難過到想死，貓貓突然過身

我諗我唔會想留低毛個啲就咁一幅相做我嘅Wallpaper就夠

不過我只希望佢走個陣 唔好特別辛苦

我隻貓又係養左六年
咁就走左
好彩之後發夢夢到佢
投胎做左第二隻貓
好似返黎同我講再見咁
個人都算放低左

摺耳貓 扁鼻貓 短腳貓 你預左好多病痛
以上呢幾隻貓根本係人類為左取悅人類而自行製造既生物
違背左自然界既定律 本身就已經係唔應該存在向呢個世界上既生物

如果冇估錯閣下應該係弱智既

拎返嚟2歲至4歲
你又養咗佢6年
即係都8歲-10歲先走，以一隻HCM嘅貓貓嚟講算係咁了
佢遇到你已經好幸運，唔需要自責，節哀順變吧

我都有隻貓前排做完小手術就忽然走左
我果隻雖然已經1x歲 但我都經歷過你自責呢個階段
我完全明白你心情

但你都要明一樣野 唔係所有野你都控制到
亦無咁多如果
只要你做嘅決定大前提下係為佢好 唔係害佢的話就得啦
我深信你係好愛你貓貓 唔會更加無可能係特登害佢
貓貓亦知道你地愛佢

但所有動物都有佢地自己嘅命水
試下放開d 唔好太自責啦

唔關你事嘅，你已經照顧得佢好好，佢會知道架。佢本身身體咁差，如果去咗另一個屋企，遇到啲仆街主人仲衰

RIP
加油啊 樓主
貓貓有你咁鍚佢 佢生前一定過得好幸福同一定知
樓主唔好太過自責 節哀順變

名種貓病痛比較多，睇開啲啦。

"你好，這是《自殺．自療．互助舍》。看來你已累積了不少負面情緒，是嗎？人就好像氣球一樣，若積存的鬱結和壓力太多，便會有爆發的一天。何不暫時停一停，到我們的網站 www.help4suicide.com.hk 。 那裡有一些勵志故事和有趣短片，你可以隨心看看。你也可以進入網站內的『Chat窿』（星期一至五：上午六時至凌晨一時；星期六、日及公眾假期：下午８時至凌晨１時），讓我們的義工為你加油打氣！

我們願意聆聽你的心聲，伴你一起走過這段艱難的時候！只因『晴天雨天要樂天，難關難過總會過』！

《自殺．自療．互助舍》"

大家多謝既鼓勵

本身專注做野個時都無咩野，反而上黎見到大家d 開解字眼又想喊

我諗我應該潛一排水，唔入黎住

但都好多謝大家既留言

非常明白, 兩個月前養左11年嘅貓都走左,
佢又係好細膽怕生保, 次次出親街都賴尿,
但我仲困佢住院, 本身生生猛猛好好力水,
出番黎就虛弱不堪, 聽住佢半夜大叫一聲後就走
太突然根本handle唔到情緒

個種自責係人地點安慰你都唔會釋懷到,
我對住個遺體懺悔, 對住啲遺物懺悔,
係FB PO文懺悔, 好想令到佢明白我點諗,
好想知道佢有無怪過我

一無嘢做個腦放空就會諗, 之後會不停飲泣,
頭個禮拜真係好痛苦, 無停過諗隻貓,
呢段時間我都係同家人一齊睇番佢由細到大嘅相,
再去整左本相簿紀念, 作為佢存在嘅證明

人處理悲傷階段進展唔同, 但我都信始終會隨時間move on,
有時上網見到某啲topic都會觸發到我胡思亂想諗番呢件事,
唔好強迫自己振作, 例如特登執哂啲嘢走廢事觸傷情,
其實我到而家都仲會係個吉嘅嘢食兜上面倒糧,
只可以話順其自然, 總有一日呢番傷感會轉變為思念

樓主
我絕對明白
今年2月陪左我8年ge寵物突然離世
真係好難接受

其實我絕對建議你平服心情後再領養
將愛分俾下一隻貓貓
香港仲有好多浪浪需要一個家

我相信你ge貓貓都會想其他貓幸福

Rip 貓貓🌈

睇完真係好難過
男朋友隻狗已經12 13歲
前排有d唔舒服 我已經嚇到有時夜晚都會發惡夢
哩排精靈返 真係好希望佢可以健健康康長命d
舒舒服服咁過日子
其實我都好擔心如果要面對失去佢果刻
但我長期係外國 見到佢嘅時間只會越黎越少

所以咁多年我好鍾意貓都唔敢養寵物
隻貓仔狗仔有咩事我真係會想死撚咗佢算

唔知點安慰你 想喊就喊啦
希望貓貓係天上面可以快樂生活

算啦樓主無得諗咁多
你做咩之後都會後悔
無得如果論
可能佢夠鐘呢...

take care

貓貓就咁如是者，渡過呢好幾年，細個個時同佢玩，佢跑一陣就透大氣，唔玩，我地一直慣左佢因為個鼻透唔順氣呢件事都不以為然
我隻貓都係

唔敢睇
唔敢面對

夜深，又未想瞓

我都唔知自己諗緊咩⋯
我可能純粹想講下，想寫低佢，希望睇到既唔好見怪

今日去左火化貓貓，繼個日殯葬公司拎走佢之後再一次見到佢

見到個下當然又喊過⋯
其實貓貓俾佢地注射左防腐，無話特別走樣，遠睇，驟眼睇好似瞓左咁

我唔知係咪覺得可惜既位係，唔知係咪佢係屋企走個時，我地無好好幫佢閉上眼，佢係個度射左防腐就已經硬左，點閤都幫唔到佢閤埋眼

其實我無話會喊佢咩死唔眼閉個種，只係佢以前瞓覺有時都係咁，閤唔埋眼瞓，我以前見到人又好貓又好，閤唔埋眼會眼乾傷眼，所以會幫佢閤，但佢俾我閤完隻眼之後，其實係搞醒左，但無耐又闔着咗，但對眼又係閤唔晒咁款⋯擘剩對斜眼無焦點咁瞓

我點整都做唔到，睇住佢有d似以前咁唔闔埋晒對眼，斜住對眼，彷似瞓覺個隻無焦點咁望住我，我唔知係咩感覺

摸佢個時，其實摸毛既感覺差唔多，但感覺到防腐令佢硬左，其實明佢真係走左，得返個軀殼係度
個種同回憶既質感唔同，所以我摸唔到落去，剩摸個頭仔d毛

本身關於火化之後既問題係帶唔帶骨灰走，定留佢係殯葬轉手俾政府做花肥

屋企本身覺得帶骨灰返去都無用，因為最終我地都要處理佢，無論係拎佢上山去埋或者做花肥諸此類，放骨灰係屋企其實無意思

但我成日又會諗佢會唔會俾人送左去垃圾桶之類，最終因為知道貓貓骨灰龕其實唔大個，屋企都同意拎骨灰走

之後我睇住佢入爐，再睇埋執骨個過程

高溫之下，真係大部份野都火化晒，剩返既真係得骨頭，有d碎，有d成條，好似睇教科書見到，好似係博物館見到個d

唔知係燒完之後本來就唔會有完整頭骨，定怕我地太傷心所以可能整碎先， 其實所謂既頭骨都睇唔到佢係一個完整既頭骨,唔似教科書或博物館見到個d

之後就執骨拎去磨粉

或者我由防腐到骨頭，都真係真確知道貓貓早已離開，其實我個下應該可以做到反悔，話留佢去做花肥，不過話左拎走，當然拎走佢先

拎到返屋企，骨灰龕其實只係個有重量既容器，話佢係等如貓貓，根本唔係個回事，但係我又會諗其他無謂野，如果我放佢入抽屜，係咪等如困佢係入面？ 佢鍾意瞓走廊地下，唔通放佢係地下，等我地差錯腳踢爛，根本就無可能

再講將來，最終應該要幫佢回歸大自然做花肥先係正確，但係又點解同點揀該去做咩，海葬，又覺得佢根本未必鍾意水，話上山或者寵物公園埋左去，但點解要咁做？佢無去過呢d 地方，呢d 地方對佢無意義，我係咪棄左佢陌生地方？

胡思亂想諗埋d奇怪野，最後又去左碌舊相，相真係存在過最可怕既證明，睇落去一切幾咁真實，但又咁遙不可及⋯望住d相又剩係想講對唔住

我都唔知自己諗緊咩，純粹我想寫低講下咁，個感覺好似寫完會好過d咁

我明白你試下買花盆種花然後淋啲骨灰入去?
當係延續佢嘅生命又可以喺屋企陪住你

喪體果日我睇到佢嘅遺體之後就覺得佢係訓左

無勇氣亦無辦法睇入爐佢被火燒果下 同 燒完剩下之後骨頭

所以我嘅記憶佢只係永遠訓著左

多謝樓主同各位巴打絲打留言
我琴日發現我最錫既貓貓半夜都係心臟病突然走左
眼淚流不停，世界也崩潰了
一直重讀著大家既留言
覺得不是那麼寂寞

也很怕，一直無法把傷感化為思念
我真的很愛她錫佢多過自己很多很多
每天死撐返工也是想著她…

忽然發覺很舊的post 有留言

離出post 到現在過了很久了，就像之前所有巴打嘅留言鼓勵，時間真係會沖淡一切，到依家有時想起還會難過，但有時我會想我是不是忘了太多沖淡嘅同時是不是代表我開始唔記得，之後我set 咗佢張大頭相落我個電腦login 度

所以你會變返好好㗎再難過，你一日一日咁過之後就會振作返無事架

有咩唔開心再同大家講講，之前係度出post , 真係好咗好多，真係多謝之前咁多位留言鼓勵