老鋪黃金搭緊雞棚？

Steven串錯字 · 2025-04-01T23:47:32+08:00

1. 港股今年首季跑贏全球，但講到今期股王，絕對唔係騰訊(00700)或者阿里(09988)等科技股，而係有「黃金界愛馬仕」稱號嘅老鋪黃金(06181)。 2. 該股去年6月底上市，用咗大約九個月，股價由40.5元升到今日收市868元，累升2,043%，總市值達到1,461億，已經遠超行業龍頭周大福(01929)嘅889億；前者PE高達197.3倍，後者只有19.87倍。換言之，老鋪黃金估值貴得十分誇張。 3. 問題在於，老鋪黃金值唔值得咁貴？定係搭緊雞棚？ 4. 有好多分析指佢股價受惠金價破頂。不過參照周大福同期股價升幅只有12%，周生生(00116)只有3%升幅，A股老鳳祥更加跌9%。同樣背景下，好難解釋只有老鋪黃金股價可以升超過2,000%。 5. 第二，就係老鋪黃金以「古法黃金」為賣點，包括手製金飾。不過，話明係「古法」，即係唔係佢哋獨家啦。其實周大福同周生生都有古法黃金產品，如果上Google，第一個跑出係謝瑞麟(00417) 。雖然老鋪黃金定位領先，但any肥，用呢一點炒上咁多有啲牽強。 6. 而公司同其他金舖最大嘅分別，就係佢哋嘅銷售手法，除咗用「古法」呢個idea走產量少同高端路線，佢哋嘅金飾並非傳統以黃金重量逐件計，而係好似Tiffany或者Cartier咁，按産品設計統一定價。正如劉華咁講：比鬼佬睇到以為我無錢比，拎走個磅佢！呢種經營方式，係內地絕對係罕有。 7. 有內媒統計，如果換算每克計，老鋪黃金嘅產品售價比同行賣貴超過15%。以2月24日為例。老鋪黃金吊墜產品折合每克金價1,088人民幣(連手工)，同日周大福等同業金價為889人民幣(不含手工)，意味老鋪黃金賣得特別貴。 8. 翻查業績，老鋪黃金去年毛利率高達41.2%，而周大福截至去年9月底止毛利率只有31.4%。 9. 不過，賣得貴反而無影響老鋪黃金銷售。去年銷售業績增加166%至98億人民幣，經調整盈利增加253%至15億人民幣。去年底，公司只有36間自營店，但每間店平均銷售業績超過3億人民幣，全國第一。證明公司定位同銷售策略正確，可以解釋股價炒高部分原因。 10. 炒得起別一個主要原因，都係要睇街貨量，大股東徐高明父子合計持股67.6%，而前九大股東持股達1.33億股，佔總股本80%左右，意味貨源歸邊。 11. 講到呢到，到成篇文嘅重點。公司收市後發通告，表示獲聯交所批准將徐高明持有4,039萬股內資股，轉換成H股，以今日收市價計，市值約350億元。而徐高明等主要股東禁售期，將於今年6月27日收市後結束。