《我專門幫人擺分手和頭酒》（為什麼分手呢？）[2]

986 回覆

366 Like 2 Dislike

第 1 頁第 2 頁第 3 頁第 4 頁第 5 頁第 6 頁第 7 頁第 8 頁第 9 頁第 10 頁第 11 頁第 12 頁第 13 頁第 14 頁第 15 頁第 16 頁第 17 頁第 18 頁第 19 頁第 20 頁第 21 頁第 22 頁第 23 頁第 24 頁第 25 頁第 26 頁第 27 頁第 28 頁第 29 頁第 30 頁第 31 頁第 32 頁第 33 頁第 34 頁第 35 頁第 36 頁第 37 頁第 38 頁第 39 頁第 40 頁

黑犬風易 2020-09-02 22:53:37

sorrrr 近幾日忙咗少少

聽日應該就會準時翻

黑犬風易 2020-09-02 22:58:40

（三十四）誰人又相信一世一生這膚淺對白

歌終於聽完，而頭痛亦都好咗啲。

我決定喺Kelly到之前走。

原因好簡單，因為我呢刻心入面有一半嘅鬱悶感都係來自Kelly，如果佢嚟到，我就無得唔面對。

所以，我覺得我都係快快手走好啲。

我一路行，一路後悔自己飲得太多，搞到而家行每一步都好似頭暈暈咁。

就係我努力咁喺條路上面表演行直線嘅時候，我聽到後面有把聲：「阿濤，你做咩唔等埋我啊！」

Shit，係Kelly。

我即刻加速咁行，但無奈我成個腦都係酒精，根本想跑都怕自己差錯腳走出馬路。

所以Kelly今次追咗幾步，已經嚟到我身邊。

「你搞咩啊？偵探叫我送你翻去喎！」Kelly一手就捉住咗我隻手。

「唔洗啦，我自己翻去。」我有啲用力咁fing開咗佢隻手。

Kelly對我呢個嘅態度有少少驚愕，但係好快又走過嚟扶翻住我，細細聲講：「我知你心煩，我唔講嘢，淨係送你翻去。」

唔知係咪飲咗酒嘅人特別容易喊，喺呢一刻，我突然之間就喊咗出嚟。

仲要係無啦啦，喊到出聲嗰種喊。

街上面有啲經過嘅人都俾我嚇親，彈開咗一段距離。

而Kelly咩都無講，只係細細力掃下我個背脊，好似氹小朋友咁。

「點解？」

「點解啲咩？」Kelly望住我。

「點解你唔可以比我自己一個繼續孤獨？點解你唔可以比我繼續逃避問題？點解你要出現去逼我面對我最唔想面對嘅嘢啊？」

我掩住塊面，痞左係條街度喊住咁問。

我相信若然我係路人，我一定會以為條友拍緊戲。

但係當我係呢個喊緊嘅人，我先發現，當你喊嘅時候，你唔會再諗自己好唔好睇、人哋會點諗，你只會想專心咁將所有嘅鬱結用眼淚迫晒出嚟。

「係你教我要坦白面對感情，係你比我見到坦白之後可以搵到自己分手嘅原因。我知道係你心裡面嘅秘密對你來講好重要，甚至可能會係一個傷害。但係我更加想你面對佢，而家呢個秘密根本就係你身體入面嘅腫瘤，你只係怕開刀會痛所以唔敢做手術。但係你一日唔做手術，你就一日唔會好返。所以我寧願你痛一次，因為你咁先可以俾自己好得返啊。」

Kelly跟住我一齊踎咗喺地下，用前所未有咁認真嘅聲嚟同我講嘢。

「唔緊要㗎，我唔介意自己好唔翻，我唔介意一世孤獨㗎……」我攬住左自己嘅膝頭，坐咗喺地下度。

喺呢一刻，我淨係想收埋自己。

黑犬風易 2020-09-02 23:00:28

「但係我介意喎。」Kelly係我兩個膝頭哥嘅空隙中間偷望我，我見到佢笑緊。

「關你咩事啫？」

就係我問完呢個問題之後嘅一秒之內，我即刻意識到問呢個問題係一件幾咁愚蠢嘅事。

因為我諗到，跟住Kelly會點答我。

但係我諗唔到，我可以點樣答番佢。

「因為......」

唔好啊，唔好講出嚟啊。

「我諗我......」

真係唔好講啊，我未ready啊。

「鍾意咗你。」

唉。

自作孽不可活。

要嚟嘅，始終都要嚟。

而重點係，我知道自己根本就未準備好。

即使我知道自己有心動，但係我根本就無可能健康咁進入到一段關係。

我更加唔想用呢個狀態進入關係，然後再一次破壞自己辛辛苦苦建立返嚟對愛情嘅小小希望。

「對唔住，我完全唔鍾意你。」
當我講出呢一個大話嘅時候，我嘅眼淚依然係咁流。

我唔知係因為我只係一路繼續喊緊，定係呢一刻我為咗自己所做嘅決定而心痛。

Kelly聽咗我嘅答案，臉上嘅笑容無變過，好似預咗我會咁答一樣。

「我知道自己係一個好容易鍾意人嘅人，所以我唔會需要你同我有一模一樣嘅步伐。我淨係想你知道，由呢一刻開始，有人會介意你嘅孤獨同傷心。」

我諗翻起呢幾個月入面好多個夜晚。

而呢一啲嘅夜晚都有一個好煩嘅人霸住咗我個廚房，煮埋晒啲又唔睇得又唔食得嘅餸，然後嘻嘻哈哈咁搞到我屋企好嘈。

但係因為呢一個人，我開始覺得個屋企有翻家嘅感覺。

我開始覺得原來身邊有個人都幾好。

我開始覺得心入面對愛情有翻期待。

只係，我仲未跨過到嗰一個高牆。

我仲未可以信任愛情。

「我想搵嘅人，係一個可以陪伴我一生一世嘅人。你覺得你得唔得啊？」

當我問Kelly呢個問題嘅時候，我就好似一個跌咗落水嘅人，伸手對住船上面嘅人問，你可唔可以救我啊。

即使係大話，我都想Kelly諗都唔諗就答我「得」，因為咁樣或者我會多少少勇氣去接受一段新嘅愛情。

但係Kelly聽咗呢條問題之後，只係停咗喺度望住我，一句說話都無講到。

我抹一抹眼淚，企翻起身，我覺得自己喊咗一場之後清醒翻好多。

「答唔到唔緊要，我知呢個問題好蠢。」我笑一笑，拍一拍身上嘅灰塵，然後自己一個行走咗。

黑犬風易 2020-09-02 23:02:43

「歐雪，中二下學期嘅暑假同你正式開始一齊，試過一齊加入話劇團、社會服務團、然後中五會考之後一齊原校升讀，中七之後各自畢業去咗唔同大學。你入咗科大，而佢入咗中大，直至到大一嘅一半，你哋就分咗手。你哋總共拍拖嘅時間係五年零五個月，亦都係『分手和頭酒』嘅過關年期。」

我呆咗咁擰翻轉身，望住講出咗上面呢一段說話嘅Kelly。

「好對唔住，我無遵守承諾，我一直都仲嘗試緊去搵你嘅過去。起初我都以為我自己只係想八掛你搞和頭酒嘅原因，但搵下搵下，我發現我係想了解你。我好想知，到底係咩人可以將你傷得咁深，深到可以有驚恐症；我好想知，你所講嘅所有分手都有一個原因，咁到底你同佢分手嘅原因係咩。

我以前成日都會周圍認識唔同新嘅男仔，啱嘅話傾多幾次就一齊。對我嚟講，呢個就係我認真去幫自己搵去幸福嘅方法。但係，係你話關係應該要認識、要了解、要坦白、要溝通，所以當我發現我自己好似有啲鍾意你嘅時候，我無俾自己好似以前咁心急，我嘗試去了解同認識你。

即使我搵到你好多中學同學去問，我所知嘅都只係你同歐雪曾經好sweet，每個人都覺得你哋可以走到最後。但係到底點解你哋會分手，無人答到我。

所以，我唔介意你鍾唔鍾意我，我亦答唔到你我哋可唔可以一生一世。

但係我可以好肯定咁答你嘅係，我係好認真咁鍾意你。」

Kelly呢一番說話，好似一盤冷水潑咗落我塊面度，令我成個人清醒咗。

呢一刻，我諗翻起偵探啱啱所講嘅一句說話：「一日唔搵出答案，你一日都前進唔到，既然係咁，我覺得有一個可以逼到你面對真相嘅人其實幾好。」

我望住Kelly堅定嘅眼神，我突然開始相信。
或者，佢真係命中注定要嚟逼我面對傷口嘅人。

___________________________________________
本章伴讀歌曲：Ｋ歌之王（陳奕迅）
多謝繼續睇緊故嘅大家支持