[遊記]袋鼠的獵殺與救贖 - 澳洲內陸攝影之旅

Lm

雖然冇發生啲咩危及生命嘅嘢
但真係有俾人特登撚過幾次後面會寫

所以我同佢哋溝通嗰陣都非常謙遜同有禮貌
晚晚都會請人飲酒
加上佢哋講嘢口音好難聽 聽唔明我就咩都OKOK
所以佢哋應該係覺得我係一個幾easy going嘅水魚asian

好特別ge主題研究，gchi

Lm

喺從凍肉倉揸返酒吧嘅路上，Cujo又兜遠路帶我去睇一樣嘢：圍欄。

佢解釋俾我聽，呢度嘅農場主會起圍欄去阻止Dingo（澳洲野狗）進入佢哋嘅領地，但係事實上根本唔係咁——係為咗防袋鼠。點解要防袋鼠呢？因為袋鼠會同牛羊爭草食，同埋啲爪會破壞農地喎。但係就係因為農場與農場興建起呢啲圍欄，所以啲袋鼠就被逼要向中間行，而中間條路，就係大馬路，呢個亦都係點解咁多road kill嘅其中一個原因。



我哋沿住圍欄邊向前揸（全部都係爛地、草地），唔洗幾分鐘已經見到四五隻袋鼠喺我哋前面跳緊，Cujo放慢速度俾我好好地影相。前面啲袋鼠好努力咁樣想翻過圍欄，坐喺車裡面唔開窗都可以好清晰聽到啲袋鼠想跳過去但係撞上鐵絲網發出嘅「澎澎」聲，Cujo仲激動過佢哋，係咁喺我隔離嗌”Jump you cunt!”（如果佢講廣東話可能會係「跳啦撚樣」）。最終大部分袋鼠都跳到過去，而有一隻試咗幾次發現唔得之後就向反方向跳走咗。

「跳啦撚樣！」（設計對白）


出街前更新多一篇

強帖留名
其實你驚唔驚個袋鼠獵人 講講下佢唔老嚟發難

唔驚佢發爛渣
驚佢唔俾我影多啲

動物保護係好但咁多袋鼠有咩謂
咪增加駕駛者危險

返到酒吧我就捉Cujo坐低簡單做個interview。點解係「簡單」咁做？因為佢長期坐唔定，周圍郁周圍望，好難專注喺一件事上面，所以個interview都非常簡短。我問咗佢關於呢個鎮，關於佢自己，關於呢個行業嘅一啲背景。

佢今年53歲，打咗超過三十年袋鼠，雖然身為袋鼠獵人，但係佢反覆強調幾樣嘢：

1. 佢崇拜同尊重袋鼠（就好似日本人好尊重三文魚），甚至乎紋咗隻母袋鼠喺條腰中間
2. 佢係一個有道德嘅獵人，唔會對母袋鼠開槍，因為袋裡面有bb
3. 如果喺路邊見到有需要被拯救嘅袋鼠，佢甚至會將佢哋送去隔離鎮上面嘅救援義工屋企



最後佢好真誠咁同我講，其實佢唔需要殺好多袋鼠，每晚殺三四十隻就夠。

講完佢就起身，跑咗唔知去咗邊度。

佢喺採訪提到嘅救援義工其實我早喺出發前做research嗰陣已有所聽聞，佢就住喺距離Aramac大概100公里外嘅另一個小鎮上，係估唔到原來一個殺一個救，兩個人居然係會互相認識，睇黎澳洲內陸人真係太少啦！同時我又喺度諗，既然兩個人互相認識，兩個地方又咁近，咁我不如索性將「救援」呢個主題擺埋入我嘅攝影項目裡面，報導角度會唔會更加持平呢？除此之外，Cujo仲透露一個訊息：第二日嘅貨車將會將啲袋鼠肉送去700公里外嘅另一個叫Roma嘅鎮上嘅肉廠，而佢同肉廠老闆都有啲交情，可以幫我鋪橋搭路。

做完interview後我返入房，開始用個shitty wifi做資料搜集，我嘅攝影項目喺呢一刻由最初嘅單純影殺袋鼠，慢慢延伸成一個更加龐大嘅主題...

喺Aramac嘅第一晚，其實係又興奮又忐忑。興奮嘅我想影嘅嘢就近在眼前，雖然第一晚冇得影，但至少人哋已經應承咗我第二日會有；忐忑嘅係，同Cujo短暫溝通之後，雖然覺得佢對我幾nice，但係好似有啲忽忽地，唔係幾正常，究竟第二日會發生咩事，一切都係未知之數。

第二日晏晝，Cujo話自己唔得閒，搵咗第二個叫S嘅女獵人手下，話佢會look after我。S帶我到凍肉倉睇佢哋係點樣將袋鼠肉運到貨車。Cujo嘅15歲嘅細仔G都喺度。
（呢度之所以用單個英文字母指代係因為我已經唔係好記得佢哋嗰名係點串甚至點讀）




呢個凍肉倉比起琴日嗰個大至少一倍，裡面裝咗過百隻袋鼠屍體，嗰陣血腥味更加濃烈。一架大貨車駛近凍肉倉，然後S同G以及其他工人就唔知喺邊度搬咗條鐵軌道出黎，架喺凍肉倉同貨車嘅天花板，將兩邊連接起，然後透過軌道將一隻隻袋鼠屍體推向貨車。雖然G年紀輕輕，但係佢已經非常熟練呢一切操作，睇得出佢嘅存在就係代佢老豆監工。

我筆記裡面係咁寫：「牠們的頭顱和腳掌早已被切下來，雙爪交錯地倒吊在凍肉倉裡，頸部的傷口已凝結成血塊，我勉強能憑那碩大的尾巴勉強認出這是什麼物種——一點也沒有袋鼠的樣子——景象十分瘮人。」



大概搞咗兩三個鐘，由下晝搞到天黑，清空所有袋鼠肉，貨車都揸走咗。我當時心諗，既然凍肉倉已經清空，天又開始黑，咁應該係時候帶我去打獵啦掛？於是我問女獵人S，係咪今晚會帶我去打獵。佢點起一支煙，話自己頭先搬袋鼠肉嗰陣飲太多啤酒，又好攰，今晚唔係咁適合，聽日先啦。然後指揮其他工人揸車帶我返翻鎮上面。

人生地不熟，我唔敢去爭取，只能默默聽從佢哋嘅安排——聽日應該就可以去打獵啦掛。

睇到呢度嘅巴打歡迎俾啲意見我
係想睇多啲相定睇多啲字
或者關於攝影上嘅問題都好歡迎

高質post留名

其實黎到Aramac嘅呢兩晚我都冇啖好食，對於我呢啲溫室小花而言，呢度啲嘢食實在太污糟，周圍都係烏蠅，而且佢哋去廁所或者摸完袋鼠屍體都唔會洗手，所以你絕對唔會想食佢哋煮嘅嘢當然，佢遞俾我我都有比面食，大讚佢煮得好啦（其實係好撚鹹）

衛生情況之差，甚至有時想去廁所我都寧願去附近嘅公廁都唔想用酒吧嘅廁所。澳洲真係好神奇，公共建設其實真係一般般，但係即使去到偏僻嘅內陸小鎮，鎮上嘅公廁都有清潔工人每日打掃，加上鎮上本來人就唔多，所以公廁仲乾淨過好多人屋企嘅廁所

所以訓醒之後我決定今日要食返餐好嘅。我問定Cujo今晚係咪有得打袋鼠同埋幾點，得到肯定嘅回覆之後我就揸車一個鐘去附近一個比較大嘅城鎮Barcaldine覓食。

雖然話比較大，其實都係只係住咗1500人，但喺內陸黎講已經算係咁，起碼有超市有cafe有餐廳有酒店有銀行甚至有火車站（雖然班次頻率好似係一個禮拜一班咁上下），好唔容易終於可以食返啲似樣少少嘅嘢食，同埋買返幾個杯麵返Aramac夜晚食。



Barcaldine喺歷史上都稱得上係一個幾有意義嘅城鎮，因為呢度係澳洲而家嘅執政黨工黨嘅創立之地，所以喺市中心會見到相關嘅博物館同雕塑以及紀念碑。我自己就對澳洲政治唔係太了解，本身想入博物館睇下但係發覺冇開門（後來幾次黎Barcaldine掃杯麵都發現冇開門，懷疑係咪執咗笠？），所以就打道回府返Aramac，期待今晚嘅狩獵之旅。

強帖留名
佩服樓主既勇氣

留名學野

睇到一半，推一下

去完返嚟 有冇變得食少咗肉/唔食部份動物嘅肉/甚至唔食?

睇相都聞到啲肉腥味

鐘意睇依啲遊記 好正🙌

前面啲袋鼠好努力咁樣想翻過圍欄，坐喺車裡面唔開窗都可以好清晰聽到啲袋鼠想跳過去但係撞上鐵絲網發出嘅「澎澎」聲，Cujo仲激動過佢哋，係咁喺我隔離嗌”Jump you cunt!”（如果佢講廣東話可能會係「跳啦撚樣」）。

如果真係 跳啦撚樣，好難想像有幾崇拜 尊重袋鼠

沒能一槍斃命要記錄在案？ 人道理由？ 頭都切左邊個會知？ 定係個頭要交比當局證明無受虐待？ 同埋點解要切腳？

冇依然都係食肉獸
但係我至今都冇食過袋鼠肉
我諗我未來都應該唔會食
後面講到救援嗰part大家會明白點解我會咁諗

都係搞下笑
其實莫講話Outback
Queensland（就算係首府Brisbane）嘅鄉下啲嘅白人都鍾意叫人cunt
就好似香港都會叫啲最熟嘅兄弟做仆街 撚樣
差唔多道理 純粹係一個口頭禪
我覺得佢某程度上係真心尊重袋鼠