食韓國嘢就要接受, 佢地真係餐餐都食泡菜, 之後先其他小菜(麻油菠菜、芽菜、醬燒薯仔、黑豆、滷蛋), 可能佢地平時整定呢啲小菜, 煲個飯, 煎條魚就當一餐架喇。好似我去食炸豬扒配水冷麵, 都有泡菜, 因為個作用就好似醃黃瓜咁消滯。佢地啲湯, 通常會用銀魚仔同昆布做底, 之後再落肉類蔬菜同醬。同埋煮嘢好鍾意落麻油, 粟米糖漿。咁本身人地食嘅嘢係咁, 自然輸出去都係咁, 另外因為歷史關係, 有好多外來飲食文化, 例如芝士、炸嘢咁樣囉(部隊鍋就係美軍物資, 大家都知架啦), 後生仔女係鍾意食香口嘢架啦, 同埋韓國人考唔到入公務員同三大公司, 就係開炸雞舖, 因為門檻唔高嘛。而且嚴格嚟講, 辣椒都係哥倫布發現新大陸嗰陣美洲傳去歐洲, 再傳入嚟亞洲tim, 但鍾意食辣已經成為人地文化之一喇嘛