毛里裘斯足協早幾日公佈咗國家隊名單，有9名球員喺海外聯賽效力，其中最出名係後衛Lindsay Rose，今年32歲，曾經係法國小國腳，雷恩青訓球員，現時效力希臘超級聯賽球隊Aris Thessaloniki。
亦有球員喺英超名隊效力，17歲嘅Gabriel Caliste，現時效力韋斯咸U18隊，另一位小將，前鋒Quentin Lalsing，就效力德國奧格斯堡U19隊。
除咗希臘、英格蘭及德國，仲有球員喺葡萄牙同澳洲踢波，甚至有球員喺盧森堡發展，守門員，法國出世嘅Dorian Chiotti，現時效力盧森堡國家聯賽嘅US Hostert。
而效力本土聯賽嘅，就以Cercle de Joachim SC球員最多，本土派入面，守門員Kevin Jean-Louis最出名，一直以嚟都係效力Pamplemousses SC。
今年毛里裘斯暫時打咗6場國際比賽，成積係1勝1和4負，贏波嗰場，係世界盃外圍賽主場對斯威士蘭，比數係2比1，佢哋喺D組嘅成積暫係1勝1和2負，贏斯威士蘭之外，主場同安哥拉打成平手，對住實力本應高唔少嘅喀麥隆及利比亞，都唔係完全一面倒。
而9月，毛足去到印度參加咗洲際盃，同印度0比0打成平手，另外輸畀敘利亞0比2，因為失球優勢，獲得亞軍。
雖然毛足喺非洲計係弱隊，世界排名178位，比香港低，但實力方面應該比柬埔寨好啲，不能夠因為佢哋喺非洲輸多就掉以輕心。
佢哋同好多非洲國家一樣，都有揾血統兵幫手，因為歷史原因，喺法國及澳洲，有一啲職業足球員都同毛里裘斯有關，二戰後，因為毛國嘅社會問題，令唔少本土嘅Creole，法裔白人，都移民去澳洲生活，今次就有兩名球員喺澳洲出世，其中一位係Stephan De Robillard，現時效力悉尼聯58。
毛里裘斯係港隊久違嘅非洲對手，對上港隊約戰非洲隊伍，係1999年，對手又係毛里裘斯，當時險勝4比3，今次又點呢？
#其他波
真係暗黑兵法
除非垃垃肯放人
