[Day 13, 上海, 138小時47分鐘, 8968公里]
0600 晨早起身再沖多次涼(大佬,不知幾耐冇沖過涼呀),改唔到去上海既班次,唯有死死氣咁搭返七點既車。我地未攞飛既關係,就要去排隊,但係方便既野上面例如自助取票機我地一定唔係中國人,結果就要去排隊攞。之後衝左上車係中國最新既復興號,哇,同傳說中一樣,搭完之後即刻有痰呀。
1140 去到上海,好多年前已經去過,係全中國最唔鍾意既城市,話就話經濟發展好好,我心諗...去旅行我理得你發展成點啦?上海外灘夜景...香港唔好睇D?好多朋友都話去旅行永遠唔睇夜景,因為香港都睇慣啦...結果見左個朋友,食左少少上海菜,後面個個係蟹粉包,入面係所謂蟹汁可以吮,不過除左少少蟹籽味,乜都冇,同蠔油冇蠔味差唔多。
係外灘附近行下,比幾年前多左既只係新紅基,恆基既商場。
1700 留左一陣就返返去上海站搭火車返香港啦。直通車係行兩地兩檢,我地係上海就出左中國境,所以沿途只能夠留係車上面。係上海站上車,架車中途停金華、株洲、廣州東,後面有一部分只去廣州東,而兩部分會係廣州斷開。
今次瞓既係硬臥,六個人一個間隔,不過就冇門既。上臥都好高下,應該有米九,所以爬上去都幾辛苦。我咁懶就爬中臥算啦。
一如既往,同係歐洲俄羅斯一樣,佢地好鍾意一上車就收走你張飛,落車還返,但直通車冇中途站使乜收來提乘客落車呀?
車上面比較多嬸嬸同伯伯,大概係佢地唔想搭飛機慳錢又有時間先會咁樣搭二十個鐘。佢地講既係鄉下話,點知成車人都揸住香港身份證既?!同車上面既人傾過下,原來平時好少人搭,一個人可以霸足成間包廂,點解我個日全車滿座咁濟呀?連架車都唔鍾意我?當晚去左餐卡食飯,晚餐7點開始,叫左幾碟廣東菜,不過不失。寫下日記,去到十點架車就熄燈,所以都去瞓覺。諗諗下其實呢度同俄鐵都幾似,架車有「冷氣」,但入面焗到難民營咁,個個係車上面寫杯面,乘客唔會講英文,車長都唔會講英文,你唔識,指手劃腳啦!第二朝瞓醒已經入左廣東,出面係韶關,風景都唔錯,但諗起當日就返到香港,又興奮又落寞。出面有手推車攞榨菜米線,一樣中國味,咸!
係廣州停左一個鐘,架車正式出發返香港啦!搭直通車係我自細既夢想,每次搭火車個時見到架車可以飛站就覺得好正,而今次終於可以搭住架過夜火車搭一晚返來香港,個感覺特別興奮。六星期前自己一個去機場飛,再去到中間幾次既相見與別離,一趟特別既旅程正式完結。完結唔再係係機場,而係上水、大埔、沙田。雖然平時搭火車見到架不停站列車好燥底,但係香港都可以係普通鐵路上面有長途列車其實好有趣。最後,準備落車了,回到家了!
[Day 14, 香港紅磡, 158小時16分鐘, 10959公里] 記敍篇 完