1000左右，民陣喺龍匯道中信對出大台宣佈話佢地準備向警方申請不反對通知書，範圍係「龍匯道行人路」。所以果時就有意識，發生啲咩事上到龍匯道行人路就應該安全架啦。
1230左右，有人提議喺龍匯道同添美道迴旋處設留急救站，發夢見到啲手足當時搭咗帳蓬，而且都有貼白底紅色十字架示意果啲係一個急救站。而我就喺夢度同朋友一齊整理物資（後尾睇返連登po，呢個係被定義為物資站）。
1500左右，急救站已經有4-5位義務急救員喺度。
之後已經唔知時間
喺立法會門外方向聽到好多砰砰聲，果時都未知咩事，但係冇耐啲人就讓路比一啲隻眼比人噴咗嘢要洗眼，膊頭/背脊比人噴咗嘢要沖身既傷者嚟到我地個急救站。印象好深刻係有個個頭頂不斷流緊血，三個急救員不斷壓著佢傷口好耐都止唔到血既傷者。果刻好想喊，點解呢個年青人要受到咁既痛苦？
而同時間，我地個物資站都不斷向立法會門既方向傳頭盔，生理鹽水，長遮，濕毛巾，口罩等既資源。
但傷者數量愈嚟愈多，所以就有人提議非急救員既人就離開個物資站，留返多啲位嚟安頓傷者，所以我就同朋友行返落地面，繼續做人鏈幫手傳物資。但唔駛幾分鐘，啲人就開始後退，同埋都開始聞到催淚煙既味，即刻戴返眼罩同搵濕毛巾蓋嘴鼻，好fail既係一戴咗眼罩眼鏡就起哂霧，咩都睇唔到，所以只好跟著啲人潮退去中信停車場。
入到停車場，好多人都除眼/口罩洗眼，而我自己就成個鼻腔都係鼻水，整理完之後，已經聽到去探路既手足話呢度冇路走，要出返去添美道/入中信，但果時街上實在濃煙瀰漫，就同咗個fd喺隔離入返中信（中信側門，冇鎖）。
入到中信就係另一個惡夢既開始，入到去我地不斷上樓梯，上到二三樓喺窗邊望吓出面發生咩事，發現個警方既線已經推過咗頭先發夢留守既救護站，即刻好擔心到底果度既急救員同傷者點。
但魂都未回，已經聽到下面嗌話好多人入緊嚟，快啲逼上樓上既聲音，所以中信既人就慌亂但有秩序地愈上愈高。在場都好多人呼籲唔好再企喺窗邊睇嘢/拍片啦（所以當日未必真係有好多片），而冇耐其實都聽到喺度大叫話需要哮喘藥，喺一/二樓嗌到四/五樓都聽到。
當我地上緊去既時候，忽然聞到大廈內都有催淚煙味，我地果時上到五樓，發現咗啲逃生樓梯根本通唔到出去，而且都有好多人喺逃生樓梯衝緊上嚟五樓。大家都話企埋啲，等多人啲可以入到中信，我留意到前面有個我估10尾既後生仔個頭爛咗，滲緊血，佢啲fd問佢有冇事，佢仲笑笑口咁話冇事喎。好多冇眼罩/只係戴著普通口罩既人都好辛苦，我見到另一個後生仔連開眼都開唔到，所以就侍著自己有眼鏡同濕毛巾頂到少少比咗個3M眼罩佢，希望佢冇咁辛苦......當啲煙味愈嚟愈濃，果刻有人提議全部人踎低，大家都諗唔到咁有冇用/sci唔scientific，跟著做，果吓真係好絕望，好似等緊死刑咁。
如果克警繼續向中信放催淚煙，或者封鎖哂所有出入口入嚟抄哂我地身份拘捕我地，我地都係死路一條。
後嚟聽到啲人話搵可以喺中信橋果度走，我同fd就覺得再喺室內一啲都唔安全，就去橋果邊，點知一有勇士衝出去，啲克警就又放催淚彈。你問我係班克警癲咗係咁放，定係見到人突登放其實我已經分唔到。一放煙，前面既手足又唯有閂咗中信橋，啲人又後退返入中信。正當好手足無措既時候，有喺中信橋門既手足大嗌，趁依家啲煙散緊，要走就趁依家。果時冇再猶豫啲咩，唔想再留喺個圍城度，真係唔知下一刻啲克警會對中信做啲咩，所以就頭也不回咁衝咗出橋。一出到去覺得好撚攻鼻攻眼攻喉，但出到去都比留喺室內有希望。我地應該係比較早出去果班，所以都可以好有秩序咁跑到去差唔多統一中心。但當我地望返轉頭果陣，真係唔知係啲風吹過嚟，定係我眼同鼻殘留著一啲催淚氣體，我望到眼濕濕，一呼一吸都係催淚煙既味。
好抱歉，我冇咩嘢可以證明我既夢境，但係果種被絕望吞噬既感覺與見到勇士血淋淋傷口既傷痛感，真係依家回憶起都心有餘悸......但係我都好感激咁多夢入面既手足，喺咁慌亂危急既情況可以守護相助，盡量保持鎮定，冇你推我撞發生任何人踩人既事故。
