本，「Hong Konger」原來一早喺2008年版已經出現，但2000年版就冇而回想返2014年《牛津字典》收納「Hongkonger」同「Hong Kongese」嘅時候，當時好多新聞都大事報導，但偏偏依啲報導都唔多見有提到美國官方《格式指南》原來比《牛津字典》早成六年已經做咗相同嘅事
而且當嘗試 google 睇下會唔會有媒體已經報導過，但真係唔係好搵到相關資料，所以只好大膽假設香港仲未有媒體報導美國聯邦政府依個做法，但如果小弟柒咗，就當係送畀大家嘅一個笑話
但如果冇柒到，咁耐以來點解媒體、美國政府，或者熟識美國嘅觀察員等等都一直咁低調無人講? 應該一早就有人知架喎
另外，《格式指南》2000年版到2008年版中間發生咗乜野事令美國政府決定要加上「Hong Konger」一字呢? 會唔會同2003年大遊行有關?
澳門人被落榜
既然依本係風格同格式指南，亦即係一定程度上反映咗美國政府內部嘅一啲睇法，所以都應該值少少時間去研究
首先，《格式指南》入面依個國籍列表有個小標題：稱謂詞( Demonym )係稱呼一個地方嘅人民或者居民嘅叫法
同時，如果拎英國來對比，英國嘅國籍列表上係有「 Macanese」一字來稱呼澳門嘅居民，而對於美國《格式指南》來講，亦都一樣有「 Macanese」，所以不妨拎澳門同香港喺最近5個《格式指南》版本來對比：
由上面依幅圖睇到，拎埋澳門來作對比，就更反映美國當年列「Hong Konger」入《格式指南》並唔係亂來嘅決定，美國政府似係2008年個陣曾經做過一啲檢討，認定大部份嘅澳門人都應該被稱為「Chinese」，但香港唔同，應該係發生過一啲事而令美國有依種睇法，所以小弟先至喺前文到估或者同03年遊行有關
另外，2000年個陣，點解澳門人唔係「Chinese (中國人)」但香港係呢? 當時兩個地方都已經由中國管，冇理由一個係一個唔係
跟住再睇睇「Chinese/Hong Konger」依個標示方法，成個國籍列表，應該只有香港用上標點符號斜線依個標示方法，其他地方會用「or (或者)」同埋逗號來表示同義詞，所以，香港依個斜線符號應該唔係解作同義詞，可能要解讀成「either…or… (要麼就…要麼就…)」，如果係咁，即係對於美國來講，香港依片土地上面嘅人，要麼就「Chinese」 要麼就「Hong Konger」
唔知大家又會點解讀美國嘅官方《格式指南》呢? 點都好，如果你堅持睇到依一句嘅話，小弟都好多謝你，因為依篇文其實都幾長幾悶
= = = = = 美國聯邦印刷局《格式指南》(各年份) = = = = =
https://www.govinfo.gov/collection/gpo-style-manual?path=/GPO/U.S.%20Government%20Publishing%20Office%20Style%20Manual
= = = = = 英國政府《國籍及國家標準列表》= = = = =
https://www.gov.uk/government/publications/nationalities
= = = = = Google 搜尋結果 = = = = =
https://www.google.com/search?q=%22%E7%BE%8E%E5%9C%8B%22+%22%E5%AE%98%E6%96%B9%22+%22Hong+Konger%22&source=lnt&tbs=cdr%3A1%2Ccd_min%3A1%2F1%2F2008%2Ccd_max%3A12%2F31%2F2014&tbm=
= = = = =
「香港人」英文用邊個串法? 國會冇共識, 英政府嘗試定標準?
- 分享自 LIHKG 討論區
https://lih.kg/2382757
= = = = = 開心些牙 = = = = =
https://twitter.com/Ima_HkSiuwaaga/status/1355129697210753031
