分享邊間開股票戶口好

眼見唔少人都會問銀行開戶好定證券商開戶好 但其實好定唔好視乎你需求
我試過喺唔同券商開戶包括耀才 致富 富途 華盛 通海 群益 招銀同IB等等

1. 耀才 個戶口已經開咗好多年 當初開係因為佣金抵(最低HKD50) 甚至目前為止都唔覺得貴 系統算穩定 又有暗盤玩 期貨產品種類都算齊 期權(股票/期貨)都齊 算係一個幾全面券商
總結: 佣金算抵 產品齊全 24小時hotline 系統穩定 入錢方便(PPS) 但佢個交易系統好一般 而家息口偏貴 所以若果你係屬於新手 佢係其中一間唔錯選擇
利伸現時耀才戶口主要用作抽IPO
2. 致富同耀才都係本地券商 而且投資產品都齊全 但佢比耀才平些少(最低HKD40) 而佢最正係個月供股票 每隻HKD10,000樓下免佣 供股list又多
總結: 佢個好處同耀才差唔多 但比耀才更平 月供股票不二之選 若果你係新手想買下股票同時又想月供股票 致富幾適合你
利伸致富主要係月供股票 而有關月供股票券商選擇 隔離post有巴打分享https://lihkg.com/thread/1859861/page/1

3. 富途(騰訊)同華盛(新浪)其實可以擺埋一齊講 基本上你當華盛等於富途
富途佣平(每單HKD15) 交易系統正 無論手機版定電腦版佢個交易系統真係幾user friendly 除咗交易之外仲整到好似forum咁可以吹下水 港股或美股都有免費串流報價 美股佣金都好低 最近仲多咗期貨同期權玩 而且佣金都係好平 不過投資產品唔夠全面 期貨/期權仲係啱啱先起步 種類唔多 主要得恆指 而且係冇交易熱線 所以斷線又趕住做trade時自求多福 孖展利息好高
總結: 無論富途同華盛都係以平佣為主 比較適合交易次數少 量大用戶
利伸富途/華盛主要貪佢個迎新優惠 吹水氣氛同個免費串流報價 但好少做trade

4. 六福 通海 群益同招銀
擺埋一齊講主要係因為我主要做期貨 而且近年主要用multicharts(MC)做 呢幾間都係support MC
如果講佣金 我相信通海(泛海/華富嘉洛)係最平 不過佢MC個平台費要預先比半年 (幾千HKD)
六福同群益唔係個個客都可以做 問完反應冷淡
而招銀主要係近期去某場講座先知有開戶優惠 佣金都幾抵 同IB差唔多 而且MC個費用可以逐用計 唯一唔好係只support中文版MC 唔太習慣
總結 佣金最平係通海 適合量大客戶 招銀MC可以逐月計 回覆幾快 適合新手/需要服務客戶 P.S. 期貨佣金間間都係網頁寫一個level 私下傾又係另一個level 可以好平
利伸 本身喺IB用開國際版MC 最近先試用通海同招銀

5. IB
用咗IB好多年 借孖展好平 投資產品非常全面 系統穩定又強大 美股佣金好抵 外滙兌換無論滙率同手續費都極抵
因為我會借孖展買港股 美股 日股等 同時我會又做options同期貨 仲會買少量bonds
所以IB係極適合我呢種人
沽其他currency買入港紙(借平息)
cover call直接喺系統落而唔使預先打電話搬倉 SC/SP 收到premium即時增加cash
可以直接做期貨options(本地唔多券商可以support 就算有都規定要電話落盤)
API基本上全開 嘜都support包括MC
總結: IB比較適合熟悉多種投資產品 又而想加大槓桿的客戶 美股佣金好抵 兌換滙率好抵 online service幾好 不過佢每月免費出一次錢 戶口唔夠USD 100K 要收月租USD10 入錢有時等2日先有效 恆指按金有markup大約40%
利伸 基本上60% portfolio 都喺IB 包括股票 期權 債券及期貨

當然永遠都有啲投資者認為銀行最穩陣(唔怕執笠) 其實香港有個投資者保障基金HKD150,000而且好多券商都會將客戶啲貨托管喺銀行到 即使間唔中都聽到有蚊型券商執笠 但投資者貨同錢都會喺到 唔使擔心咁多 銀行除咗貴 系統又唔算特別好(渣打特別屎) IPO又冇暗盤玩 所以喺銀行開戶冇咩吸引力
P.S.其實富途 華盛港股每單都平 但若果你每次買賣都細細注 次數又密 計返同耀才致富差唔多 因為呢2間以我所知同一日同一隻股票同一個方向都只計你1個交易 俗稱夾飛

無恥耀才證券反口覆舌，落返TVB廣告，舊年底明明話割席
https://lih.kg/1825638
- 分享自 LIHKG 討論區

致富好似有人係黃

全部中資行都唔應該用啦 係咪啊
IB唔錯 其他唔識

巴打 致富好似係幾黃下 不過點都好喇 純粹係分享開享資訊比大家 好似post開頭都講咗 我自己唔同目的用唔同券商 我都認同IB係好啱我胃口 無論產品定系統 都好正 不過因為佢條落盤hotline 好難打得通 所以我期貨倉唔敢擺太多落去

最平嘅 一通都無

8仔又點?

留名學野

一通平 但個系統廢到咁 用過嘅人自然會知 好易因爲咁贏粒糖 輸間廠 如果真係咁著緊佣金 我覺得巴打可以去唔同券商開戶 甚至銀行 佢地有啲真係免佣幾個月 甚至半年 唔係先收後回 係即日回

以我所知近期有一間成日賣廣告 usmart 我fd話個介面好啱香港人 而且見佢網站都有寫免佣一段時間 但唔知係先收後回定即收即回 而我之前提過嘅券商都有呢類優惠 巴打可以每間都email問下

世上係有真免佣呢回事 但有時限 如果有巴打唔怕煩 每次免佣到期前開第二間 咁個佣金成本真係慳唔少 而且基本上好多公司都可以網上開戶 幾分鐘就搞掂

總結 羊毛出自羊身上 一通收你咁平 但系統爛 除時走唔到價 喊都冇用

利伸未用過 但朋友有經驗

貿易戰下一波：美國上市嘅中國企業，即係富途等等..

8仔個收費好抵 冇記錯佢係免佣 港美股都係 但收你極平月租費用 圍返佢啲佣係抵到爛 不過巴打要留意返 佢個電話交易比其他貴 hkd280（唔肯定係咪每個order 計）而且佢個孖展利息好鬼高 所以極之唔適合我呢類借孖展嘅人
總結 覺得8仔適合啲現金戶口嘅投資者 即係有幾多錢就買幾多貨 而且最好每個月都會做下交易

買來長揸係最好用

有邊間收息夠一通平呀

正如上述巴打所講 多數銀行包括滙豐係出名貴 而且多數銀行都會收你倉租 應該半年收一次 好似 HKD250左右 不過有留意月供股票post嘅巴打 其實滙豐都係其中一間唔錯選擇
總結 滙豐適合月供股票 或者交易量少又長線嘅投資者 不過如果係長線投資者又要留意返倉租同代收股息費 有機會一年收你幾千蚊 如果有呢類投資者 建議拎實物股票 慳唔少

輝立呢間點？

巴打意思係富途有機會執笠或者除牌？其實富途有冇上市 你嘅資產都有一定保障 即使佢執笠 富途唔太啱我係因為佢始終投資產品少 而且冇交易電話 之前阿里上市 佢個系統死咗 得cs hotline

同意巴打你所講 一通都適合長揸 交易量極低 以收股息為目標嘅投資者

唔好吹奏usmart呢d垃圾

同問

輝立以我所知佢係星加坡背景 投者產品種類好齊全 而且有暗盤 都有24小時交易電話 不過佢個佣金同利息唔平 系統唔太好用 唔知有冇人試過夜晚打電話去落美股 等咗成大半個鐘都可以未落到盤
總結 輝立唔太適合一般散戶 不過你對otc產品好有興趣而又想搵人解答下 輝立係唔錯選擇 而且佢係暗盤其中一個持牌人 另外嗰兩個應該係耀才同富途

冇吹奏 只係分享多一個資訊 佢背景好似係中資 做p2p起家