多謝巴打指正，反覆思量，我都承認三笠「又是這樣麼」呢句，的確唔能夠充份解釋其理論。而過去好多人討論呢一句含義，唔少人都會覺得暗示故事係有輪迴成分，但小弟就不太認同。
小弟認為，「又是這樣麼」呢一句係表達緊三笠再次痛失家人既心理描寫，先睇下圖：
三笠父母被強盜殺害一事，事件本質同艾倫老母死有其共通點 - 絕對的強與弱下，最終導致父母被殺害。
艾倫老母被超巨破壞城門既大石壓死，三笠、艾倫仍是幼年既無力感，漢尼斯大叔實力不足，導致只能眼白白睇住家人死亡。
情況猶如三笠家人被殺害，強盜同父母形成絕對強與弱既對比，自己亦對眼前無能為力，只可以眼白白睇住母親被割頸，最終三笠終於明白呢個世界，只係一個弱肉強食的殘酷的世界，而當時的三笠，受到艾倫既鼓勵覺醒，選擇戰鬥。
但去到艾倫老母被石頭壓死，從三笠眼中，只係一次又一次證明呢個世界係殘酷，就好似一次又一次觀察螳螂食蝴蝶既情況，所以先會出現「又是這樣麼」呢句。而點解頭痛，我相信作者係想表達三笠父母被殺一事係痛苦回憶，所以三笠一回憶就會出現頭痛徵狀。
再次多謝巴打指正
順帶一提，見到留言對內容理解、預測既罵戰，其實我覺得《進擊的巨人》一個吸引人既地方，就係每一話都有線索、伏線，可以從一句、一格、一個眼神、一個動作推測之後既故事。而過去幾年來，的確好多人就係憑蛛絲馬跡成功估中，例如艾倫潛入、故鄉組身分、法爾可身世、尤彌爾身世等。
所以大家唔應該怕罵戰而放棄討論，正如我既見解，部分都來自同朋友既討論而形成（雖然我的朋友就是我），因此歡迎大家可以繼續提出疑問，一齊討論
