每消滅一隻怪獸，我條女對波就大一個cup！

佐治戰車 2025-06-26 22:47:24

「好！呢度有一份生死狀，你喺上面撩隻『龜』，表示你係自願參與戰鬥，假如不幸戰死，我方無需負上任何責任。」

喺作戰之前，晴天博士遞部iPad過嚟，要我喺生死狀上面簽名。

呢一刻嘅我成個腦都係諗住大波、大波同大波，早已置生死於度外，因此無考慮太多，直接喺上面簽名。

而就喺同一時候，暈咗嘅Yanny終於醒返。

佢迷迷糊糊咁擘大眼，一醒返就見到我離開嘅背影：「朱大志，你去邊呀？」

「我要去戰鬥。」

「戰鬥？」

「無錯，我要去戰鬥。」

我指向遠處嘅巨型螳螂，同Yanny講：「只要我消滅到嗰隻怪獸，咁你個胸就可以大一個cup。」

「你講緊咩呀？咩消滅隻怪獸就大一個cup？」

Yanny啱啱先醒返，無聽到我同晴天博士之間嘅對話，所以依家一頭霧水，唔知我講緊乜。

「等我打敗隻怪獸返嚟先慢慢同你解釋，總之我應承你，我一定會令你變成大波妹！」

講完呢句說話，我就挺起胸膛，懷住偉大嘅夢想同滿腔熱血，頭也不回咁向住刀光劍影、驚心動魄嘅戰場行過去。

「朱大志你唔好過去呀，好危險架！」

Yanny大聲叫停我，但我無理會，繼續孤身向前行。

細個嗰陣，我好鍾意睇幪面超人，周不時都會幻想自己變身成英勇嘅戰士打怪獸。

如今我手上戴住變身器，喺面前有一隻大怪獸，唯一唔同嘅係，幪面超人嘅戰鬥係為咗保護地球。

而我嘅戰鬥係因為要追求呢個世界上最大嘅真理——巨乳。

隨住堅定而急促嘅腳步，轉眼間，巨大嘅怪獸經已近在眼前。

隻螳螂真係超大隻，望落起碼有七、八層樓咁高，佢嗰兩隻用嚟捕獵嘅手刀又尖又利，好鬼死得人驚。

但我唔會退縮，因為大波賜予我勇氣。

「理想不可減退，全力勇敢的衝出去…」

我內心響起幪面超人龍騎嘅主題曲，雙眼閃爍住熾熱嘅光芒。

站立於混沌嘅戰場上，我左手握緊拳頭，反手舉於胸前，以堅定嘅意志，大嗌一聲：「變！身！」。

與此同時，我嘅右手㩒一下手環上面嘅變身掣。

下一秒，黑色嘅手環散發出銀白色嘅光芒，產生出強烈嘅能量波動。

無數細小嘅納米粒子從手環中釋放，猶如漫天飛舞嘅星塵，包圍我全身，並以極快嘅速度排列、組合，漸漸形成一套貼身嘅盔甲。

當變身嘅光芒褪去，我就好似一隻破繭而出嘅蝴蝶，蛻變成為升cup戰士！

佐治戰車 2025-06-26 22:56:13

今日出住咁多，聽日繼續