[多字少圖遊記] 由聖彼得堡一路搭鐵路返香港

小弟第一次打遊記，有咩寫得唔好請高抬貴手，多多包涵。

事緣啱啱四月尾左右同一個friend去左搭西伯利亞鐵路，由聖彼得堡出發一路搭鐵路返到來香港。

Day 1,2: St Petersburg
Day 3,4: Moscow
Day 5: Kazan
Day 6: Yekaterinburg
Day 8: Krasnoyarsk
Day 9: Irkutsk
Day 10: Chita
Day 11: Zabaikalsk
Day 12: Harbin
Day 13: Shanghai
Day 14: Hong Kong

至於點解今次想寫遊記，純粹因為覺得旅行唔想再只為打卡到此一遊，用遊記分享吓行程所見所聞。

因為電話垃圾，同埋唔識影相，去個時又冇諗過要寫遊記，圖真係好少好少。有部分既圖應該會係google或者同行友人借我用。

Lm

Total洗咗幾錢？

Day 1
抵達聖彼得堡
搭飛機去到聖彼得堡，上空景色同香港之外大部分地方一樣，都係遼闊既土地。俄羅斯出名地廣，但相比歐洲少好多綠色。就快降落，望落去見到幾多矮樓房同工廠，由比利時飛去既我即刻有種舊既感覺。係機場連唔到Wifi，現代人冇水冇野食唔緊要，上網真係唔少得，而友人整左張MTC電話卡，我就整張Beeline，廢事一齊冇得用啦。


七十年代、蘇聯社會
一出機場，去搭巴士。上車司機唔賣飛，用塊破璃板隔住。開車之後有個乘務員逐個逐個問乘客攞錢，比左張票。沿途望對面路，發現好多車都好殘，例如好多塵係車面，唔光滑既感覺。我唔係好熟車，但個款都覺得好舊咁。搭完巴士轉地鐵，入口唔似香港咁突出，只係好似普通隧道。聖彼得堡地鐵深就人人都知，但原來每一條電梯都會有個人專門負責監察，佢地既重要性應該同港鐵月台舉牌既人差唔多，創造工作職位就係咁簡單。地鐵大部分一卡卡分開，而車站都同上網睇既差唔多，真係懷疑自己跳左入歷史書。上左地鐵，佢加速得好快，差少少企唔隱，而我隻耳仔都感受到車輪同路軌既摩擦，唔知佢地地鐵車長有冇職業性失聰補償呢？






歐陸風格城市
上返地面，見到既係高返少少既建築，建築係歐陸風，簡約淨色既外牆，據說聖彼得堡係某位君主去完歐洲返去模仿。Check-in完hostel之後出左去附近行，去左St Isaac’s Cathedral。教堂唔同天主教，俯瞰唔係十字，而係長方形。內部主要係多油畫，相對少馬賽克。唔講咁多，大家自己睇。


俄菜 我只識羅宋湯
去食晚飯，因為食野唔太講究，求其搵左間餐廳食，梗叫羅宋湯啦！佢唔似香港既紅湯（咁當然啦，唔係點叫俄國/烏克蘭菜式），佢碗湯冇咁多款菜，我只係記得紅菜同洋蔥，但就冇蕃茄。而最特別係上面既sour cream，味道似少甜既yogurt，攪勻左會有奶味，都幾正。

Day 1完
(開頭寫得唔太順，同埋好多相都冇影到，請體諒吓)

你叫個個好似係紅菜湯

我淨係知佢係Borsch

Lm

Day 2 聖彼得堡

去俄羅斯食俄菜唔係重點。要俘虜一個人，首先要俘虜佢個胃。美國就好成功放左KFC係俄羅斯，聞名不如見面，食完雞就知佢既好味名不虛傳。佢既皮冇係香港烤得咁厚，雞入面亦冇香港麥記咁油，雞肉唔韌。而佢地既Pancake比較薄，邊位係脆既，味道同熱香餅差唔多。


食飽出發去冬宮，冬宮入場費700盧布，而且唔使排隊入場。學生雖然免費入場，但就要排隊，排左成八個字先入到去。入到去仲要放低曬袋同大褸，再過安檢，唔講真係以為普京係入面呀！冬宮係世界四大博物館之一，佢以前係皇宮，而家改左做博物館，所以一次過滿足兩個願望。入面既希臘雕塑比較多，而皇宮…同歐陸一樣，金碧輝煌，複雜到乜都唔記得。成個冬宮我覺得最特別就係下面個馬賽克畫，而圖入面見到咁多人，冇錯，真係好多人，所以話中國人遍佈全球呀。




下晝諗住行下市區，路過喋血大教堂。仔細睇佢個牆，會見到唔同顏色既磚頭。

本來諗住去夏宮，點知太遠發現去唔切，唯有搭下地鐵遊車河。聖彼得堡地鐵出名既站少D，只去左Avtoto站。下面係站尾既壁畫，亦因為佢我發現俄羅斯好多馬賽克藝術。用吊燈既關係，好多站都會有古典既感覺。





你冇睇錯，呢兩張相仲係聖彼得堡。一上車即刻好似返返廿一世紀，見返光猛寧靜既車廂同間隔分明既椅。所以我會形容聖彼得堡係一個有舊有新既城市，有地方好舊好殘，亦都有地方好新。

下篇 正式開始鐵路之旅

冬宮學生都唔使排隊，去買飛嗰度出示學生證就得
去咗幾次，冇記錯的話

留名支持

lm

我去個時賣飛個度有左右兩條隊，兩邊都要排。巴打好熟俄羅斯咁？

係市區行個陣，我地比兩個街道藝術家做埂既野吸引住。佢地表演埂噴畫，用唔同既噴料，再用圓形既容器整個圓形既邊界或者刀片剖成唔同既幼線，模仿光芒。成個過程大概三分鐘就畫完，都幾犀利。

離開之前送埋幾張聖彼得堡既相先：St Isaac Cathedral同Kazan Cathedral同冬宮


點解要搭西伯利亞鐵路？
上網見到好多人搭西鐵，但都搵唔到好多原因。最開頭個原因都幾簡單：威囉！疊馬囉！比自己試下新野囉！話曬係全球最長既鐵路，就算今次只係坐支線去北京，都可以感受下坐火車跨越國界、跨越歐亞，感受同香港既距離。至於佢有咩咁特別，就下回分解。

紅箭號 其實冇咩特別啫
準備迎接呢個旅程第一架火車，亦係傳說中全俄羅斯歷史悠久而質素最高既火車。雖然以前我搭過過夜火車，但每次同朋友去都係包房，換言之今次係第一次同人係火車夾房。上車前一直幻想會有個點既室友，至最後...當然唔好FF咁多啦！俄羅斯同歐陸一樣，都係直接去月台，2355開車，我地大概2340去到月台，入個站之前要做安檢。去到列車門個車務員會檢查Passport。因為我地上網㩒左個e-registration，我地就唔使去車站印飛，而事實上我係聖彼得堡同莫斯科既火車站都見唔到有自助既機。點知個車務員好似口吃咁樣彈左幾個英文出來，話我冇比錢喎！佢一方面叫左上頭，再叫左上頭個上頭，查左成疊紙，結果佢話"You can board the train, next time you... er... er... er..." 究竟佢想講咩，係一個迷。上車好焗，都未執好野已經全身流曬汗，但所有床都舖好曬，床單好乾淨既感覺，而被係冷氣被既質地同厚度。至於室友，叫左你咪諗咁多，所以兩個俄叔已經坐定定等我地。我擅住個喼，其中一個望住我指左佢椅底，示意我可以放底，呢次係全程車第一個亦最後一個交流。開車冇耐，開始有少少涼風，而車務員來好努力用英文問我地食咩，我地話第朝食雞意粉，於是就瞓啦。

第二朝8點就準時到莫斯科，通常搭過夜火車最快就係早到，而落車前佢就比左早餐我地食，連埋茶或者咖啡。抵步之後，莫斯科個感覺冇咁繁榮，反而個政治氣氛重少少。而俄羅斯人普遍都覺得莫斯科人係特別冷酷同睇唔起人（係後來係貝加爾湖個導遊講）。


放低左行李係Hostel就行左去紅場。莫斯科最核心既景點就係紅場，而去到紅場所有野一眼望曬。克里姆林宮逢星期四唔開，所以呢日入左去先。因為入面係真既政府，所以安檢都幾嚴下，順帶一提，俄羅斯安檢會放電話係個金屬檢測門隨離張枱，然後再人行過。入到去只不過係空曠版既紅場，但好多保安唔比亂行，過馬路要跟返條班馬線。入到去見到全世界最大支而冇用過既大炮。路過Dormition Cathedral入埋去The Cathedral of the Annunciation。入面個結構唔同普通教堂，分隔左好多間細房。





出返紅場，近睇 St Basil's Cathedral，見到佢個牆物唔係磚，只不過係用白色油油成一格格。而個洋蔥頭亦冇想像中咁細緻，表面好平滑，有種童真既感覺。



之後去左隔離個GUM百貨公司，大家入去就唔係為左行街既，純粹睇下點樣一間百貨公司可以融合古典建築模式，個天幕就...同新城市差唔多啫。

F5

食左野因為前一晚搭過夜火車瞓得太少，就返去Hostel瞓個覺。個時雖然4月，但是出面就成廿度，入到房更加熱，職員都話平時唔會咁熱，冷氣又冇，好難先瞓到。抖夠之後出發去睇馬戲團。莫斯科有兩個馬戲，我就去左比較遠既Moscow State Great Circus，去之前上網買定飛，可以自己揀位坐。個題目叫做Sandy Tale，個故事主要係講埂一個探險家係沙漠揾到個神燈再比不法商人搶最尾搶返既故事，中間穿插唔同動物同人既演出。個人覺得最精彩係男女主角愛得如痴如醉，用繩吊左一個人隻手，係冇其他繩既情況下係高空用單腳吊住另一個人。人既部分同預想差唔多，打關斗，爬鋼條，拋樽。動物既部分比較多花款，例如揾左馬騮行單捍，其中一隻唔想被蒙眼自已除左個眼罩。仲有用馬來跑圈，人就係上面打關斗。整體來講，個配樂係唔錯，而表演都同預期差唔多。

Day 4 莫斯科
唔知係咪淡季，我間青旅唔係好多人住，六人房只係得三個人住，仲要全程冇見過個室友。呢一晚亦係最後一晚住青旅啦（個時以為），個時諗起之後十日都要係火車度瞓都幾焦慮。

晨早出發再去多次紅場，仔細睇埋另一邊，去左State Historical Museum。上回提到St Basil唔係用磚頭，但呢到就如假包換既磚頭。至於佢前面兩塊牌，可能為左之後既抗戰紀念日啦（5月9日），克里姆林宮對出紅場都用椅砌成俄羅斯國旗。



莫斯科另外一個著名既地方就係地鐵站。每個地鐵站都好大分別，大部分人既第一印象可能就係兩邊月台，中間好空曠，防空洞咁，再加幾盞吊燈，但寶際莫斯科地鐵非常多人，地鐵兩分鐘一班，每個站既設計都截然不同。


Mayakovskaya: 簡約開揚



革命廣場: 最出名係好多銅像，包括軍人農民老師，傳說摸雞會有財運，摸狗都會有好運。



Komsomolskaya


Kievsky 壁畫



而我唔記得咩站啦："拼圖"、"平面"
：

高汁留名

前一篇寫到地鐵一日遊，搭搭下上錯左車，去左呢個站。我個人就覺得莫斯科普通站太古典同複雜，我都唔太識欣賞。去到下面呢個站發現空曠既格仔站，我覺得個種簡約唔錯。



跟住又好彩唔好彩搭錯車去左另一個站。哇，好潮呀！友人形容佢為金屬味好重。見到個站有個顯淺既主題，其中一個係鐵路既發展，另一個係數字，月台有好似東鐵既燈，個種淨色既感覺令我諗起慕尼黑既地鐵，而個一刻我差唔多忘記左我係俄羅斯，因為個站好現代，可能係用光管同夠光既關係啦。




所以佢個種文化發展唔錯，發展現代設計，入閘可以用信用卡既先進，而佢亦保留以往火車站既設計（當然可能砍掉重練仲費力）。


揾左間西班牙餐廳食完野就去搭火車，正式進入西伯利亞鐵路之旅。



呢架火車質素唔錯，佢都算係豪華列車既（002號，而通常號碼越細質素越高），車上面有WI-FI，係咁多程俄羅斯車唯一一架有。上車前鋪好曬被，而枕頭就放左落個杏色索袋，攞出來入袋就用得。枕頭夠軟，張被夠滑夠厚。而呢架亦係全程唯一一架可以免費係車廁所入面沖涼。因為我地前一日係Hostel沖左，就冇特別試。

我地瞓二等，同兩個人夾房。上車前仲期待有溝通到既背包客，而實際上當然係兩個俄叔啦！中間車務員來講野落車食野，佢見到我地唔識聽俄文，對住我地歎左口氣走左！佢一分鐘後返來，仲帶左個女翻譯，雖然之後聽到佢地一班人係隔離房講英文，然後就冇然後啦。