有冇人有睇百年孤寂？一齊討論下

睇左3/4
啲時間狂跳 頭先仲講緊佢整金魚 突然又講佢以前去打仗
仲有啲人名亂到仆街 少啲精神都會迷失在劇情中
最重要係我冇乜時代背景知識 睇唔明

利申 已放棄

我本身都唔熟拉丁美洲歷史，睇完有興趣想了解多d
唔了解既當睇大家族故事，最重要係搵個切入點：睇幾代人有咩搞作，點解會家道中落？簡單d既就有咩角色鐘意既，點解吸引到你？
本書既時間轉換好出名，好多人都分析第一句既時間線cover現在過去未來
整金魚發生上校後生時同退休老年時，唔知你講邊段時間？
如果係後生整金魚，之後打仗，應該係順序(某一章提前簡單扼要講咗上校打仗到退休既過程，之後再花大量篇幅描述)
如果係老年整金魚，再講打仗應該係用倒敘(回憶)既形式去講
基本上成本書既時序都係順序，講完一代人再講另一代人
某d位插入唔同時空既事件，唔想仔細分析既話，你就當佢係鋪陳既一種，吊你癮睇落去
結局好有驚喜，既然睇咗咁多，唔睇曬都幾可惜

記得睇到第三代(?)整運河定鐵路個到

第二代仲分到大哥細佬食土女同妒忌女(真名唔記得

第三代就分唔到
有印象係有一個好醒好有運，另一個係老實人？

既然咁多人推薦我都考慮下重睇

原來有人開post傾好開心

本身對西語命名有啲認識同埋中間冇斷開咁睇哂本書所以係記人果度冇乜問題，而且我覺得百年孤寂故事既每段時間(or 每一章)都有各自既主角，例如初代波恩地亞->上校->雙胞胎->末代奧雷里阿諾，只係女性角色既故事會穿插係呢幾代男人之間，同埋有啲人係會冇預兆無啦啦彈個名就出場，例如十七個仔果啲

btw雖然睇到中間已經feel到係個輪迴個個都會孤獨死，但係睇到上校浮浮沉沉一生最後痾完篤尿就企係度死咗係佢老豆棵樹前面果段真係好sad

女性角色，尤其係長輩，係家族既影響力好大
Iguarán一路維持成個家族，到佢去世後家族凋零得特別快
Carpio更加係家族衰亡既催化劑
Iguarán同Carpio爭奪家族既領導權，由Carpio勝出，Iguarán退居二線，導致後來第五六七代既亂倫悲劇，生下豬尾巴既孩子，終結成個家族既歷史

讀者普遍都鍾意第一二代人
連馬奎斯都鍾意上校呢個角色，曾經提過寫到上校死時佢都好傷心
我對上校觀感一般，睇佢打仗果幾part都幾難捱，本身熱血激昂既理想革命者慢慢變成戀棧權力既獨裁者，甚至連一齊革命多年既好友都想殺 好彩佢懸崖勒馬放棄革命俾國家回下氣（雖則佢一直都好後悔做呢個決定 ）

我試過兩三次睇左兩成，但開始覺得啲人名好難記同分，結果睇唔落去 最好其實係邊個譯本？

名字最易記：楊耐冬譯本

準確
台灣繁體版：葉淑吟譯本
大陸簡體版：范曄譯本

既然分唔到人名，建議你睇楊耐冬譯本

唔該晒巴打

主要係一斷幾日無睇就記唔返 睇黎要試下持之以恆睇一次

（離題）知呢個名係因為夕爺作既百年孤寂
一路覺得歌詞同歌名好瀟 好有個種超脫既感覺
Google下先知本身係本書黎
但一路冇提起勁去睇
睇得晒既師兄好勁！
我做野呢幾年睇過既文學作品得半生緣同幾本亦舒