《第六章．亞比戶｜以利押》(5)
「少主，你以為呢班人本性係咁唔聽話？你睇錯佢哋喇。我見佢哋服待嗰個大衛都不知幾殷勤。」亞干道。
「吓？服待個死𡃁仔就咁認真，對住我就咁俹簁？」以利押馬上怒火中燒。「嗰個𡃁仔係咪老竇親生嘅都未知啊！」
「 大衛少主唔係親生？」亞干故作驚訝。「以利押少主，呢啲說話無證無據唔可以亂講啊。一陣傳到去耶西主人耳中，影響你哋兄弟情就唔好啦！」
「如果個𡃁仔係親生，點解老竇對佢咁冷淡？如果佢係親生，點解佢啲膚色髮色同我哋完全唔同？計我話，佢根本上就係啊媽出去勾佬生出嚟嘅野仔。」以利押愈講愈覺得自己有理。
「有啲咁嘅事？」亞干又再故作驚訝，但那惡心的虛偽竟使以利押更相信自己的謬論。「如果係咁，可能少主你應該同耶西主人講清楚喎。」
「有鬼用咩，老竇咁愛啊媽。可能佢一早知啊媽勾佬，但都照養住個野仔呢。」想到這，以利押不禁失望起來。「唉，無喇。我呢個長子喺啲僕人眼中竟然唔夠一個𡃁仔地位高。細細個就已經係咁。到佢再大個啲， 我仲邊有埞企吖？」
「以利押少主，我就唔係咁睇喇。」亞干突然換了一種叫人不寒而慄的聲線，一種似乎該用「老奸巨滑」形容的聲線。「我覺得可能耶西主人都喺度煩惱緊點樣處置大衛少主。如果佢唔覺得大衛少主係野仔，佢又點會一直都唔想同佢親近？但你知道啦，耶西主人一向都好要面。如果佢出聲懷疑拉結主母，成件事一定會招嚟好多人嘅閒言閒語。所以佢先要繼續容忍大衛少主唧⋯⋯」
「有道理。繼續講。 」以利押點頭稱善。
「如果係咁，你同一眾兄弟出聲，質問大衛少主嘅膚色點解係咁⋯⋯代耶西主人講出個事實：佢唔係野仔就係被惡魔詛咒，所以你哋兄弟要同心為耶西家誅除惡魔。耶西主人雖然唔可以明面上同意你哋，但佢可以扮成阻止唔到你哋。咁樣，佢都可以借機鏟除呢個野仔，又唔使招來話柄，佢心底一定會好多謝你呢個識做嘅長子。到時，耶西主人都可能會借啲意話你哋無理取鬧，少主你只需要指出大衛少主嘅髪色膚色同大家唔同呢個證據，其他想出聲維護佢嘅叛徒都無嘢好講啦。咁樣，耶西主人既唔反對，其他人又無嘢好講，你就可以快刀斬亂麻⋯⋯到時，成個耶西家入裡就得返以利押少主你一個話事人囉⋯⋯」
「哈哈哈！講得好！不愧係我嘅忠僕。」
這一天，他們二人的咯咯笑聲震得被醺醉的房子也一起抖動起來⋯⋯
--------------------------------------------
筆者Facebook:
https://www.facebook.com/people/雷寂/61573858342296/
追故po:
https://lihkg.com/thread/3902189/page/1
（P牌冇得推po，每次出新po 同時都會update依個追故po）
致非基督徒讀者的話：
作為非信徒的你，相信早有耳聞大衛和歌利亞的故事。但讀到此書，卻可能會感到十分不解。看見「耶和華」、「上主」、「造物主」等字眼，可能你心中不免想起那些街頭宣教士；或者是那些音調不對的粵語詩歌、或是你中小學的「幼稚」、跟「女禍補天」、「嫦娥奔月」等同樣可笑的宗教教育。
我明白這些都可能會引起你自然的反感。然而，筆者並沒有打算在這本書中「講經」，跟你說「信耶穌，得永生」。然而，假如你只看大衛的行為，將他的信仰抽離，但就如同不理說話的態度，無視語氣和情境，單憑字面意思去理解一個人的說話一樣。
所以，我懇請你嘗試帶著開放的態度去觀察和理解書中各個角色的信念。雖然不少角色都相信上帝的存在，但他們與上帝的溝通和相處方式都迴異不同。當中有人心悅誠服，有人懷恨在心，有人不置可否⋯⋯但他們對上帝的態度卻沒有直接決定他們的下場。和人生一樣，有好人枉死，也有壞人笑到最後。這不是一個信上帝必勝，正義必勝的童話（至少在塵世間）。事實上，上帝從沒有寫過一個如此幼稚的故事。
敞開心扉聆聽他們作為信徒的內心對話並不等同你認同上帝存在，或是認同祂的美善；但至少，你的視野會變得更廣闊。起碼，你會知道信耶穌的人為甚麼有所為，有所不為⋯⋯你甚至可能會明白為甚麼有人雖說自己信耶穌，但卻能面不改容地做出大奸大邪，連無信仰的人也不會做出的惡事。
如果你願意一試，筆者相信此書不會令你失望。