官方新聞稿
八達通將可在 iPhone 和 Apple Watch 上使用 (更新)
（香港，2019年7月11日）八達通卡有限公司一向致力提供創新的支付服務，以配合客戶多元化支付需要，公司宣布今年稍後，客戶將可在 iPhone 或 Apple Watch 上透過 Apple Pay ，使用八達通支付公共交通及零售交易。公司會於稍後公布更多詳情。
更新: 八達通預計稍後於2020年推出，透過iPhone 或 Apple Watch使用八達通支付公共交通及零售交易的服務。公司會於日後公布更多詳情。
FAQ 常見問題
1. 點樣加張八達通落iPhone？
• 購買全新虛擬卡
圖1：透過銀包app購買新卡
圖2：透過八達通app（版本6.0）購買新卡
你可以買一張全新、不記名嘅租用版成人／長者八達通。留意最低消費係港幣$100，當中包括$50按金同$50儲值額。你亦都可以入多啲錢落去，最高儲值額係$3000。如果經銀包app買卡嘅話就用返Apple Pay裏面嘅銀聯卡畀錢，如果用八達通app買卡除咗可以用Apple Pay之外，亦可以用O! ePay餘額或者轉數快找數。
• 轉移現有實體卡
圖3：轉移實體卡至iPhone
圖4：轉移實體卡至Apple Watch
你亦可以用合資格嘅裝置（見Q10）將合資格嘅實體八達通（見Q16）轉移落Apple Wallet。你只需輸入卡號碼最尾四個數字（個人八達通同已登記自動增值嘅八達通需要輸入生日日期同身分證最尾四個號碼），然後將八達通卡放喺iPhone頂端位置就可以開始轉移。卡上面嘅餘額同按金會自動轉移落新卡。
2. 轉咗落iPhone之後，張實體卡仲用唔用到？
實體卡一經轉移即時作廢，而且唔可以反向轉移，即係唔可以由iPhone轉返落實體卡。八達通建議你剪爛原本張實體卡之後掉咗佢。
3. 有冇按金？可唔可以負錢？
虛擬卡同普通租用版八達通一樣有$50按金，轉移實體卡時原有按金會一併轉移。同普通八達通一樣，只要交易前餘額係正數就可以負一次錢，最多可以負$50。
4. 嘟卡畀錢使唔使解鎖或者驗證？
如果set咗做特快交通卡（Express Transit Card）就唔使用Face ID、Touch ID或者密碼驗證，好似真八達通噉直接放埋讀寫器就得，唔使開著個mon或者解鎖。
5. 可唔可以入多過一張八達通？
可以，但Apple Pay卡片數量係有限制，2017年或之後推出嘅iPhone／Apple Watch最多12張，2017年之前嘅就最多8張（卡片總數包括信用卡、扣帳卡、預付卡同交通卡，Apple Passes唔計）。留意返只可以set一張八達通做特快交通卡，如果想用另一張嘅話就要喺交易前手動選擇返。
6. 會唔會影響其他Apple Pay信用卡？
唔會。特快交通卡同預設卡係分開嘅，換言之係唔會影響到一般信用卡交易（除非你將預設卡都set埋做八達通）。例：放埋信用卡機或者撳兩下side button會彈預設卡（即信用卡），放埋八達通機就會彈特快交通卡（即八達通）。
7. 自動增值、月票、屋苑出入嗰啲有冇影響？
實體卡入面大部份原有服務都會自動轉落虛擬卡，而虛擬卡亦可以如常登記所有服務。
轉移到嘅服務包括：
• 自動增值服務
• 八達通日日賞
• 屋苑／商業大廈／校園門禁系統
• 校園管理系統
• 屋苑／商業大廈／校園專用巴士服務
• 大家樂Club 100
• 港鐵乘車優惠及服務（如全月通）
轉移唔到嘅服務包括：
• 停車場時租／月租服務
8. 點樣增值？
圖5：透過銀包app增值
除咗插卡式嘅增值機之外，任何其他增值地點（例如7-Eleven、Circle K、百佳惠康等）都可以為Apple Pay八達通增值，好似普通八達通咁將部機靠近讀寫器就可以完成增值。另外亦可以用Apple Pay裏面嘅銀聯卡增值（見Q9），或者經八達通app用O! ePay／轉數快轉賬。
9. 可唔可以用信用卡增值？有冇手續費？
可以用Apple Pay裏面嘅銀聯卡增值，每次最少增$50。銀聯卡增值冇手續費。
10. 有邊幾代iPhone／Apple Watch支援？
圖6：支援機種一覽表
• iPhone 8或以上
• Apple Watch Series 3或以上
• 日本版iPhone 7／Apple Watch Series 2
XS／XR或以上設有慳電模式（同低電量模式冇關，唔好撈亂），差唔多冇電自動熄機之後五個鐘內都用到特快交通卡。
11. iPhone同Apple Watch可唔可以用同一張卡？
唔可以。每張卡同一時間只可以喺一部裝置上出現，如果兩邊都想用就要有兩張卡。
12. 會唔會畀人嘟走晒我啲錢？
八達通機要商業登記，O! ePay手機拍卡過數都要登記咗卡號碼先得，而且每次拍卡畀錢都會第一時間通知同震機，比起實體八達通更勝一籌。
13. 唔見咗部電話點算？
可以經Find My iPhone鎖機，張卡會即時停用。你亦可以delete咗部機上面張卡，以防萬一。當然，你部電話要上到網，熄咗機或者冇網就乜都做唔到。
14. 換電話、洗機會唔會冇咗張八達通？
唔會。所有交通卡都係跟你嘅Apple ID，就算delete咗都可以隨時restore，不限裝置。每張卡嘅餘額同按金都會永久儲存喺iCloud，除非你退卡（見Q15）。你亦可以喺同一個Apple ID嘅iPhone／Apple Watch之間轉移。
15. 點樣退卡？
可以經八達通app退卡，按金同餘額都會退返畀你。你可以揀經轉數快退落銀行戶口，或者直接退落你嘅O! ePay帳戶餘額。
16. 支援邊種八達通卡？
• 不記名租用版成人／長者八達通
• 個人租用版成人／長者八達通
必須印有9位數字嘅八達通號碼（8個數字加1個括號內數字，例如12345678(9)）
以下個人八達通唔支援：
• 小童個人八達通
• 員工個人八達通
• 已加入公共交通票價優惠計劃（自行購買的月票計劃除外）的個人八達通
其他唔支援嘅八達通：
• 銷售版八達通：包括特別版八達通、別注版八達通、迷你八達通、八達通飾物等
• 銀行聯營八達通：例如Citi嗰張（入咗落Apple Pay只會當係信用卡，冇八達通功能）
17. 幾時出呀屌你老母？
2020年。
Octopus on Apple Pay 等候區系列
等候區1：https://lih.kg/1331975
等候區2：https://lih.kg/1397807
等候區3：https://lih.kg/1532732
等候區4：https://lih.kg/1574280
等候區5：https://lih.kg/1584032
等候區6：https://lih.kg/1626795
等候區7：https://lih.kg/1668375
等候區8：https://lih.kg/1694368
等候區9：https://lih.kg/1760347
等候區10：https://lih.kg/1775581
等候區11：https://lih.kg/1785195
