連登有無佛教徒？
https://lihkg.com/thread/68870?ref=ios
- 分享自 LIHKG 討論區
呢個post好撚高質
用左4個鐘先睇到辯經
分享少少自己經歷先，
我都係學業有d停滯不前，之後好唔開心，開始同人比較，又慢慢接觸社會，發現好多黑暗同不公，我就開始諗"點解"，呢個"點解"可以不斷咁問，問到我好厭，又唔知點解決，我開始睇哲學書，開頭係西方哲學，著重邏輯，之後發覺西方野太激進，佛學我無乜研究，不過我成日覺得好多問題同哲理，嗡一大輪，一大餐之後，都會被佛偈一句就概括左。好似因果循環。
問"點解"，其實都係搵原因既過程，西方哲學有樣野叫"決定論"，我覺得係佢講曬，決定論都係講所有野都有原因，即是所有野由第一因出現既一刻，就已經決定好，即係因為a所以b，因為b所以c，因為c所以d，佢地既因果關係係必然，即係話a出現果一刻，d已經係必然會出現，(當時風氣興討論"自由"或"自由意志"，所以決定論係果陣時對我黎講就係自由既敵人，佢否定人既自由，咁之後既討論同思考都變成決定論同自由，同呢個題目無關，我就省略了)，當時對我就衝擊真係好大，我愈諗愈唔想自由意志會輸，亦都愈諗愈逃唔出決定論。
之後，我開始認命，發現東方哲學，早就有所涉擸，道家講既"道"，佛家講既因緣，就係描述緊呢樣野。
樓上講到一個例子，我坐巴士，睇風景涼冷氣好正，到站比人趕落車唔開心，就話上巴士做乜，呢程巴士無意義。我覺得好好，好貼切(如果用流水會有詩意d
)
呢到提到幾樣野，代表唔同概念，巴士(生命)，落車(死亡)，
巴士既車程就好似時間既流動，令生命不斷流逝，我們到站都會落車，如人都會死一樣。生命有美好風景我地去欣賞，搭巴士既意義就係送我地去目的地？欣賞風景？唔知道，睇下你係車上既心情係點，可能你係無咩做，遊下車河，純粹上車輕鬆下，又可能你係趕緊返工，或者約左致親，就黎遲到，想快d落車。
不過，你唔係司機，你係乘客，你睇到d咩風景、遇到咩人、有幾多個站，甚至幾時到你要落車既站，都唔係你話事。司機，就係"道"，"因緣"，"決定論(邏輯)"，或者有神論者會話係"上帝"
利申，我無宗教信仰，不過好鐘意研究宗教同物理。我同佛害巴一樣係遇到生活上既不幸，所以走向宗教同思考哲學問題，而且都係無正正式式咁去信一個教，搵師父去理解，到最後用左自己既方法去演繹。所以我都係用科學邏輯去分析佛教。不過我唔係咁同意你，用左三年時間去研究佛學，又認為佢令你失去好多，咁，佛教叫人出家，就係放棄塵世俗事嫁啦，咁你宜家有先開心，唔可以怪人地叫你放棄係錯既。
始終生命意義問題係我最在意既地方，我都係欣賞下巴士風景最好，司機車我去邊就邊。
