新年祝大家心想事成身體健康 今次又黎同大家講下水母呢種奇妙，神秘，但又好簡單既生物
水母係屬於刺胞動物門(Cnidaria)，呢個門可以分成4大group: 水母，箱水母，海葵同佢啲朋友，水螅。我會講前兩者，後兩者因為較冷門有人想知再講
。生命循環
同好多無脊椎動物相似，水母有一個完全變態既生命循環。首先，係海水中浮游既，長大成一隻浮游生物(Swimming planula)。佢會浮歷大海，嘗試搵地方發展。搵到岩心水既位置佢就會定落黎，變成一個叫Polyp既野。當呢個Polyp長大，佢會開始進行無性繁殖，生產大量馬杜莎(Medusa)。而呢啲馬杜莎(Medusa)，就係我地常見到既水母。
結構
馬杜莎階段既水母，有好簡單既生理結構。中間Mesogloea係一層啫喱，由表層Epidermis同內面Gastrodermis一層薄細胞層包住，所以佢地好水，好有彈性。當中有肌肉環，所以佢地只可以做簡單既收縮運動，"唧"水推進身體。
刺細胞(Cnidocyte)
刺細胞通常係水母既觸手上搵到。擁有刺細胞係刺胞動物門入面既其中一個特點，呢啲刺細胞有分幾種，大部份都係好似上圖咁，會刺穿皮膚入肉再放毒素，有啲只會痴住獵物，仲有啲直情唔係用黎獵食。
講完大路野，就個別再講下我覺得得意既水母啦
箱水母(Box Jellyfish)
比傳統水母更快，更毒，更"有腦"。佢地外表上好似一個鐘(Bell)咁，係下面既觸手唔似傳統水母咁分佈，而係集中係四角。
葡萄牙戰艦(Portuguese man o' war)
佢地非常毒，而且唔太算係水母，起碼唔係普通馬杜莎式水母。因為一隻葡萄牙戰艦係一個水螅社群，意思就係一隻戰艦，由好多隻水螅組成。
永生水母(Immortal Jellyfish)
呢種水母有還原成Polyp既能力，佢既細胞可以改變成第二種細胞，因而可以還原再生。理論上佢地可以永生，因為佢地一有事就可以還原再刷。實質上都係會比其他生物食／其他環境因素而死。
不過一講水母，就通常會有啲誤會，為免大家係心儀對象面前拋錯書包，請留意以下兩點
第一，海天使(Sea Angel)唔係水母黎
佢地係海蛞蝓，同水母係無關係。
第二，男/女神比水母炸親要點做?
有醋淋醋，因為醋會令上文提到既刺細胞失去作用，係淋醋之前千祈唔好亂郁啲水母鬚，以免觸發更多刺細胞。尿，其他體液或酸性液體例如檸茶都係無証據話得既。
食法
廣東人做水母有好多種做法，水母本身無味，而且勁水同有毒，無可能新鮮食，所以都係做番海蜇撈黎食算啦
中意既可以睇埋我其他post，但啲圖可能已過期
[海洋生物]淺談八爪魚/墨魚/魷魚
https://lihkg.com/thread/342416/page/14?ref=web
[海洋生物(2)]淺談海星/海膽/海參
https://lihkg.com/thread/343951/page/5?ref=web
【海洋生物】淺談鯊魚 (長篇大論)
https://lihkg.com/thread/347746/page/6?ref=web
【海洋生物】淺談蝦蟹
https://lihkg.com/thread/359042/page/9?ref=web
【海洋生物】淺談魚類 (序:由頭開始)
https://lihkg.com/thread/369314/page/1?ref=web
【海洋生物】淺談海洋哺乳類
https://lihkg.com/thread/421631/page/1?ref=web
