[Live] 獨遊3 廣島 不定時update post

今日12點既我
又再次出現係三原站
今日行程係去大久野島
發現三原呢個新幹線車站
係幾多景點既轉車點
係三原巷一樣可以坐船去大久野島

當然都可以跟返常規路線
搭JR去忠海港搭船去大久野

因為JR列車 新幹線 船等等
轉車之間班次可以隔好耐
所以大家出發前一定要留意清楚
以免轉車果陣要等好耐

正因為搭完新幹線去三原站
離下一班船仲有一個鐘
所以焗住要搵個地方休息
咁都好 最近獨遊上遇到幾多錯折
望落行程唔多 但實際感受好chur
舟車勞頓 心情都開始有壓力
咁岩都比個機會放空下自己



大久野島一路上
有唔少關於兔仔既設計
同時座島亦背負陰暗既一面
行入去會見到一啲以前毒氣製造既痕跡



有一座荒廢既神社 慰靈碑 防空壕跡


呢座毒氣資料館好推薦入去
可惜拍照禁止
入面陳列哂一戰後製作毒氣既歷史資料
有唔少製作毒氣既工具 工作服
受難者資料 戰後治療等等
雖然係日文 但睇漢字大部分都理解到

當你見到一棵棵棕櫚樹
代表你已經到達大久野休閑村

入面有好多遊客休憩
亦都有好多精品任君選擇

幫人買左瀨戶內海限定Chiikawa精品

我相信唔需要我形容
都睇得出個咖喱飯有幾伏
建議唔好係休閑村買太多野食


入黎之前唔記得買兔糧
而休閑村係無兔糧買既
係地下執左少少人地既兔糧
稍為體驗下喂兔仔既感覺
d兔仔有野食都未必采你
所以想摸兔仔記住入黎之前買定

係Googlemap睇定下班船16:05到著
而休閑村既接駁車係15:50開出

要離開呢座咁靚既島
有少少唔捨得

到達忠海港
天色已經開始昏黃
港口有間文藝風格既精品店

內裡主要賣特產零食或者野食
有一大班遊客排隊埋單

港口下既黄昏
永遠都係最靚既光景
可惜冬季既黃昏好短暫

下一站 出發去竹原老街
要趕住係日落之前去到

忠海港行5分鐘左右就到達車站
吳線往竹原方向既班次好疏落
所以要留意離開大久野島既時間點
方便自己唔需要等太耐車


到左竹原車站喇
前往竹原老街步行路程大約16分鐘
一路行一路望住個天慢慢變黑


竹原係江戶時代製鹽製酒既地方
亦都係浪客劍心既取景場地
老街既建築風格保留左既江戶氣色

可能開始入夜
沿路剩係見到幾個遊客
而且整條老街都係拉左鐵閂
好似冇乜商戶做生意咁
只有幾間餐廳同酒店開放緊

行上樓梯就見到盞射燈照住西方寺

係日落最後既時光
勉強係西方寺俯覽哂整個竹原
今日都算任務達成

係tabelog搵左間評分頗高既餐廳
行返出老街行18分鐘左右就見到

太華園
呢間係泡製尾道拉麵既餐廳
廣島除左食廣島蠔 廣島燒
一定要試埋尾道拉麵
叫左個set跟飯同餃子

呢款拉麵食落係頗重口味既醬酒風味
味道幾豐富 有油脂香味
同一般醬油拉麵比較味道好唔同

初初心諗點解要比個白飯我
拎麵個湯底撈飯又幾好食

請問日本踩單車係咪要有頭盔先踩得
一直想試下踩單車去四國，但未認真plan

巴打你踩單車有冇頭盔
日本踩單車好似強制要