睇完呢套野我一直想黎佐賀遊吓，今次終於搞左個13天獨撚豪華團，佐賀一帶會自駕玩6日，開po記錄吓。
Day1 係琴日，我番夜班，一收工趕12點果班飛機，飛機去到福岡係下午5點，入境後過去toyota攞完車大概6點半，搞咗一輪搞唔掂個車機，最後係用電話導航直入唐津，入到酒店已經8點半，慘過番工。
去酒店途中頂唔緊，飲啖茶食個包再上路！
部aqua都幾好揸，係個車機明明設定有得選apple car play但只可以播歌，車機冇app果個界面冇得連接電話個導航，可能我唔識用。
嚴格來講book果間唔係酒店黎，位置唔好又冇浴缸，仲要行樓梯上4樓，到步擺低行李就瞓死咗。
聽講間野前身係love hotel黎，可能剩係我果間房冇浴缸，
係呀，平係大晒㗎！1080港紙5晚，無敵啦。
Day2 凌晨兩點瞓醒，想話出去買啲嘢食，除咗便利店邊度有嘢食呀？冇呀。
呢頭連すき屋都要早上7點先開門，麥當勞好似早小小，反正半夜應該冇便利店以外既選擇。
半夜三更走去影唐津城，垃圾手機影唔到，都係等日頭再去過。無無聊聊去到七點，食咗個牛丼，就上山。
鏡山。
老實說，我覺得夜晚冇可能好似動畫個夜景咁靚，
同埋冇得揸車去到最盡，行入嚟嘅路夜晚唔知有幾咁恐怖，
日頭已經好恐怖，林間小路好多大蜘蛛，所以放棄夜晚去。
日頭個景都幾好既，但有幾個當地龍友擺緊陣影雀，所以我影兩張相就走人。
鏡山停車場對正個鏡山神社，但9點幾都係無人，想買個運守都唔得，又冇寫幾點開檔。
未完待續
日本d車機勁on9 用an機先連到 試過好多次都係
尊重
