卡牌占卜活動~ （雷諾曼+塔羅）

笑死 感謝你嘅 feedback

好！我諗住剩低呢一個月時間 同佢保持返普通同學/朋友嘅關係 唔特別搵佢約佢 一大班人食飯就照一齊去 亦唔點避開佢

我本身都諗住下個月尾臨返香港個陣 message同佢講我嘅真心話 由我對佢第一印象 到中間想搵佢約佢 中意佢嘅過程 對佢嘅諗法等等 一五一十咁同佢講清楚

希望到時成功send到message比佢啦

你嘅性別：男
問題：冇對象 想知道未來幾個月的感情運

雷諾曼 要之後先驗證到
不過機會較微
塔羅嗰部分幾準
謝謝🙏🏻

你嘅性別：男
對方性別：女
問題：最近因為工作緣故同一個都細我好多下嘅女仔熟落咗，最近做咩都會成日諗住佢，想知會唔會同佢發展落去？

未來幾個月嘅感情運：

雷諾曼： 樹 + 百合花 + 分岔路
塔羅：戀人逆 + 聖杯十逆 + 權杖侍者

雷諾曼嗰邊顯示，呢個狀態維持咗都一段時間，但係你自己就比較悠然自得（？）分岔路亦表示，如果要搵對象，就唔好行舊路（有啲踏出舒適圈嘅意思）

雖然你問呢個感情運嘅問題，但係牌面上覺得，似乎都幾享受單身 覺得單身嘅自己都冇乜缺乏嘅嘢，感情係錦上添花的 feel

塔羅嗰邊都係話要探索多啲（真係有行動力出去探索），就會好啲，目前比較係自己一個都好舒服嘅狀態。

我修改咗少少呢個問題，改為「同呢個女仔嘅後續發展是怎樣的」

雷諾曼：狐狸 + 四葉草 + 鸛，隱藏牌信件
塔羅：魔術師 + 戰車 + 寶劍一逆

首先雷諾曼嗰邊，狐狸代表工作，四葉草代表幸運，結合起嚟就，喺呢個工作遇到幸運（認識彼此），而後續係鸛，隱藏牌信件。四葉草係一個比較短期嘅開心，鸛係會遷徙再回歸嘅鳥類，再加埋信件牌；
我覺得你同呢個女仔嘅相遇係彼此都好開心，但係後續可能會分開一段時間，不過你哋都依然可以有信息交流（例如 email / WhatsApp 等等），去維持你哋之間嘅關係。

而塔羅嗰邊，魔術師同戰車都係大牌，而且係代表彼此有好多思想碰撞交流，戰車有平衡關係 + 保護對方的意味。但係問題係仲有一張牌係寶劍一逆位，你哋應該有其中一個人唔敢踏出一步，明明好好傾，相處又開心，但係思想上唔敢。

我補咗一張牌係聖杯六逆位，代表關懷照顧，呢段關係嘅本質都係會 take care 對方，但係如果要向前突破去到情侶關係，要解決咗寶劍一反映嗰個「唔敢」嘅問題先。

師兄有料都幾準下
是的 我覺得一個人好舒服牙
而且依家都得返事業
單純父母催

雷諾曼：十字架 + 女人 + 棺材
塔羅：寶劍侍者逆 + 節制 + 寶劍國王逆

就牌面上嚟講可能忟水少少，十字架代表負擔同壓力，棺材代表階段性結束，而中央嘅女人，面試官有女性嗎（？）

塔羅方面就講心態上比較依靠邏輯，面試上面亦都展現自己嘅條理性多啲，但係有時可能對方都會睇你個態度誠唔誠懇，比較 prefer 中庸之道 / 有手碗，而唔係出風頭、好聰明醒目嗰種人，如果再 in 呢份工可能要調節一下心態。

感謝 feedback 原來喺屋企人催

師兄大癲
真係講得好準，因為呢件事搞到我有啲內耗，亦都有離職嘅想法但其實我唔知佢點睇我，因為佢一時熱情一時冷淡，再加上之前係感情路上有唔開心嘅嘢發生過，所以我唔夠膽主動

感謝你嘅 feedback

其實我哋占卜，只係睇「如果維持而家呢個心態同行為，後續會點樣」，當你嘅心態同行為變化咗，未來亦都會有唔同。所以點解啲人話「趨吉避凶」（見到吉嘅結果，要維持而家嘅行為同狀態，唔好鬆懈；見到凶嘅結果，就改變自己，務求創造更佳嘅結果）

一切都睇你由而家呢一刻起，打算點樣做

呢個 post 會覆到 1001 為止，主要係 for 練習雷諾曼（但係會輔以塔羅，費事錯得太離譜），準確度嚟講一定係塔羅嗰 part 高啲，因為熟手啲。

希望儲得夠案例之後，可以將雷諾曼上手。
大家嘅疑問會盡力於 24 小時內答 希望有人覆~
（可以畀 feedback 我！ 準同唔準都可以講，等我修正下解得唔準嘅地方）

你嘅性別：男
問題：今年會轉新工嗎？因為最近去左final in

hi 巴打

我前面問過同個女仔距離遠左，今次想問去留（同上次個件事冇關）

你嘅性別：男
對方性別（如有）：冇
問題：我想問，好冇繼續留多係而家呢個城市到生活多2個月？我一直1516緊，可能係呢邊嘅生活太精彩/熱鬧？搞到我唔想返香港 但香港個邊又有份想apply嘅工 我應該點好？

你嘅性別： male
對方性別（如有）：N/A
問題：
揾左好內工,都揾唔到想做嘅工.
未來應該有咩都做住先,人工都唔太高都照上馬?

謝謝

你嘅性別：男
問題：事業（失業想問短期內會唔會搵到工？

今年會轉新工嗎？

塔羅：聖杯三 + 寶劍騎士逆 + 寶劍六逆
雷諾曼：鸛 + 房屋 + 市場，隱藏牌戒指

我覺得你個工作狀態係會有轉變嘅，應該會轉新工；而且都係一份感受上幾舒服嘅工，人事關係比舊工好。聖杯三有慶祝嘅意思，以及寶劍六逆係指離開整休期，相信2025年係會轉工

雷諾曼方面，抽到鸛，鸛代表轉變，而後面嘅房屋、市場，戒指代表合約，我諗應該係轉去一啲細公司，但係要做業務，面對人群嘅工種。

提問：如果留多兩個月會點？
雷諾曼：十字架 + 塔 + 狐狸

十字架本身係代表一種壓力，而塔係權威組織，狐狸代表工作 / 自力更生，反映如果你留喺度，比較偏向要自力更生，而且會有啲壓力（可能會心思思如果揀咗返香港，去咗做份想apply嘅工會點），玩但玩得唔安樂


然後我用塔羅二選一牌陣抽，
代表你嘅牌： 權杖四逆
留喺度：權杖女皇 --> 女祭司逆
返香港：聖杯四 --> 寶劍六逆

揀留喺度短時間係會幾開心，但係時間長咗會內耗（亦都對應返雷諾曼抽到嘅壓力）；

揀返香港會諗「我咁樣係咪好㗎」，聖杯代表情感，聖杯四有啲情感上嘅憂愁啦，但後面嘅寶劍六代表你會走出呢種情緒。

其實揀兩邊都OK嘅，最重要係揀咗其中一邊就活在當下，好好享受

我分兩個層面去抽今次嘅牌
1. 如果繼續搵自己心儀嘅工，會怎樣？（現實層面，雷諾曼）
2. 如果人工唔高嘅工都照做，內心感受會點？（個人感受層面，塔羅）


雷諾曼：
棺材 + 市場 + 百合花
其實如果你要搵自己心儀嘅工，的確需時會比較長，市場本來就係挑挑選選嘅，而且百合花係代表美好（但也代表用時長），棺材則是結束呢個尋覓。我覺得如果你堅持要搵自己心儀嘅工，係會搵到嘅，但係用時會比較耐，不過同你相性很搭，好啱心水。

塔羅：
寶劍一 + 錢幣四逆 + 聖杯騎士逆（補牌權杖七逆）
如果人工唔高但係照做的話，當然算係諗法上嘅新出路，但係你始終會對人工感到不滿（錢幣四是守財奴，逆位更加強呢種對金錢上感到不足嘅感受），而聖杯騎士逆位，亦都係基於感受上而再次騎馬行走，補牌嘅權杖七逆位代表與人爭鬥。其實就算你搵一份人工唔高嘅工做住先，後續都係會出返去再搵工（同人競爭）。同埋你會一直對個工資不滿。

當然，如果目前財務上係要馬死落地行（做住先），咁個人工可以解下燃眉之急嘅，但係你做耐咗都係會出返去。

我修改咗少少個問題：「三個月內會唔會搵到工？」

雷諾曼：月亮 + 塔 + 太陽，隱藏牌 男人
塔羅：錢幣九 + 聖杯三 + 權杖七逆


月亮本身代表創意 / 工作，而塔代表一啲比較大嘅公司，太陽亦係幸運同成功。我覺得你會搵到唔錯嘅工作，理應係幾好 pay 嘅。

而塔羅嗰邊，錢幣九係滿意，聖杯三係慶祝牌，權杖七呢份工好多人想做，目前睇落去，有土元素，搵工方面應該係穩陣嘅，繼續而家嘅心態去搵、準備好CV同狀態，唔好因為占卜結果吉，就鬆懈自己，keep住應該三個月內會搵到工。

冇啊，我依家喺順其自然
仲未開始特別認真去搵
因為都唔知舊老細嘅態度點
如果佢冇嘢派俾我做
咁我就真係搵其他嘢做了
Anyway thx Ching 承你貴言

多謝覆我

其實畢業左一陣冇野做真係好忟憎.
in左好多間都冇反應,或者唔簡我.
暫時係想賺下錢去下外國做野或者咩都好.

可以睇到我係會做邊類型嘅工作? 9至6好悶個啲?定…?可以周圍去