太極虎走下坡 南韓星二代轉投「死敵」日本
日本同南韓都係東亞地區嘅足球強國，不過南韓近年嘅實力同國際賽成績都唔多理想，甚至連南韓傳媒都認為日韓之間嘅足球實力正逐漸被拉開。正所謂人望高處，有得揀嘅話，相信唔少人都會揀一支有實力同有前途嘅球隊效力。最近有位南韓星二代就選擇咗為日本披甲，仲成為咗兩國之間嘅熱話。
金正民係90年代出道嘅南韓歌手，及後轉型成為演員，佢喺2006年就同日本歌手谷留美子結婚，之後仲生咗三兄弟，其中大仔同第二仔不但去咗日本生活，而且仲成為日乙球隊鳥棲砂岩嘅青年軍成員，大哥谷泰養係一名守門員；而二仔谷大地就係一位前鋒，而今次嘅主角就係大地喇。
谷大地同大哥原本都跟爸爸姓金，而且自小都喺南韓生活，亦都效力過FC首爾嘅青年軍梯隊。佢哋三兄弟都係足球員，大哥泰養同大地因為極之希望效力日本嘅球隊，因此就決定去日本升學同踢波，而且仲喺當地改咗同媽媽一樣嘅姓氏。
2008年出世嘅大地雖然今年只係17歲，不過身高已經有184cm高，而且身材亦都好健碩，喺同齡嘅前鋒球員之中相當罕見，加上佢嘅入球能力亦相當不俗，因此唔單止好快就順利加入鳥棲、而且仲入選埋日本U17代表隊。喺上年10月嘅U17亞洲盃外圍賽對尼泊爾嘅比賽，日本就以9：2大炒對手，其中谷大地個人就獨取4球，成為咗全場焦點。
轉投死對頭國家，仲要有唔錯嘅表現，如果谷大地喺其他國家嘅人嘅話，一早畀人咒到阿媽都唔認得。不過南韓網民唔單止冇鬧佢，反而仲覺得谷大地做咗個正確嘅選擇㖭。有南韓網民就指出，當地球壇其實已經腐敗不堪，正常人有得揀都會揀去日本球壇發展，甚至有網民恭喜佢。亦有人表示，谷大地本身就有一半日本人血統，選擇效力足球實力更強更先進嘅日本亦無可口非，假如佢留喺南韓反而會浪費咗自己嘅才能。
日本U17今個月初就出戰喺沙地阿拉伯舉行嘅U17亞洲盃決賽周，谷大地喺今次賽事之中都射入咗1球。雖然日本喺星期日舉行嘅8強互射12碼不敵東道主沙地，無緣喺4強上演日韓大戰，不過日本仍然順利奪得今年11月喺卡塔爾舉行嘅U17世界盃決賽周入場券，即管睇吓谷大地到時有冇機會進一步衝出世界啦。
文：#薰爵
#keymansoho #ko求驗客 #日本足球 #
谷大地 #U17亞洲盃 #U17世界盃
知自己姓金會俾M子燈死, 所以轉籍日本人保平安
腦震盪3日好？
醒撚到
