詳細我鼓勵大家喺 youtube 搵嚟睇，我只講睇到嘅重點。
1. 寓意深長，但不忘暗示
歸納到主題有三：毋忘真相、關懷親屬、汲取教訓。
對一般觀眾嚟講，信息都偏向正面而警剔嘅；但對心水清嘅人嚟講，元兇誰屬都幾指向張潤衡本身。
2. 「無證據，但無話唔係你」
上半段前目都係一步步指出調查指向「食煙」。連嫌疑人都呼之欲出，但正正因為「無證據」而告終。訪問都指出「無人會走出嚟認」嘅無奈，而「人證物證」皆缺席嘅情況下，又的確係難以將事者繩之以法。(然後大頭就zoom去張潤衡)
同時校方嘅責任亦都係一樣處理。行山路線居然要設一段「必須要爬過兩層樓高嘅石先過到」嘅「挑戰」，換住係現在應該係絕不可能。呢一點節目前後都剪咗兩三段校長嘅回應，完全係將責任推得一乾二淨。播出有關片段，當然就係唔想大眾忘記呢啲可恥嘅行徑。
3. 家屬尾刀
最後尾死者家屬母親、婆婆嘅訪問，就更令人動容。
最初婆婆都指唔想太執著真相 (寧願相信無人食煙)、已經淡晒，但最後卻苦勸「唔好再食煙、唔好再玩火、唔好再做錯」，就明顯有指向。意思就係「我無能力心力追究你，但你都唔好再行差踏錯」。
節目最尾又搵張潤衡金句抽水：「真相畀你搵到又點呢？」
縱觀節目脈落，其意思都相當明顯。難怪條友收到風就即刻收埋 ig，明顯估到來者不善。
