有啲長,但我盡量分析到冇盲點先夠膽開post。
首先,份報告唔會係單純「流出」咁簡單。
1. 一份特首俾中央嘅報告,一定會牽涉好多敏感資料同機密文件,唔會係你同我send個email咁簡單,過程一定有好多加密處理,限制邊個人、咩職位有權睇,睇過嘅一定有記錄,如果真係流出嘅其實唔難搵返條友出嚟。
2. 如果真係特首辦有內鬼,其實唔應該揀爆呢份報告出嚟。睇返報告內容,最爆嘅係林鄭話要請求中央幫政府解決疫情,仲講明係為左保皇黨嘅選情而做,然後大家就捉住呢點討論。但老實講,呢樣嘢根本你知我知單眼佬都知,只不過係林鄭冇親口講出嚟姐。特首同保皇蛇鼠一窩,黃嘅一早就知,藍嘅擺明唔介意。如果係內鬼,爆呢樣嘢其實唔係咩新鮮料。相反,做內鬼過去幾個月一定有其他更有價值嘅嘢爆。呢點另一位巴打都講左。
當然,你話個內鬼咁蠢爆完呢份報告黃左,我冇嘢好講。
3. 留意保皇黨嘅反應。蘋果係琴日22/2星期六凌晨出呢份報告嘅新聞,值到依家特首辦都未回應,包括份報告係真定假。但保皇黨同一日黃昏已經出嚟回應。葉劉話份報告會令保皇派尷尬,工聯會就話會檢討,跟住就有匿名保皇派話林鄭「冇得救」。平時嘅保皇一定係等政府有官方回應先出嚟奶鞋底,而且見到係蘋果報導通常都唔會直接回應,但今次就連特首辦都未回應份報告係真定假已經衝出嚟,間接承認左份報告係真係「流出」。
4. 同樣,特首辦到依家過左兩日都未回應,令人產生一種「份報告係堅」嘅感覺。如果份報告流出對特首辦真係一個負面消息,唔會拖咁耐都唔回應。佢要解釋有幾難,都係嗰幾句「特首同中央報告係正常機制,對別有用心嘅人趁機造謠表示遺憾乜乜柒柒」㗎啦。佢咁耐都唔回應就係想引你地鬧,越多人鬧越好,等人相信份報告真係「流出」嘅。
咁如果份報告唔係意外流出,就即係對家固意放份報告出嚟,就即係咁做對佢有好處,好處就係幫保皇拉票。
1. 中共想繼續控制香港,就一定要贏9月立法會選舉。立法會對中共嘅重要性可能仲大過特首呢個位。特首選委票本身就容易控制,基本上搞掂商家同地產商就得,上年區會結果對特首選舉根本冇影響。
2. 但如果中共輸立法會,咁無論個特首幾奶共都冇用,因為立法會議案唔夠票就做唔到嘢。(除非佢乜柒都用緊急法啦)
3. 甚至,中共輸立法會可能連商界地產界嘅特首選委票都輸埋,咁到時就真係香港獨立都似。
4. 所以,中共依家已經全面放棄林鄭,只係想保住保皇黨嘅票,然後2022換個陰毒過林鄭但又冇佢咁蠢嘅上嚟做特首,繼續滅港計劃。
5. 呢份報告「流出」,對我地立法會選情有咩幫助?答案係冇。我地可以笑9林鄭保皇狗咬狗,可以鬧咩林鄭破壞一國兩制乜乜柒柒,但係除左笑同鬧,都只係得笑同鬧。
6. 對家就唔同啦。保皇黨即刻扮死狗,講到自己係咁俾林鄭跣,自己真係變左condom咁,博同情,等人覺得林鄭差係林鄭事,唔係中共問題,亦唔係保皇派問題,然後話自己成日俾意見林鄭,慢慢塑造「我地都同泛民一樣有鬧林鄭」嘅形象,分薄我地票源。
7. 唔好忘記,我地贏區會第一係因為簡單大多數嘅制度,第二係因為警暴。立法會係比例代表制,本身已經難打。依家電視又相對少左警暴畫面,班中立淺藍偽黃絕對會唔記得左件事,然後可憐班撚屌保皇而投票俾佢地。
今次可能就係中共想翻身嘅第一步:叫林鄭「流出」份報告,然後引人將所有矛頭指向佢。我甚至懷疑,佢揀蘋果就係想佢報得大啲,用哂啲搧動人笑/鬧林鄭嘅字眼,目的就係製造空間俾保皇黨拉票。
我地要預計嚟緊半年中共繼續奇招百出,林鄭會不斷劃花自己塊面,做到自己有咁衰得咁衰。而保皇黨嘅定位將會轉變,由之前嘅「支持政府依法施政嘅投票機器」變做「俾林鄭害死嘅受害者」,吸納搖擺選民。就好似今次咁,保皇派唔會再唔出聲,或者附和港共,而係主動出嚟鬧。睇下麥美娟,今日已經不點名鬧林鄭冇良心,已經拉緊票㗎啦。
當然,成件事可能真係蘋果把炮搵到獨家料,而特首辦真係有個on9仔漏左份嘢出嚟。但就算係咁,保皇黨已經利用緊呢個機會翻身!
我建議,嚟緊我地嘅宣傳唔好淨係屌林鄭。事實上,依家好多人口講覺得林鄭做得差,但就繼續支持保皇黨。所以我地要重點宣傳保皇黨盲撐政府嘅荒謬!宣傳林鄭做得差就係因為班保皇唔識反對!宣傳送中條例政府做得咁差,搞到香港咁亂,保皇黨都有份!唔可以俾保皇黨乘機洗底!!
講多次,我地嘅對手係共產黨,唔係普通藍絲廢老!我地反抗中共係業餘,中共打壓我地係職業!我地想贏嘅話就要站係對家嘅立場思考,不斷反省同改進策略!