呢隻game我玩左成超過300粒鐘，實在係太痛苦啦！
之後我短期內都唔會再玩無雙game啦！另外今年2月已經出左漢化補丁，唔洗再睇雞腸文，上年無買的話可以睇下今年夏特有無折到。
因為我以前只係玩過戰國無雙2，3代因為上Wii唔上PC所以無得玩，所以接著落嚟我都會同2代比較。4代唔同2代，係用返傳統國傳模式，不過戰國大名繁多，唔似三國咁只係得魏蜀吳，所以章節都有成10章，時間段大多係去到本能寺事變之前或者豐臣秀吉統一日本期間。
打完10個小支線章節之後就可以打天下統一之章，承接著織田之章本能寺事變後，由豐臣秀吉係山崎之戰打贏明智光秀最後到小田原征伐。不過特別的係佢將德川家康的關原同大阪之戰都放埋入去天下統一之章入面而唔係分開。
不過今作主打的係吉祥物真田幸村的哥哥真田信之轉正，仲做埋封面人物。官方仲要刻意整埋真田之章，比大家食花生睇兩兄弟自相殘殺，然後食一次花生未夠，將來再資源回收分開一隻真田丸再呃大家錢。
因為係兩兄弟，所以上田城同大阪之戰可以分開揀打東軍或者西軍。
不過可惜製作組偷懶連If路線都無整（結果去到後期真田丸都一樣！
），都係見證著幸村花開花落最燦爛的盛放，畫面表現極度震撼同浪漫化，最後櫻花樹下可以做埋Wallpaper。
大家都知無雙遊戲無腦，製作組怕各位社恐宅男唔夠打想搵2P幫手但又無朋友，因此今作就算大家唔係服部半藏都可以開分身，一人操作兩個角色。
雖然如果一個人玩時你唔可以同時操控兩個角色，不過你亦都可以好方便咁控制NPC 2P去指定地點攻擊敵將或者待機。
一人雙控令到遊戲難度大幅降低，以往如果遊戲任務目標一個東一個西的話就會非常尷尬，你只能打完一邊就要立即騎馬快馬加鞭衝去另一邊到，但今作就可以一個向東一個向西，當1P打死一邊後就可以一鍵切換做2P打另一邊，唔洗再騎馬浪費時間。
我舉個實際例子：要攞到上杉謙信的秘武就需要謙信衝上去右上角的武田本營，然後真田信之就會係右下方的營地出現，30秒內打死佢就可以攞到秘武。但由於右邊鎖門，需要兜個大彎先可以到達右下方，30秒根本唔夠時間，而且仲未計埋打死信之的戰鬥時間。所以最簡單的做法就係2P係右下營地埋伏，等謙信衝入右上大本營後就立即切換成2P打死信之攞秘武。
另外今作取消左C0，當發動C0的時候就會使出神速攻擊，可以快速撞散敵人，以往非常頭痛麻煩成日打斷你攻擊的弓箭手同火槍兵，今次一撞就兵敗如山倒，唔洗慢慢行埋去打非常方便。另外由於攞秘武需要有足夠擊破數，神速可以用嚟快速殺敵。
不過神速只可以打雜卒，武將係會防禦神速技，唔可以無腦鳩衝，要用返傳統C技去打。
另外神速對於紅區的士兵效果甚微，唔可以係紅區入面用神速去刷擊破數。呢個亦都係點解關原之戰西軍的秘武咁鬼死難攞，因為成個關原都係紅區，但又要求殺成千個人，就算打死旗兵令部分紅區變返白區，但你能夠用神速刷敵的地方亦非常有限。
雖然呢隻game唔係帝王傳，但係可以比你自創20個武將，由面部、防具、武器、聲線，甚至連無雙文字都可以修改埋。
自創武將唔係單純係自由模式玩，更重要的係用嚟玩由自創武將做主角的流浪模式。
遊戲流程非常簡單，成個日本地圖分開成東北、關東中部、東海北陸、近畿、中國、四國同九州呢七個部分，你就好似打Pokemon咁逐個逐個地方打，然後爆機。
一開始要先打有頭盔標誌的隨機戰，隨機戰無劇情好似玩帝王傳咁，就係單純無腦好似佐佐木小次郎咁見人就殺直到敵大將出現再斬埋去收工。
之後就可以打踢館戰，比起之前的隨機戰更簡單，地圖縮細左，敵大將又會立即出現，可以一開埸就立即殺到去敵大將到。
然後打埋進擊戰就可以去到下一個地區入面繼續踢館，關卡同踢館戰一樣都係敵大將一開始就出現可以立即殺敵。
成個模式惟一的亮點係可以收大眾臉作為同伴（包括戲份好重但反而無轉正到的北條三郎），不過如果大家真係咁想玩大眾臉的話倒不如玩帝皇傳吧啦，如果暗恥屎忽痕突然將帝王傳放上Steam的話我一定會攞隻game同流浪模式作比較！
當你攻打曬所有地區、升滿曬好感度之後就可以打最終戰。雖然都係無劇情無腦鳩打戰，不過關卡難度異常地高，基本上係地獄難度開局，我就算50Lv滿級都可以被敵軍打到落花流水殘血，要食幾次補品，總算係有返D挑戰性。
打贏最終戰之後你就會遺臭萬年， 成為人見人憎的殺人癡線佬！
呢個流浪模式非常無聊，佢唔似三國無雙6戰史模式咁有各武將惡搞列傳戰比大家笑下。成個模式只有隨機戰，無任何變化，就算幾咁鐘意玩無雙game都好，斬得耐都會感到厭倦，只會想敵大將快D出現斬死佢！
總結呢一隻一個非常簡單的無雙game，一人雙角加神速令到隻game非常腦殘，除左關原之戰西軍秘武因為上述原因而卡關外，其餘關卡我都打得非常順暢無壓力。信之的出現令到以往幸村劇情多左兄弟相爭，而唔再係單純充滿正義感咁殺入德川本陣，做天下第一兵。成隻game最失敗係無任何故事成份的流浪模式，除非大家想100%完全通關，否則大家可以跳過唔玩佢。