覺唔覺BTS俾人高估得好撚緊要

GAY遇處處 2018-05-26 15:14:53

係，全隊得佢一個個樣見得下人

但舞台魅力係主rapper最強

奇洛李維斯 2018-05-26 15:14:55

Jungcock

咁佢地睇落都冇咩想進軍外國市場既行動
冇其他團咁紅都唔出奇
喺韓國應該只係二線男團

閔玧智 2018-05-26 15:17:38

好認同你呢段，我係INU時期入坑既，搬家真係到而家為止所有歌裡面我最鐘意既一首，歌詞好真好直接，有嗰種拎自己既故事同諗法同fans分享既感覺，相比其他數落haters或者比較大口氣講自己有幾勁既歌更加唱到入心，我自己相對鐘意佢地呢種類型既作品。

花樣年華時期未算太紅，inu算係轉左以往既hip hop風，之後慢慢開始浮上面，但嗰陣時我都冇諗過短短兩年後佢地會爆到咁高。問心我認同以佢地嗰陣既潛力係值得更多人關注，save me時期既受歡迎度係我覺得相對地合適的，始終個人都係偏好花樣年華系列，由fire/血汗淚開始既主打已經唔太岩我口味，但搶耳度同舞台觀賞度係好高，吸引路人，而開始留意佢地後會將重點放喺side track。
佢地既作品有寫夢想/青春，對未來既不安，對內在既質疑，諷刺社會既又有，又會寫年輕人玩世不恭既心態，有時講自己經歷，又有啲歌係幾傲慢聽到人好爽既，亦都有fan song/鼓勵fans既歌，好多元，而且每個人同音樂好有熱誠，幾乎每首歌都會見到成員參與創作，特別係rap line，真係不得了，認識防彈(或者想知點解咁多人欣賞佢地既音樂)一定要睇佢地既歌詞，佢地係kpop裡面好著重歌曲內涵而非求其整個搶耳旋律加一大堆洗腦音節(大9把人唔識韓文唱乜垃圾口水歌冇邏輯既歌詞都唔會有人知，冇必要喺歌詞上用心，但防彈絕對唔係，當然後尾啲主打係洗洗地腦既，要得到多啲人注意嘛，好既第一印象先引起到更深入了解既欲望，從而推向國際)。加上佢地live表演感染力好強，你係可以切實感覺到佢地享受舞台既熱情，呢樣必須去concert現場感受。

以前未喺yt亂㩒落inu之前，我都恥笑過個團名on9而冇諗過要認識佢地，但入坑後補左佢地既綜藝啊碟啊仲有佢地自家yt channel既bangtan bomb就圈到死一死，要問點解佢地咁紅，好大程度係因為社交媒體，佢地自己仲有公司都知，未出道已經有yt channel同twitter，一邊放幕後日常，一邊由佢地七個人共用一個ac擺下自拍講下野，同fans分享下交流下，間中又會睇到佢地圍內互動(eg.生日貼黑圖)，而共用ac呢樣野都好重要，比起七個人分開ac，用同一個帳戶令人覺得佢地關係緊密(團魂，呢樣野喺佢地既歌裡面都睇到，後生仔最嚮往就係認同感，享受成為圈子裡面既一份子，渴望同其他人有親近既關係，順帶一提佢地而家仲一齊住緊)，有時fans要估下係邊個講野，從而慢慢了解七個人既特性。呢個團魂可以話係令到army團結既推動力，偶像咁齊心，fans都要同佢地一齊去到更高既地方。twitter互動容易又快，拉近藝人同fans既距離。另一個係bangtan bomb/episode/log，任何內容，無論係低能野定幕後花絮都好，keep住喺網絡上有曝光率，fans睇到又開心，呢個時代做藝人唔單止靠幕前魅力，fans更加想了解既係藝人本身既character，呢樣野正正喺yt channel滿足到，bighit喺運用社交媒體做marketing上比其他大公司成熟而且有遠見，成本唔高但成效顯著，全世界都可以涉及到。韓國方面就有官方cafe(即係fanclub咁樣)，一樣有齊七個人ac，好常會發文同fans講野，好似得獎後同army講多謝，準備專輯既感想等等，佢地都會睇fans寫俾佢地既文章。最後當然有v app，成員會開live即時互動，而且仲有自家綜藝睇(run bts/bangtan gayo)，補足左佢地唔常上綜藝既一點，一站式咁樣，所有野運用得好全面。

另外，作為fans好欣賞佢地嗰份回饋fans支持既心態，例如每個成員會做cover放上bangtan blog，尤其是jk喺特別日子放cover，有時會唱army點既歌，近期仲做埋vlogger剪片放上yt，記低同成員間既生活，呢種分享fans相當受落。正規專輯外，佢地會製作自己既mixtape，rap line三個都已經出左，展現佢地個人特色，亦係對音樂創作既一種追求。每年出道日前(6月1到6月13)都有個叫bts festa既項目，佢地會準備自作曲，cover，唔同成員既collaboration，分階段送俾fans，慶祝出道，又會有蜜fm(扮電台節目傾計回顧過去一年)同埋bts party(小型fan meet/concert，有特別準備既表演)。以上全部都免費喺網絡共享(除左bts party要買飛入場，但會有online live streaming)，出埋link俾人dl。

關注社會亦都係入坑點之一，佢地同埋bighit曾經有捐款俾世越號家屬，後期小小有love youself計劃，同unicef合作，推出既周邊受益捐去做慈善。早兩個月亦都停止左fans送禮物，表明只會收信，希望fans唔好再破費，可以既留返錢俾自己用或者捐俾有需要既人。佢地係有運用自己影響力嘗試令社會變得更好，甚至起到一啲教化fans既作用，路人對佢地既觀感亦都更正面。(瘋狂買碟衝簽售，或者付出大量金錢為左見佢地呢啲fans行為就另作別論唔可以入落防彈數，始終係個人行為，我自己奉行理性追星，頂多飛去韓國睇concert，自問都唔係好睇得透咁複雜既飯圈)

當然最重要既都係佢地七個人既個人特色，呢啲喺度就唔詳細講了，又唔係要推薦人入坑。防彈既成功絕非一朝一夕，而係多方面逐步累積起黎的，而且時勢都係一個因素，好多大團都經歷左大大小小既波折，離團/當兵等等，令到防彈有一個大既發展機會。作為army我個人立場都覺得而家紅得有點太誇張，有少少令我無所適從，但多左咁多人支持佢地都好凳佢地開心同自豪，防彈喺五年內去到呢個地步的確嚇人，不過圈到咁大個fan base係有佢既原因，你話值唔值咁紅/係咪吹大左，呢樣真係好個人，每個人覺得重要既野都唔同，有人睇樣有人睇內在，或者好多人唔明點解佢地有咁大一群死忠，用fans角度睇就係上面所講既咁多點，而同美國音樂人合作/上美國節目呢啲同我黎講係win win，雙方都得到想要既熱度同討論，我地fans又可以有新鮮野睇下，咁樣都係一個好既局面，花時間拗值唔值咁紅既同時，我希望上面講既野多少可以增加每個人對防彈既認識，之後再討論多啲，咁就好了