大風-
無覺得好大風，可能一個月有兩、三日明顯大風少少，大約等於榆景灣碼頭咁。香港有屏風樓就梗係無風啦。
不過都睇過一個海邊社區，大風到吹得散人。本嚟考慮買間望海景屋，之後就放棄了。果d位大風過台灣金門。
陽光-
陽光好好，藍天白雲既日子比以前係香港更多。之前話英國經常陰霾，連綿下雨，但發覺唔是咁的。尤其春天、夏天，好天氣日子都多。而似香港打風果隻落暴雨真係極少。
物價貴-
唯一係搭車的確貴。不過可以買駕助力單車，充好電可以代替搭巴士。多人偷單車，建議買架 Brompton 加個單車袋跟身。（除非入超市5分鐘以內）
食物都好平，尤其麵包，香港一條排包都十幾蚊。依邊8蚊港紙買到一大條，份量比香港多一倍。水果都平，以前香港買加拿大士多啤梨成30蚊，都唔甜的，買過一次唔再買了。依邊10蚊歐洲產，甜好多。葡萄都係，有次親戚送嚟日本葡萄，都唔甜的。依邊歐洲葡萄真係甜到會再想買。
不過非必須品就貴，例如花園野，知道你有花園都唔會窮，果d野好少減價。例如花園水管、太陽能戶外燈，都好少減價。花就更貴，以前淘寶20蚊買到，依邊可以賣到200蚊。
上網買中國野會平-
唔是咁的，樓下asda好多時平過temu中國野。例如想買大花盆種花，temu都要4、50蚊，以前淘寶個價先15蚊人幣。結果搵到asda有，3鎊，仲大過以前淘寶買，圍返條數個價好合理。
垃圾-
之前上連登有人話council無安排人執垃圾，條街好亂。絕對唔係的，成日落街都見到有清潔工。
不過係有d位屬於私人土地，有時真係有垃圾堆積無人清。但私人地，council 都無計。
同埋多鳥、野生動物，好多屎，應該係鳥，太多鳥喇。
香港唔比餵白鴿，但依邊d文化樂於餵白鴿，有d鋪頭長期係自己門口放食物，長期比白鴿聚集。
買樓-
無實體一疊契，同香港唔同。以前有一疊文件揸手，要搵位放。依邊本來預要去律師樓攞文件，結果是無的，律師行email比份pdf就係完成ga喇，好有買咗遊戲中虛擬道具feel 。
當然有時都有野比你，買過間百年歷史古建築，賣家比埋d好舊既文件，除咗pdf咗比律師，完成交易竟然寄埋正本比我（律師轉寄），依d真係歷史文件喇。。。不過應該就唔影響未來物業交易，同香港唔見契無咗20%既情況差好遠。
同埋可以做過幾單deal，完全無見過/上過律師樓。成件事好似同npc玩，㩒幾粒制得到個道具咁。（鎖匙去賣方地產代理攞）
利申，蘇撚。
所以南邊果d搶電話、童黨、地鐵罷工延遲，我未見過。
打架就見過一次，有個勇武紅髮女人空手打鳩個男人，個男人只係避，嚴格嚟講唔是打架。
但反社會破壞都有時見，包括打爆巴士站玻璃、破壞花槽植物等。尤其商鋪，有時會無端端比人破壞，換一換成幾千蚊。（會唔會其實玻璃店扮野自己破壞
）諗到再講。
