《第九章．掃羅II》(5)
那一幕的震撼在掃羅心中留下不止的餘波。他的滿腔怒火漸漸換成了盤根錯節的自我懷疑。
「驢兄，我覺得你無做錯。」他的傷感如同割開的動脈般淌滿心田。「明明你做咗佢哋做唔到嘅事。明明你喺危難關頭出手救咗佢哋，甚至為佢哋犧牲。但佢哋不但唔領情，仲要好似逃避瘟疫咁避開你。你做錯咗啲乜？你只不過係比佢哋強壯，比佢哋有力。但我諗，你唔會傷害佢哋吖，佢哋嘅渺小根本唔值得你費神。」說著，掃羅漸覺自己跟壯驢同是天涯淪落人。「如果你想傷害佢哋，又點會出嚟救佢哋，甚至為咗佢哋犧牲？但你對佢哋好，佢哋又點樣報答你？」
掃羅愈想愈能進入壯驢的處境中。「驢兄，我諗你無做過啲咩傷害佢哋。你有咁嘅體魄，面對敵人毫不退縮，一定係你喺背後落咗好多苦功，努力訓練。我都知呢個世界無嘢係白白得嚟。」[1] 他想起自己在樹林中不斷練槍練劍的日子，風雨不改，無論有多疲憊，有多想放棄，他都會自我激勵，繼續訓練。因為只有努力訓練，才能獲得力量，在戰鬥中保留性命、保護自己和自己重視的人。「驢兄，我明㗎，我真係明。」
「如果無力量，連自己都保護唔到。終日搞關係、玩排斥，最後咪又係死喺刀劍之下？有意義咩？點解，點解啲人要迫我哋用啲時間做啲無謂嘢，唔欣賞我哋做啲真係有用嘅事？」他質問掌管世界萬物的力量，那個在冥冥中決定一切，掌控人類命運的存在。「點解，點解你唔做啲嘢？你係咪睇唔到個世界發生緊咩事？」
「驢兄你無錯。錯嘅係佢哋。佢哋唔知道你嘅好，唔識珍惜你。佢哋只在乎佢哋嗰啲無知狹隘嘅幸福。佢哋唔會知道自己嘅幸福係只係其他人嘅犧牲換來嘅保護。如果唔係有你，今日佢哋嘅幸福就要破滅。但佢哋唔識感恩，不只唔識，佢哋甚至唔覺得要感恩。」他的怒氣又猛然上湧，這些無知而可惡的牲畜使他生厭。
「但如果佢哋就係一群咁愚蠢，咁無知嘅畜牲，佢哋又點會明白你？」他的思路突然一轉。
「因為佢哋係咁無知，喺佢哋眼中，你就係嗰隻永遠都唔合群嘅驢。佢哋唔接受你嘅唔同，因為你強大，佢哋怕你，唔敢得罪你。因為佢哋嘅小世界入面接受唔到你嘅強大，所以佢哋就將你當成怪物，避開你。佢哋唔明白你、驚你，但又唔敢去了解你。所以佢哋小小嘅腦袋只會覺得你討厭佢哋，睇唔起佢哋。因為你太優秀，佢哋太無知，所以最後先會委屈咗你承受咁多痛苦。」他的思緒逐漸變得澄明。對壯驢說這番話的時候，他的內心也似乎得到了解脫。
「驢兄，你安息啦。你盡咗力，做咗你要做嘅嘢。佢哋思想太狹窄，無辦法明白你，呢個唔係你嘅錯。」掃羅感到一陣淡淡的哀傷。「係個世界欠咗你。我明白你。你係我心中嘅英雄。」
掃羅把鐵鏟深深插入壯驢葬身處的土地，作牠的紀念碑。
-------------------------
[1] 驢：「吓，訓練？我生出嚟就係咁㗎喇喎」 :0)
******
----------------------------------------------------------------------
筆者Facebook:
https://www.facebook.com/people/雷寂/61573858342296/
追故po:
https://lihkg.com/thread/3902189/page/1
（P牌冇得推po，每次出新po 同時都會update依個追故po）
致非基督徒讀者的話：
作為非信徒的你，相信早有耳聞大衛和歌利亞的故事。但讀到此書，卻可能會感到十分不解。看見「耶和華」、「上主」、「造物主」等字眼，可能你心中不免想起那些街頭宣教士；或者是那些音調不對的粵語詩歌、或是你中小學的「幼稚」、跟「女禍補天」、「嫦娥奔月」等同樣可笑的宗教教育。
我明白這些都可能會引起你自然的反感。然而，筆者並沒有打算在這本書中「講經」，跟你說「信耶穌，得永生」。然而，假如你只看大衛的行為，將他的信仰抽離，但就如同不理說話的態度，無視語氣和情境，單憑字面意思去理解一個人的說話一樣。
所以，我懇請你嘗試帶著開放的態度去觀察和理解書中各個角色的信念。雖然不少角色都相信上帝的存在，但他們與上帝的溝通和相處方式都迴異不同。當中有人心悅誠服，有人懷恨在心，有人不置可否⋯⋯但他們對上帝的態度卻沒有直接決定他們的下場。和人生一樣，有好人枉死，也有壞人笑到最後。這不是一個信上帝必勝，正義必勝的童話（至少在塵世間）。事實上，上帝從沒有寫過一個如此幼稚的故事。
敞開心扉聆聽他們作為信徒的內心對話並不等同你認同上帝存在，或是認同祂的美善；但至少，你的視野會變得更廣闊。起碼，你會知道信耶穌的人為甚麼有所為，有所不為⋯⋯你甚至可能會明白為甚麼有人雖說自己信耶穌，但卻能面不改容地做出大奸大邪，連無信仰的人也不會做出的惡事。
如果你願意一試，筆者相信此書不會令你失望。