繼續講喺Aramac嘅故事。
我本身做research就知道袋鼠其實係夜行動物，打獵係夜晚先開始，所以喺間房settle好就執定器材準備拍攝。但係事情邊有可能咁順利，當我去問Cujo幾點出發，佢同我講因為佢嘅凍肉倉已經塞滿曬袋鼠肉，需要等逢禮拜二（第二日）貨車黎Aramac運走啲肉，清空咗凍肉倉先會繼續打。
但係佢反覆同我強調咗幾次：「我哋每日都打獵，你只需要耐心咁等就OK，肯定會俾你影到嘅。」
我當時深信不疑，一來我上網搵到嘅所有資訊裡面，唯一聯絡到嘅人就係佢；二來佢以前接受過其他傳媒採訪，相信佢對媒體係比較friendly；三來係我當時已經揸車揸咗三日，洗濕咗個頭，除咗信佢都冇第二條路可以行。
但係後來發現佢係講緊大話，或者話唔係全部都係真話，而我都忽略咗好重要嘅一點：佢的確接受過其他傳媒採訪，但係冇媒體影過佢打獵嘅過程，而呢一樣嘢為我後面一連串嘅煩惱埋下咗伏筆。
佢見我咁失望，所以主動提出帶我去佢其中一個凍肉倉參觀。拉開倉庫度門即刻可以聞到陣血腥味，但係嗰陣血腥味又同平時去街市聞到嘅豬肉牛肉羊肉腥味有啲唔同，係再subtle啲嘅。講真，第一次睇到呢個景象係有啲得人驚，雖然唔係第一次見到生肉，但係平時街市啲肉已經切好曬，或者去曬皮，你睇唔到動物嘅形狀，只會當佢係食物，但係面前一排排袋鼠倒掛喺你面前，全部已經斬首，嗰種感覺對我呢啲喺城市長大嘅溫室小花黎講，真係只可以形容係不寒而慄。
佢拎起把刀仔，割斷兩條袋鼠尾，抱住拎返酒吧，話夜啲燒黎食。
寫呢篇遊記比我想像中更花時間
因為要搵返好多當時寫嘅筆記同重新整理影嘅相
所以呢篇應該係今日最後一篇 聽日繼續
）
明白你嘅意思