麻雀真係個個國家都有唔同玩法,各有特色,我自己就每一種都中意 (除咗廣東牌,因為番種太多好難記), 我依照自己有限嘅認知簡介下
香港麻雀
應該係香港人最熟悉,由於三番起糊而且番數係幾何級數上,就算細牌都冇肉食,所以係咁多種牌入面最多大牌嘅一種,所以亦係變化比較少嘅一種牌,優點係易學,缺點係可能玩法太單調,但另一特點係強調防守,因為輸親都大牌出銃好危險,加上又有9章落地包7番/全求人自摸全包,加上有人會玩出銃雙計,更加大風險,流局率偏高,不過係唯一冇鐵8棟打到尾亦都增加咗刺激感
廣東麻雀
最複雜嘅一種牌,番種究極多,所以亦係唯一一樣我唔玩嘅,因為實在太難記,技術特點我唔清楚,但玩厭香港牌又唔想玩其他嘅可以學廣東牌,因為雀館同跑馬仔係兩大熱門,另一大特點係多數打半銃,所以出銃都唔太驚,其他人都要攬炒
台灣麻將
唯一打16隻嘅牌,特點係有食唔食罪大惡極,因為用底/台計,例如300/100, 而且大牌番數都唔高,所以食糊重要過做牌好多,但台灣牌最大特色一定係連莊,實在太刺激好玩。另一個大特色就係自摸,因為自摸雞糊係隨時大過出銃大牌,所以出統唔食搏自摸都過癮,但因為有過水,加上個個爭食,所以風險都好大
日本麻雀
強調防守,防守程度應該係各種牌最高,特點應該係自摸同出銃輸嘅錢一樣,所以出銃嘅代價係最大,所以成日睇日本牌比賽會發現佢哋打牌選項好怪,一路打一路守,以退為進。另一特點係懸賞牌+強調門清+聽牌,好運嘅話中到裡懸賞牌食嘅分數都係幾何級上。流局率極高,而且一番起糊,dora同槓/花牌嘅番數係當額外,所以有dora食雞糊都係會唔食得,總結嚟講係技術含量高但方差極大嘅玩法,所以好矛盾
跑馬仔
打法同台灣牌有幾分似,但佢直頭唔考慮番數 (我哋玩7番以上先會計番錢),只求食糊同槓牌收錢,獎馬係最刺激嘅一環,所以一定一定要自摸,唔係嘅話收錢仲少過開槓,當然獎馬會疊加,所以策略性截冧莊自摸都合理,但由於冇過水,自摸成本低過台灣牌,所以個個都會衝自摸,加上如果刻子多,更加要搏槓優先,食出銃冇意思
美國麻雀
娛樂性為主,特色當然係換牌 (有睇嚦咕嚦咕應該都記得) 所以開局副牌都超靚,加上莊家有權再換一次,所以天糊都唔出奇,番種由於大家都一知半解,網上又冇番種表,所以一般只強調換牌嗰下,然後搭香港/台灣牌番種玩,娛樂性十足,但因為我係傷心小棧狂迷,所以美國麻雀對我吸引力都幾大
附加:
國標
大陸競技規則,由於係新興而且係加工番種,所以吸引力低,大陸人玩跑馬仔都唔會玩國標,其實都係廣東牌簡化版,so far見唔到好有特色嘅特點,所以唔列入六大,但仲有其他可以再補充,出住6樣先,唔知大家中意玩邊種?