依家，我哋要用三法印去講講緣起所顯示嘅真理——分解咁講係三個(實際上卻只有一個)：
諸行無常。一切事物既然喺因果之下，就會不斷流變，其中並無一個永恆不變嘅嘢。呢點，喺古代確實係難以理解，就好似聰明嘅亞里士多德都認為星體係永恆不變。但係近代科學進步，已經令人知道：再久遠嘅嘢，都會變化。但要記住，萬物必定變化只係一個外表，佢嘅核心係「諸法沒有不變性」（頁一五）。因為一切存在事物都只不過係因緣和合嘅假相，無一個乜嘢係獨立自存。就好似一間屋，睇落係一體，但係仔細推敲，就會發現屋係由磚瓦木石所合成，無咗磚瓦木石，屋就唔存在。「五指伸開來，拳還能存在嗎？」（頁一六）於是，實體係假，而我哋只係稱緊因緣和合嘅假相做實體，若然有人苦苦追求一個永恆不變嘅實體，咁佢就只係希望一個必定變化嘅假相成為永恆不變嘅概念，但呢種概念，並無根基。
諸法無我。喺佛法當中，對「我」有特殊定義。呢度嘅「我」，係一種「我執」，若然我執著於我要擁有呢件衫、呢個麵包、呢架車，咁就我執希望主宰呢個世間嘅事物，呢種主宰永無止境，我唔係要主宰佢一秒鐘、一分鐘、一個鐘，而係要永遠主宰佢——當我可以永遠主宰佢，我亦同樣成為永遠。無我，就係無一個執著於永恆嘅我、無一個渴求主宰他人嘅我、無一個依據身體情欲而行出種種惡行嘅我。
涅槃寂靜。一般人眼中嘅世界，總係動亂差別，因為佢眼中有蘋果同橙嘅分別、人同狗嘅分別，認為蘋果有蘋果嘅本質、橙有橙嘅本質、人有人嘅本質、狗有狗嘅本質，要為蘋果、橙、人、狗嘅本質分個高低。但係呢一切嘅動亂差別，係源自於見到種種事物嘅唔同，而涅槃寂靜，就係從繁花綠葉嘅唔同色彩背後，見到影子嘅一致。種種事物嘅唔同，就好似波浪一般，佢被風所吹起。若然風能夠平息，咁水就會回復平靜。影子一致，就係無常；水回復平靜，就係無我。
