Day 1:
班機就早上8點多起飛，唯有搭的士早上6點前入到機場，假期第一天，已經好多的士/私家車排住隊停一停離港層外既位，就連過安檢都大排人龍，果然大家離港消費
早上6點好多餐廳都未開，快速食過早餐就去閘口登機，數一數原來都好耐無搭國泰。飛去吉隆坡都係4小時，上機食完野當然係閉目養神啦。
吉隆坡上空
去到吉隆坡上空都會遇到氣流，不過都平穩落地，1點幾就到啦，估唔到機場都有welcome drink,不過就好甜
機場裝飾
Welcome drink
拎埋行李就call grab ，都係70幾馬幣，兩個人拎住行李係抵搭，大概50分鐘就去到市區，不過入酒店一段路就有d塞車，所以最後3點幾先check in。
黎到吉隆坡，估唔到d大牌子酒店相對唔貴，左揀右揀之下，就揀左Ritz Carlton，普通雙人房都係$8xx/1晚，而附近主要都係萬豪系酒店。地點更加係武吉免登區既Pavilion Kuala Lumpur (柏威年購物中心)斜對面，呢區大家都知都超級多人，特別係黃昏至夜晚時段。不過一轉入酒店區就寧靜嘅，所以都幾推薦大家住呢區酒店。
房間
酒店外觀
酒店硬件就絕對唔差，景觀就當然冇咁靚啦，始終唔係喺雙子塔嗰邊。不過比較意外嘅係呢品牌酒店應該係雙洗手盆，吉隆坡就單洗手盆。
之後就出去順便唱咗錢先，就算四點都好，呢區都係多人嘅。
Pavilion Kuala Lumpur (柏威年購物中心)
區內商場
途中經過阿羅街夜市，好多舖頭都仲未開門。
日頭既阿羅街
我哋就book咗個馬來西亞式按摩，係阿羅街夜市後面，店舖面積偏細，都做2小時既，做完之後都發覺都係泰國好啲。
按摩鋪內
做完都接近7點，係時侯食野，係對面搵左間娘惹菜，初頭大家都用英文普通話對答，點知後來見我哋講廣東話，佢講廣東話。喺吉隆坡絕對唔需要擔心溝通問題，好多華人都識講廣東話
舖頭外
娘惹菜
野食好食又唔貴，難怪唔少人黎吉隆坡純食野
食食吓就落好大嘅雨，好似香港既紅雨，兩粒鐘先收細
落雨既阿羅街
覺得有d餓，去左地庫food court（10號胡同）叫左幾間出名既菜式，例如福建炒麵，蠔煎，蜆湯
，之後再食多個雪糕，慢行返酒店抖。
