一連幾個post，為方便明解，我列出下面重點
1. 粵語屬壯侗語系，係一支漢化嘅百越語
2. 長時間嘅漢化，令粵語可以同漢字大致對接，但並非完美對接
3. 粵語比喻為千層酥，底層壯侗語，上層漢語，包含嘅訊息量超過普通話，亦超越漢字
4. 粵語嘅強大訊息量為香港帶嚟好大利益，發展出現代城市文化
跟住我會探討個好惹火嘅議題，就係粵語入文。但入正題之前，我會講吓壯侗語系之中，粵語嘅兄弟語言係點書寫文字。
泰語
喺百越語後裔之中，泰語相當標青，我諗拍得住粵語，只係差香港話一個馬鼻。
泰語係行印度化方向，泰文用印度嘅帕拉瓦字母書寫，屬拼音文字。
寮語
寮族就喺泰族隔離，都係印度化嘅百越族。佢哋文字都係用帕拉瓦字母書寫。
壯語
壯語同粵語毗鄰而處，曾經都被視為漢語方言。古時壯文係借用漢字，再加埋好多自創壯字嚟寫。
依家壯文已經改用拉丁化拼音字母
侗語
侗族喺廣西、貴州一帶。好似壯族咁，佢哋都曾經參照漢字去製作侗字。
如果由文字發展嚟睇，壯侗語系分成兩支，一支行印度化路線，用印度字母書寫，另一支行漢化路線，用漢字或參照漢字嚟造字。
而漢化一支當中，粵語漢化最深，同漢字近乎對接。我話「近乎」，唔係「完全」，因為始終粵語訊息量大過漢語，所以依然有粵語成份冇法用漢字表達，即係「超出咗漢字界限」。我哋時時有音無字，就係咁解。
呢個現象，成日被漢人醜化為「粵語唔夠文雅，所以啲方言字唔可以寫出嚟」。然後「撐粵」嘅大中華膠又真係傻得匀旬，去逐個字考研返個三尖八角嘅「正字」，嚟達致「粵語係華夏正音」嘅自製高潮。
有音無字嘅正確解釋，係粵語訊息量超過咗漢字所能負載嘅限度。講普通話嘅人，係好難理解呢點，因為佢哋活喺個細啲database之中，唔知道天外有天。好似二維生物係好難理解三維咁囉。
之不過，有音無字的確令到粵語書寫好困擾。一日唔解決呢個問題，粵語入文都會受好大限制。
呢幅圖就由訊息量角度，顯示咗粵語、普通話、漢字嘅關係。下個post我會深入解究。
