走遍塞浦路斯南北9日

第二日，福頭老師：好熱好鬼熱

之後就即刻搵間餐廳食飯，因為太熱所以都冇乜點諗，坐低嗌咗碟İskendar kepab 加杯啤酒盛惠€13，其實係呢度嚟講係幾貴，有刻佢一半都好貴，去做本地人生意嘅餐廳唔會係呢個價錢，所以之後我都限制每餐€6-7，我寧願花錢去酒吧都唔想洗錢喺啲貴價唔包嘅餐廳。

食完去廁所就上演上個post講嘅悲劇。之後行過一間書店，佢後院係一間cafe，幾有特色，古雅得嚟又帶點新穎。書店嗰頭就喺正Arabmehmet，嗰度一列屋都好靚。


跟住去定客運站探一探路，個站都幾遠，事後先至Girne城門附近已經有一個站。

塞浦路斯嘅天氣莫講話熱過香港，係直情熱過非洲。我利用最後一滴血，一路行捱到返去hostel，唞咗兩個鐘再出發。我去咗一間教堂叫Πεφανερωμένης聖母堂，我簡單祈個禱點枝蠟燭，我問其他人今晚有冇崇拜，嗰啲態度西到好似索左佢老豆咁，希臘人除咗我自己熟絡嘅朋友之外，其他基本上都係好冷淡，同土耳其人好唔同。出咗教堂搵啲嘢食，返嚟就準備執好行裝，第日上路。

餐飯$13+唔知幾錢

//塞浦路斯嘅天氣莫講話熱過香港，係直情熱過非洲//

南歐 地中海一帶嘅地方 夏天熱過東南亞 又熱又曬又乾
有熱浪時就同非洲差唔多
所以有啲人話「香港世一熱」真係笑而不語

喺英國，25度嘅時候啲人嗌熱。

佢哋冇去過歐洲㗎

第三日，一路向北

一朝早就出發行去關口過關，跟住去附近嘅巴士站，去到Girne城門發現成排軍人喺度準備演習，前面有個講台，基本上膊頭有花𠺌都喺晒度，仲有啲保鑣護送啲高官 ，所以封咗路，我即向住總站嘅方向再行，好彩冇幾遠就有個站，上咗小巴去凱里尼亞，途中見到山坡上有塊巨型北面國旗。


去到擺低啲嘢就去周圍行吓，冇幾遠就係海邊，唔知點解腦海中即刻浮現出Mama Mia嘅畫面。

呢度有好多廢棄嘅教堂，主要都係東正教堂，其實聯合國同歐盟喺保育北面嘅教堂係做咗好功夫，如果早10年嚟到應該全部都係頹垣敗瓦。雖然鎖咗，但係我攝部手機入去影到內部

沿途嘅街道左穿右插，冇Google map搞唔掂。

海邊有一座城堡，係以前威尼斯共和國統治嘅時候起嘅。入面就有間小教堂嘅遺跡。

行到去樓頂就可以俯瞰整個城市同埋遠眺地中海。

嗰度有個展館，展示一艘古希臘時期嘅貨船殘骸，入面裝住嘅貨物喺打撈嘅時候依然完好。最重要嘅係入面開行冷氣。

呢幾日真係好攰，加上網絡好慢，所以出得好慢，我返到屋企應該會開行turbo

留名 上年去Larnaca出差3日 可惜唔夠時間周圍去 想去Pahpos Nicosia 🤦‍♂️

今次冇時間去柏科斯，如果唔係就真係可以圍繞成個島遊一圈

第三日，望吓山望吓海Girne旅行

睇完就去搵嘢食，去咗檔土耳其嘢，嗌咗碟Sarma，諗住平時食開羅馬尼亞嗰款實無死，點知酸到仆街，不過份量真係多到下餐都唔使食，盛惠T£450 （$86)。

食完就出發去山上一條村Beylerbeyi，嗰度有一間博物館，前身係修道院，原先屬於天主教普雷蒙特利會，叫做山上聖母修道院。講開其實塞浦路斯嘅東正教堂同清真寺好多原先都係天主教會嘅，你睇吓建築造型就知，咁係因為喺拜占庭帝國喺當地失勢一直去到鄂圖曼帝國征服之前，塞浦路斯都係俾嚟自西歐嘅天主教政權管治，所以王室信天主教，民間就信東正教。後嚟修士全部都還俗娶妻，去到鄂圖曼帝國時期為咗巴結希臘人嘅支持，抗衡威尼斯為首嘅西歐國家，就定東正教做唯一合法嘅教會，因此將修道院轉讓比東正教，但亦都至此丟空。

牆上嘅壁畫幾乎剝落




之後返到去食飯嘅時候，嗌咗碟çorba，入面係啲張嘅頭頭尾尾，但住得好入味，配埋辣椒同醃椰菜一流，加埋焊過嘅法包先收嗰T£360

夜晚瞓覺遇着個仆街，凌晨4點開晒燈執行李，仲要帶大聲講電話，成冇瞓過咁滯。

Plan緊去睇波

北面物價係咪好低 (最少低過南面)

睇咩地方，遊客區嘅話一樣

第四日，廢墟探索

一朝早渾渾盪盪咁執拾好上路去法馬古斯塔，今次坐嘅小巴dolmuş，唔係16座嗰種，而係Benz七人車舒服好多。講開dolmuş呢隻字嘅意思就係擠擁咁解，sarma喺土耳其同塞浦路斯又會叫做dolmades，意思就係塞滿。因為喺小巴，唔坐滿，司機係唔會走人，結果就等咗半粒鐘。我想講北面嘅公路因為土耳其泵水整靚，仲好過南面。

到達之後我想擺低喺個apartment到先，你冇聽錯，我嗰晚租咗個apartment，但原來個屋苑有分兩期，網絡完全一樣樣，屋主係行船嘅，所以係佢老豆負責打理，佢好好人特登揸車過嚟接我過去同埋擺我個行李，佢之後仲好好人拎埋上間屋度，佢仲要車埋我去古城嗰頭，之後再車番我，做埋我司機，真係唔話得。

去到之後因為尋晚食得太多辣椒，所以搵咗個公廁爆石，個公廁有人打理但唔使錢。

古城入面係有幾十間教堂，當然全部都係荒廢咗或者面咗做博物館，成個古城有啲似迪士尼美國小鎮大街嘅放大版。

聖佐治/西米安教堂，基本上得番堆爛石頭，但係勉強可以睇到原先嘅規模，最可幸嘅係牆上仲有少量殘餘嘅壁畫，諗住嗰啲標注嘅名都可以估到係邊個。
左至右：聖巴西流、聖尼古拉、聖斯比理敦

可能係聖金口約翰

聖母先天


無獨有偶，呢度都有哥特式清真寺，十字架窗框仍然保留，但係唔知點解個尖頂又係冇咗。


呢座聖佐治教堂係喺個迴旋處中間


城門口上有座燈塔

第三日，鬼城

跟住沿住城門出去就行到去一個小碼頭，嗰度泊咗好多遊艇仔，再行就見到一座新落成嘅屋苑，屋苑嘅隔離就係軍營


呢個軍營出面望落似係荒廢咗嘅屋，但係如果望返地圖其實只係掩眼法，一面係軍寨嚟。

呢度之所以有一個軍營係因為法馬古斯塔遠近馳名嘅鬼城Βαρώσια就係喺呢度，成個區都用圍欄包住咗，只係開放一個比人同比車嘅出入口，兩個出入口都有警察守衛。Βαρώσια原本係法馬古斯塔嘅旅遊熱點，所有度假酒店同海灘都喺嗰度，墟冚程度同今日嘅拉納卡同利馬索一樣，而整個區都係屬於希臘人嘅物業，1974年土耳其入侵嘅時候，當進攻到法馬古斯塔嘅時候，Βαρώσια嘅希臘人擔心被屠殺所以全部人一夜之間全部走難去南面，整個地方至此丟空，北面政府堅持呢啲地原先係屬於土耳其人，係英國殖民政府故意轉讓比希臘人，而希臘人就堅持係屬於佢哋，因此呢啲希臘人業主就要求聯合國代為管理呢啲物業，呢幾十年嚟，一直都喺北面乃至國際法庭打官司，的確有成功賠償比小部份希臘人業主，但係所有嘢就好似福島咁荒廢咗，因為太多人搶掠一空，所以北面政府決定圍起佢，仲索性發展做一個遊樂場咁。


免費入場，門口有單車、踏板車同高爾夫球車租又有花園、cafe，如果你有手袋嘅話警察會喺門口係咁咦查你，我係喺晏晝嘅時候行，烈日當空之下，極度辛苦，所以千祈唔好呢個鐘數去，入到去有整好嘅車路、行人路同單車徑，至於兩側嘅建築就圍住寫明有坍塌嘅風險，喺海邊嘅一小段甚至有海灘同cafe俾遊客戲水玩樂，簡直就係消費希臘人瘡疤嘅樂園。

遇到一個旅行團，個導遊講嘢個腔調好似軍訓咁機械式，好似機關槍咁吐字冇起伏，每句嘢開頭都係Ladies and Gentlemen 好奇怪，因為所有建築都係聯合國管，所以其中一座大廈就俾聯合國維和部隊佔用，門口掛住斯洛伐克國徽。行咗個𡃁鐘就頂唔順，要出發去搵地方休息，如果唔係我驚有中暑嘅風險

出咗去就嗱嗱臨搵地方食嘢休息。