無諗過一隻三國Cancer都可以磨我接近200粒鐘。
本作除左有以往大家玩到熟的魏蜀吳三國戰役外，今代開始會新增晉代列傳，故事唔再去到五丈原結束，而係會一直去到司馬昭伐蜀為止。
晉故事主要分成兩個部份，第一係司馬家族點樣逐步剷除曹氏勢力，甚至連魏帝都殺埋(連曹操、曹丕都無癲到殺獻帝
)。第二係姜維自從諸葛亮死左之後就癡左線，日日丞相前丞相後，追住魏國死咬唔放，變左姜馬車！
故事表現整體良好。我惟一最唔滿意係夷陵之戰，個八兵奇石陣變左一條直路，而唔係錯綜複雜的迷宮，神秘恐怖感大減。
同埋故事模式竟然唔可以換馬，即使係用呂布亦只能用最慢的黑鹿毛，行得太慢、想趕路都唔得！
而由呢作開始，角色唔再限死用一種武器，而係可以裝備任何裝備，只要你有創意，你甚至可以可憐小喬攞住支狼牙棒摳人。惟一的限制係大劍只可以男人裝、多節鞭只可以女人裝。你話女人唔夠力揸大劍都還可以解釋得到(但其他重武器女人又可以裝到...)，但明明男人先出名用鞭，現代已經出左個用鞭武將馬保國，無雙技閃電五連鞭！
亦因為人人都可以裝同樣的武器，為左令到每個角色獨特一D，所以每個角色的預設武器都會係出完蓄氣攻擊後額外發動EX技能，發動時會有白光一閃以作提示。不過好多時EX技都係華而不實，唔會特別強勁，我自己都係習慣無腦放C5攻擊算。
最後遊戲為左現代化亦加入左好多熱兵器，由機關槍、霰彈槍，甚至連坦克都有，中國統治世界指日可待！
玩完故事模式就可以玩最無聊的戰史模式。唔好見到D六角格咁多就以為內容好豐富。其實入面只係一堆毫無劇情、無過場的隨機防守、護送、追撃戰，好似我以前玩七代帝王傳D委托任務咁。
惟一有少少吸引力就只係各個人物列傳，大多數都係假想劇本，例如夏侯氏大戰司馬氏。不過假想劇本重量不重質，只係單純多少少特別對白，劇情非常薄弱，連過場都無，玩起上來唔夠痛快。
即使遊戲亦都有加入初代無雙的劇本戰役，依舊都係偷功減料，閹割曬D過場畫面。而且初代無雙年代太久遠，玩起上來無共鳴...
戰史模式惟一有價值就只有赤兔馬，有左佢就可以趕路(故事模式除外)。而至於秘武，因為猛將傳本身就已經會送一個最強的秘武，呢把第三強的秘武就只係純用來儲武器圖鑑用的。
相反傳說模式就認真好多，有收錄都一D故事模式無的劇本，甚至係敵對勢力版本。而復刻劇本係都係四代地圖，四代咁出名亦係大多數無雙玩家的童年回憶，大家都希望暗恥將四代放上Steam到比大家懷舊，所以玩起上來非常投入，不過依舊存在著偷功減料閹割曬D過場畫面的問題。
同故事模式一樣有過場，更有甄女皇絕密SM畫面！
玩通曬所有模式之後就係時候開始升滿人物去，同四代一樣可以靠打死武將食補品去升能力，不過咁樣實在太慢，打足成年的話全部65個角色都未升滿去。好彩呢家係大課金年代，原來能力值都可以靠課金買返嚟。既然錢可以解決到的問題就唔係問題，刷錢的話可以去返戰史模式打三江城，諸葛亮一開始中門大開，呂布騎住個赤兔衝到敵本陣只需半分鐘，跳起開無雙殺諸葛亮又係半分鐘，大約1分鐘6萬蚊就袋袋平安，唔洗20分鐘就刷滿錢上限100萬。
裝備方面因為猛將傳本身已經會送秘武，所以一開始你已經係最強存在，不過秘武太過現代同惡搞，用起上來非常唔舒服，我一係傳說模式攞到其他秘武之後我就立即換上了。其中最重要的技能係攻擊耐性，雖然裝左唔係完全霸體，面對蓄氣攻擊同無雙攻擊依然會被打到硬直，但可以防普通攻擊硬直。由於大多數承受的攻擊都係普通攻撃(最主要係防究極難度兵仔陰D陰D咁捅你)，變相90%以上時間你都係霸體長開唔會比人打到硬直，出C5攻擊變得非常容易，人人都係虎牢關呂布！
但即使有左霸體你亦都唔係完全無敵，比兵仔一下一下捅落去究極難度下好快就會被捅到紅血，所以就需要去刷將軍位。將軍位的條件非常簡單，都係單純係指定難度下限時殺敵。不過要65個武將各自各刷，非常花時間同無聊。
刷完之後會有黃袍加身，衣夫人睇到嬲嬲豬！
將軍位最重要的技能就係吸血，主要分成敏捷度武器同用角色預設武器吸血。關於何為敏捷度武器遊戲無直接講，不過經觀察後其實只要武器天稟係輕功或者轉身就係敏捷度武器可以吸血。
吸血的話個人推薦用大眾面最鍾意用的大刀吸血，根本就係官方推介，就算係新手到老屎忽都適合。功擊力強轟天斷刀有77點功擊力，屬於第2強武器(最強係91點功擊力的神偃月刀)，而且功速高打擊範圍大，究極難度堆小兵陰D陰D咁扣你血，你隨便揮刀就立即回到藍血，長期鎖血好似開左無敵金手指咁。自從有左無敵吸血將軍位之後就算究極難度下你亦永遠唔會死，你輸的原因只有豬一般的總大將紙咁薄比紅點武將打死你救唔切佢。
刷完將軍位變無敵之後就可以正式攞秘武，今代開始秘武條件直接寫明，唔使好似以前咁上網左睇右睇。而且因為武器所有人都可以裝備，所以你亦可以用任何人去刷秘武，就唔洗再賴張角太廢太難用攞唔到秘武
。刷完之後仲可以開主菜單立即裝備秘武，不過秘武要過左關之後先可以永久保存，唔可以立即退出關卡。
我自己除左4代蜀軍五丈原因為要防止諸葛亮劇情殺病死而迫著用諸葛亮外，其餘所有秘武一律用呂布過關唔洗諗。不過要記得裝老屎忽大刀吸血，方天畫戟吸唔到血。呂布因為技能自帶究極武藝，加上武器再裝多2個究極武藝，總共3個究極武藝成為遊戲最強人物。
就算係網上講到最難攞的五丈原撒退戰秘武，因為要救曬全部豬一般的隊友，非常食時間，我用呂布都係一take過搞掂。呂布一個無雙車落去敵將2條血就車到得翻殘血，再用老屎忽大刀斬幾下就收人頭，過程10秒都唔洗，對方死左都唔知咩事。
當以前D人話三國無雙無腦時，因為我無深入去玩所以我唔太清楚，不過當我深入玩就立即被我玩壞左：人人都有霸體加鎖血吸血，你永遠唔會死；無雙技能過於強勢，可以將敵人車到殘血(呂布更甚)。呢隻已經唔係無雙game，而係玩壞左的三國Cancer癌症末期無得救，攞秘武只係笑話例行公事而唔再係挑戰。如果大家想要有挑戰性的話一定要禁霸體、禁吸血同禁無雙先得。
