夏至．尾瀨遊記

10:40 會津巴士


衝出關東，突入福島縣
10:20 到達會津高原尾瀨口，同時係野岩鐵道既終點站
列車會繼續沿會津鐵道去會津若松
但成車得我地兩個係度落


個站無咩特別唔特別留念了


跟住就係買手信既地方買左今次要使用既巴士劵
「尾瀨橫斷巴士乘車劵」
包晒尾瀨兩邊既巴士，但只限單程唔係周遊劵
2024年既價格係5800YEN，但無論如何都會平過散買的
至少到時仲可以省略搵散紙散銀既麻煩
呢D車飛用完就會被回收，所以買左就特登影低留念下


跟住就要挑戰呢架路線巴士前往尾瀨既起點
全程兩粒鐘，如果你連九巴53線就頂唔順就建議你三思了

2024年巴士時間表

每日有4班係到出發，但最後一班就太晏了
第1、第3班就夾到東武特急「Revaty會津」
由淺草搭過來就要3個半鐘，跟住直落2個鐘巴士
好鬼痛苦，但呢個路線相信已經係最大路
所以我地選擇左係日光留一晚呢個luxury option
搭第2班巴士呢個少人諗到既

仲有一個方法



呢程巴士沿途風景就好一般
個零鐘到左檜枝岐(ひのえまた)村，條村好大呢到係「中心」
係一條好寧靜既村落
所謂中心係指村公所所在地


天色麻麻地，但只要唔落雨已經好好
巴士一直爬上山，但唔係好chok
所以頭先講笑的，其實無想像中咁難頂，反正幾乎無咩人搭車


先係尾瀨御池落車準備一下吧！



不知不覺已經來到了海拔1500米之地……
待續

留名

12:15 尾瀨御池

最近好似多左登山遠足遊記
呢邊都係時候加把勁進入正片了
不過都戴返頭盔先，我地並唔係登山
雖然都會走過兩三星既山路

有睇開既讀者都知樓主廢話好多
今次絕對唔會例外，所以大家都要有小小耐性


到沼山峠之前先在御池落車
(終於可以落車了，搭車都搭左成3個鐘)

御池標高1550米，約2.5碌東武Skytree咁高
位於福島縣檜枝岐村一部分
一落車已經明顯凍左好多
仲要岩岩落完雨
(粗略來講，每高100米就會凍0.6度)

呢到可以食野同埋補充行裝
最重要係一定要準備道具「熊鈴」
佢可以令你墮入危機時無咁易BAD ENDING
係山區既護身符


山卡啦無咩好伙食，無任何食店
就算要食長野D狗飯都要含架喇
好彩還能叮個「大廚渾身的一品 - 夢之卡邦尼意粉」解決下肚餓
真係要感恩


食多個合味道杯麵暖下身
感恩感恩，令我想去露營了

今日星期五人唔係好多，整體好平靜
不過之後都見到好幾個剛剛落山既登山客入來食野


尾瀨御池係尾瀨其中一個入口
不過就係經過燧ヶ岳登山路線
所以直接係度出發既人都唔少
我地呢個時間已經太晏了，光是登頂就4個鐘
山小屋4點前就要check in架喇


我地唔係登山
所以點零鐘就搭Shuttle bus去沼山峠
好密車大概半個鐘有開一班
因為私家車唔可以入去，駕車人士都一定要搭巴士
我地有尾瀨橫斷巴士車票所以可以繼續搭落去

13:40 尾瀨沼山峠


20分鐘車程到了車路既盡頭 - 沼山峠
也就是尾瀨福島縣側最熱門既出入口

得間休息室，入面都幾多人，但無野食無野買
所以有咩漏一定要係頭先御池或之前搞掂


呢個登山口都相當低調，無咩招牌打卡位之類
確認一下路線圖就出發 (其實就一條直路無咩難度)
要注意既係shuttle bus尾班車
不過我地入去住無返轉頭既打算了

上去既時候正好有堆小學雞落緊山
等晒佢地出返晒來先上去


今日步行路線其實得個零鐘鬆D就完
沿住一個小山坡落到濕原
目標係尾瀨沼旁既長藏小屋


小山坡大致鋪上木路，一開始鋪設得十分好
路線難度只有1.5星
仲輕鬆過流水ひびき行去つるやぶ條家樂徑


呢種有小小密集恐懼既寄生植物(?)真係第一次見


中後開始條木路就會變成雙線
尾瀨基本上係右側通行的
但中間好多截都失修爛爛地
爛得一邊就通常懶得整
所以行人要好似玩動作遊戲咁左彈右彈避開陷阱

14:30 大江濕原


行左陣山路就走出了樹蔭
係一望無際既濕原，終於有種「我來到尾瀨了！」既feel


欣賞下少見既亞高山植物



有分叉路，但先盡快去到目的地吧





亞高山植物


隱約見到日本百名山之一会津駒ヶ岳 (2133米)
呢個遊記只會出現一次咁大把
因為佢係檜枝岐村比較偏離尾瀨
形狀似馬鞍 (其實日本好多個駒ヶ岳，直譯做馬鞍山好了)




不錯的流水


跟住就見到尾瀨代表燧ヶ岳了！
隨處都見到佢既雄姿，所以之後再正式介紹返



正式見到尾瀨既牌了
上次同老婆去左會津若松 https://lihkg.com/thread/3770877
估唔到今次又係會津，仲要係奧會津
好似一個地方加上「奧」了就霸氣好多
奧日光、奧鬼怒、奧秩父、奧飛驒、奧出雲、奧入瀨、奧清河……

但同時又唔知點解屬於關東森林管理局
所以才說尾瀨係一個神秘領土

待續