[簡介/遊記] 智利Patagonia、復活節島、Atacama沙漠+阿根廷北部峽谷彩虹山之旅

要帶咩衫褲去？

其實睇你去邊同咩時間去。（廢話）

伊瓜蘇嗰啲真係可以好濕熱，羽絨完全冇機會著。
但去到阿根廷、智利南部嘅Patagonia、北部一啲高海拔嘅地方，真係可以凍到幾度甚至零下，再加埋啲喺山上面/空曠嘅地方，啲強風吹埋黎，真係可以好凍。

所以，我今次去南美同之前去落緊雪嘅地方，帶嘅衫褲鞋襪都唔差好遠。

喺凍嘅地方著衫都唔洗點教，一定係洋蔥式：
1. 貼身嘅base layer e.g. ultrawarm、雞仔嘜
2. 衛衣
3. 羽絨
4. 防水防風外套 e.g. gortex

大致上係咁著。


去咁長旅行，好多人都會問點洗衫？
我自己就比較唔捨得洗錢攞出laundry洗
加上唔係度度都俾你搵到laundry
所以我係自己手洗嘅

但成日轉酒店，啲野點乾得切？
所以去旅行之前都特登去買啲快乾衫褲
（快乾可以成日洗，咁就可以帶少好多行李）
其實我啲gear多數都係喺decathlon買
平得黎啲質素又算唔錯
喺度想介紹少少野

1. 快乾底褲，購自decathlon

衫褲可以好耐都唔洗，但底褲就唔得喇
我頂多著三日都要洗
呢啲底褲洗完，一晚一定乾到
男女裝都有

2. 快乾Bra

呢樣我覺得仲緊要過快乾底褲
因為平時啲Bra有鋼線，想扭乾都好難
一係就扭到個bra變晒形，一係就扭唔乾

呢個uniqlo bra係就係冇鋼線，唔夠承托力
但勝在可以點扭都得，擺落背囊又好慳位
真係幾正架

3. 快乾毛巾

住Hostel好多時都未必有毛巾俾你。
呢種毛巾應該好多人都見過
又好索水，又好快乾，又可以摺到好細
除左decathlon，好多牌子都有出
不過decathlon就好平，幾十蚊一大條

4. 風筒

有時啲hostel真係會冇風筒
如果你係女，細細地帶一個去都幾有用。
呢個風筒細細地，幾方便攜帶，
吹落又唔會旱，我覺得比一般風筒都好用
都好似係兩百幾蚊

機票幾錢？

i mean 純來回南美

去程 飛聖保羅 3800
Buenos aires返香港就6200

加埋都成皮野

錢

1. 碌卡 vs 撳錢 vs 兌錢，點揀？
先唔講邊樣最扺，最唔扺就一定係撳錢

所以如果你只係黎兩三個禮拜，唔洗諗，一定係帶美金黎兌定啲旁下身，之後有得碌卡就碌。

以下係針對啲去長旅行嘅巴打

先講碌卡
首先，你要有張Plus/cirrus嘅提款卡
喺南美攞住張銀聯真係你有一億喺入面都冇用

重點係：
喺atm撳錢，多數手續費都好高
高得黎，仲要每次限你最多撳幾錢

到碌卡同兌錢比較，我個人覺得碌卡扺啲
（可能我冇特登搵啲好扺嘅兌換店）
加上碌卡，如果有1-2%回贈，一定扺過兌錢


我只係去左巴西、阿根廷、智利
續個國家講下。

巴西：
我撳過一次機，冇收手續費，好扺

其餘好多時候都有得碌卡，好方便

阿根廷：
呢度撳錢啲手續費貴到痴線
貴唔係問題，但佢限你每次只可以撳好少

我地試過好多好多間銀行，間間都差唔多
每次最多撳4000Arg peso (~800hkd)
但收你416Arg peso(阿根廷銀行收你)
你計番係多過10%
仲未計香港銀行收你嗰20定40蚊。

雖然都係好多地方有得碌卡
但有時租車自駕/報團，碌卡係要俾多10-15%
所以你自己計下數，睇下點樣最扺喇

有時候如果唔係太大筆，我都要動用啲美金
因為兌錢真係可以慳番好多好多


智利：
呢度撳錢手續費都貴
不過佢俾你一次撳好多
我撳過兩次，兩次都係二千幾港幣
佢每次收我大概60-70蚊
除番大概2-3%，我覺得可接受。

都係一樣
報團/租車，好多時都要收多10%

如果去復活節島，好多餐廳都只收現金。
不過當地都有atm

打到1999
有咩唔明就隨便問啦

有冇留意阿根廷啲找換店收唔收歐元?

下個月會去一個月 阿根廷智利玻利維亞秘魯
係唔係帶美金去到時唱錢就夠（會帶信用卡）無plus提款卡

嗰陣唔夠時間落埋去玩
On99坐左日車去atacama留左一日咁上下就要上返去
好後悔

當然收

美金、歐元最common

玻利維亞、秘魯我唔敢講（未去過）
不過阿根廷、智利，好多地方都可以碌卡

你玩一個月
我覺得帶美金、碌卡都夠晒。

住宿又多數上網book(碌卡)
帶兩千幾蚊美金乜都夠啦
不過如果一條友去就小心喇

真係唔夠美金
去到最後咪揀啲有得碌卡嘅餐廳入




Btw，一個月四個國家，幾趕下

好Sad喎
Atacama我覺得可以玩三、四日
幾多野睇

係，嗰陣有啲事臨急臨忙改plan，得兩三日時間但揀左落chile
應該留係秘魯去其他地方玩會好啲

喺南美最棘手就係啲景點太遠
淨係搭車都搭你一日

阿根廷同智利都係路過下 patagonia冬天去無咩玩留幾日就走 智利淨係去acatama過uyuni
大城市都係留一日
難得去一次揀晒想去既地方睇多d

預左一半時間行山上馬丘比丘同亞馬遜

本身都諗過去Amazon
不過自問唔係超中意好wild嘅人
嗰啲環境仲要好濕熱。

又同老婆一齊
（女人更加怕呢啲野外嘅生活）

又驚去到淨係on99喺度睇昆蟲
所以最後都放棄左

祝你有好野睇釣到食人魚

錢
去長旅行啲錢點安排？
（其實之前都打過類似嘅野，未睇過就望下啦）

如果去長旅行(多過一個月)
啲錢點安排都有少少策略
因為你點都可能將幾萬蚊擺喺身

南美嘅治安點都唔稱得上好好
帶住幾萬蚊喺身，真係會好大壓大

我講下自己係點安排：
原先我地係打算去五個月旅行
但屋企有啲事，最後去左~兩個月就完左。

我地兩個人去，身上帶左2500Usd
即係大概兩萬蚊，其實好似好少
但去完兩個月旅行，都仲淨番大概萬六蚊

我地冇帶好多現金喺身
因為始終覺得，蝕幾百蚊手續費俾銀行
仲好過喺巴西俾人一野劫左幾皮野
所以都係安全第一。

入正題：
首先，一定係碌卡
(記得帶多過一張信用卡去)
其實大部分時間都可以碌卡
住宿又九成碌卡、入餐廳又係
買長途車飛、機票又係
所以淨番嘅就係搭車
(我覺得碌卡個rate一定係最好，比起兌/撳錢)
(去旅行前申請定張靚卡啦，筆數唔細架)

記得搞定晒啲網上理財、繳費靈
如果唔係喺國外找唔到卡數又要煩到屋企人
同埋千祈唔好用公共wifi搞卡數!!
我喺南美都俾人hack左張卡
搞到俾銀行Cut左張卡，好麻煩

其次，就係撳錢
黎南美一定要申請定張Plus/cirrus
唔好理手續費幾多，起碼你撳到錢先
（攞住張銀聯唔洗旨意撳到錢）

唔洗撳好多，都係有個錢旁下身
有時用黎搭下巴士。

最後，先係用美金兌當地錢
始終美金係一去不返，洗左就冇
對我黎講係用黎旁身
如非必要都唔想用。
(不過喺阿根廷撳錢手續費成十幾個%，所以我都忍唔住用左一二百蚊美金)


以我估計，我用呢個策略
應該玩五個月都仲會有美金淨

藥物
去南美/非洲旅行之前(尤其長旅行)
最好去一去衛生署嘅旅遊診所
同醫生傾下你會去邊，玩幾耐
醫生會建議你要打咩針/帶咩藥去。

診所嘅booking都幾full
最好提前兩三個月book。

其實啲藥/針主要都係針對蚊嘅傳播疾病
另外就有一隻高山症藥Diamox



1. 針對蚊傳播嘅疾病：
-黃熱病 Yellow Fever (打針)
中左聽講死亡率都幾高下

去南美好似淨係玻利維亞入境隨時會check
(我冇去過)
其他地方都唔會check
不過如過打算去亞馬遜嘅巴打，最好打定啦

另外去非洲睇動物(例如坦桑尼亞、肯雅)
都好似一定要打？


聽講有啲國家入境要check針紙
最好擺喺passport入面

有效期：終生受用

-瘧疾 Malaria (食藥)
瘧疾係冇疫苗打，所以只可以食藥
聽醫生講瘧疾嘅藥都幾多副作用

佢俾左兩隻我揀，價錢差超遠，好似有10倍
最後因為貴嗰隻出現副作用嘅機率低啲
(唔係冇咁嚴重，係出現嘅機率低啲)
所以揀左貴嗰隻

-日本腦炎
Japanese Encephalitis virus
呢個唔記得咩原因冇打到


詳情可以睇：
https://www.travelhealth.gov.hk/tc_chi/travel_health_advice/anti_chemopr.html




*****不過醫生都話：
最緊要唔係打咩針/食咩藥
而係做好防蚊措拖
E.g. 用>25%DEET嘅蚊怕水、著淺色長袖衫褲等等


2.高山症藥物，Diamox

佢係suggest啲上高過3000m嘅人就要食
食左唔等於冇事，唔食都唔一定有事
仲有好多因素影響你會唔會有高原反應
~飲得夠唔夠水
~夠唔夠瞓
~有冇作傷風/感冒
等等

自己上網望下啦：
https://www.chp.gov.hk/tc/healthtopics/content/24/34622.html

高原反應一發真係邊度都唔洗去
所以去到高原真係要有良好生活習慣

我自己食完冇乜大嘅副作用
只係隻手好麻痺(我同老婆都係)
同埋超級尿頻
唔點飲水都要狂痾尿
直程要帶定個樽喺身邊隨時痾


3. 傷寒Typhoid
呢個都係經被屎contaminated嘅水/食物傳染

有疫苗打，可預防3年

4. 甲型肝炎 Hep A
同傷寒一樣傳播途俓
亦係打針預防



整體上，我打完以上嘅針，都冇乜唔舒服。

樓主打字排版排得好靚好有心機
一大堆資訊我都睇得曬

睇完樓主個post真心想plan辭職去南美

橫掂都係打
盡量排得好少少等人地都有啲心機睇下

雖然我自己睇落都係覺得1999