夏至．尾瀨遊記

尾瀨。位於群馬、福島、新潟、栃木四縣交匯，不為香港人所知既神秘領土，為日本本州最大濕原，擁有與世隔絕既獨特氣候，氣溫比北海道還要低，為東京近郊真正既避暑勝地。其中「尾瀨ヶ原」標高約1420米，該處可飽覽尾瀨地標—日本百名山之一「燧ヶ岳」，為東北最高峰 (2356米)；6月上中旬盛開水芭蕉，吸引許多自然愛好者慕名而來。尾瀨國立公園在2007年自日光國立公園分離獨立。

關於呢個旅行既背景
今次出行本身只係同老婆一齊赴京睇音樂會，但六月實在係一年之中去日本本州最爛既一個月，梅雨丫嘛，至於老鼠樂園新園區又無咩興趣，所以就諗都唔諗從wishlist執返起「尾瀨」呢個人生目標之一，然後極速排好成個行程，一天內就搞掂埋book住宿機票門票。


樓主喜歡橫斷，所以安排了「福島入群馬出」既華麗橫斷路線，用雙腳走過12km山路，由沼山峠遠足到鳩待峠，一次過去晒尾瀨兩大範圍「尾瀨沼」同埋較熱門既「尾瀨ヶ原」，兩處擁有微妙不同既風景。

樓主行程 (4日4夜)
前奏 - 東武SPACIA X．大樹 - 日光鬼怒川快閃
本篇 (上) - 福島側 (尾瀨沼) - 長藏小屋
本篇 (下) - 群馬側 (尾瀨ヶ原) - 老神溫泉 (混浴)
尾聲 - 蒼穹のファンファーレ

尾瀨 Q&A


過去/末來日記

留名跟進

尾瀨都叫東京近郊嚟講...

前奏 (Day 1)
今日主要就係去日光、鬼怒川隨便遊覽下
為第二朝上路去尾瀨做好準備
順便趁呢個機會坐下東武既SPACIA X


前一晚放工飛的仆去機場，拿拿臨搭飛機去羽田
夏至將近，日本4點零鐘已經天光
好多乘客好似未見過天光咁係咁影相


跟住就搭車去淺草同老婆會合 (ハァ？)
大朝早坐到05:37開出既京急快特最爽，其他班次都好慢下
可惜果陣要成個鐘先過到海關而錯過左
去到都係太早無咩好食，本來想破戒食一蘭點知未開門
最後幫襯左吉野家 (其實唔差)




跟住就立即出發去日光喇
乘坐新型特急東武SPACIA X！

lm

lm

07:50 東武SPACIA X


自從近鐵新型特急Hinotori面世以後
私鐵特急既standard似乎提高左
東武SPACIA X係東武電車最新型既特急
佢地頭周圍都係X既廣告


佢有6種座席咁多，我地決定坐Premium Seat舒服D
畢竟我地去旅行往往慘過返工
全程比一般座席只係多560YEN，就體驗來講十分值
大手私鐵財大氣粗，佢地D車貴極有限


不過個人感覺無Hinotori Premium Seat
果種接近Gran Class級別咁屈機就是了


SPACIA X感覺走成熟穩重路線
有D似汽車品牌咁
順帶一提2023年7月面世，而約一個星期之後Twitter就改左名做X
兩者似乎有一種隱藏的關係


過左野原廣志自住物業所在地既春日部之後
就會聽到廣播叫大家scan QR code預約時間去cafe
一開始覺得，去cafe都要搶會唔會太痴線
但呢個安排可避免乘客窒晒係cafe附近，影響乘車體驗


到了第一卡cafe買野食順便J下個車廂
設計真係好靚


因為食左早餐，買小小野食下就好了


天氣還不錯
途經利根川、渡良瀬川風景都唔錯
不知不覺已經差唔多到日光了

待續

6月去多唔多蚊 鬼怒川去尾瀨好似要擲個大彎?

咁鬼凍邊到有蚊
路線睇落去就明 (其實頭post有講)

留名

09:39 日光


唔洗兩個鐘去到日光，坐特急時間真係過得好快
東武Skytree Line+東武日光線線形優良
頂住得JR新幹線去宇都宮轉車
依家JR PASS貴左咁多，都真係多左遊客改變思維


今次係樓主第三次日光觀光
頭兩次都有去華嚴瀑布，一次冬天一次秋天
果陣去都覺得好正


今次就唔上奧日光咁入喇
去參觀下二寺一社吧
講明先是日係超快速走馬看花
因為呢個旅行重點係尾瀨
陣間仲要趕住搭車


搭呢架睇落好似毛毛蟲既低公害巴士就能直入了
佢既特點之一就係本車最高速度限於17公里
幾錢我唔記得了
因為買左東武世界遺產PASS，也可以自由乘搭呢D巴士


路過要俾錢先過到既「神橋」

10:30 日光二社一寺 (超高速)



二荒山神社
歷史自己google啦


五重塔，方丈心情好先開放
以前覺得因為日本人好鐘意搞限定
依家會覺得呢D建築場其實好脆弱
同埋都係果D日本社會問題啦


東武地頭一定會有既野
東武Skytree點解會起到634米
係「武藏 Musashi」既日式食字詣音
634米到底有幾高？如果呢碌野起係香港
會高過晒太平山頂、飛鵝山頂、天壇大佛個頭




最後係2018年完成左平成大修既輪王寺


睇落似大禹神針還是炮烙之刑既柱
唔記得有咩用了，但佢應該係叫做「相輪橖」


歷時個半鐘，走luu

13:03 SL大樹


其實我就係令和元年搭過一次SL大樹
今次帶埋老婆一齊搭

SL大樹基本上每日都會運行
算係現時最容易搭到既蒸汽火車
但時間分為A、B、C、D、E、F、G、H共8款
今次搭到E形態既「ふたら」
即係會行晒東武日光ー下今市—鬼怒川溫泉兩段
全程成個鐘


開車前會有人打鼓助興


列車通過鬼怒川
好多黑煙


車廂就好普通，車內飲食亦好頹
加上全程都有個用扮Vtuber講野既大姨係到講講講
介紹下東武呀、介紹下條河呀
去到東武世界之窗又叫大家望下果碌假鳩呀
總知就係うるさいうるさいうるさい


小佐越通過

13:06 鬼怒川溫泉


個人感受就係呢架SL大樹唔洗特登去搭喇
去開日光鬼怒川玩順便夾到就無妨
當係成個東武園區其中一個機動遊戲咁樣既存在會gur d






過晒氣既鐵道娘x5 (我5年前個遊記已經係咁講)



今日難得有小小時間就睇下呢到有咩野啦
不過行完就會走了，呢到D住宿唔太吸引所以會返日光

15:00 鬼怒楯岩大吊橋


行路走到了鬼怒川
睇下點樣可以行去河既對面
尋找一下傳統中既廢墟


點知好似去左另一個方向
來到了呢個鬼怒楯岩大吊橋


放心呢條橋好穩陣的
唔係靜岡大井川果D隱世古吊橋好似隨時會斷開咁


吊橋中間可以欣賞鬼怒川溪谷兩邊風景


「聳立在吊橋對岸的楯岩充滿男子氣概，恬靜的鬼怒川則帶有女性化氣質，鬼怒楯岩大吊橋將兩者相連結，故又以「結緣橋」之稱聞名。」


跟住就沿遊步道登上展望台
唔係咩山路，一般人能行


好似一定要穿過呢條黑媽媽隧道
惺迎面都有遊客行返出來，應該無咩野掛




條隧道兩三分鐘姐
無蝙蝠無骷髏骨etc



再爬上睇落唔係好穩陣既鐵梯就到左頂上展望台了
鬼怒川市區全景一覽無遺
紅葉期既話相信景色都唔差

跟住原路返落來
竟然撞到團客，佢地仲要講廣東話
跟住見到架團車，原來係永安
旅行團來呢D地方都有D……
不過遠處都聽到班C9係咁扮鬼尖叫聽落玩得好開心

以下照片可能令人不安，慎入

回程既時候路邊見到D好可怕既野
今次真係撞鬼喇

16:37 下今市


從鬼怒川溫泉搭普通車
約25分鐘到左下今市，東武日光線同埋鬼怒川線交匯
特急列車正常都會停呢到
以前位於日光市附近既「今市市 (いまいちし)」
現時已被合併，如今日光市成為日本面積第三大市
(第一位：岐阜県高山市，第二位：静岡県浜松市)


下今市對東武鐵道係重要車站
擁有車庫同轉車台，SL大樹就係住係度


睇SL大樹收工


資料館主要介紹SL大樹既歷史
btw有位著名Youtuber既簽名到此一遊


跟住就去搵晚餐
下今市夜晚比較多野食，如果日光住宿無晚餐可以考慮來呢頭搵


今晚以當地評價高既担担麵作結

ユタの店
栃木県日光市中央町10-6

第一張圖咩事

撞鬼吧

18:30 日光Station Hotel

係下今市食完野就搭返車去東武日光
完成是日既日光鬼怒川之旅
跟住就去check in了


個天仲係好光猛

住宿就唔點介紹喇，相當普普通通
第二朝就要上路沒有那個必要住溫泉了



第一日就咁完結
去到日本就會變得早睡早起
第二朝就出發喇

前奏
- 完 -

本篇 - 尾瀨 上 (Day 2)

正式出發去尾瀨！
除左搭車行路真係無行程架喇
時間算鬆，8點半先起身
酒店有免費早餐，食飽飽就準時起行

是日乘車路線如下圖所示

班
次係好嚴謹的，因為巴士一日得三班
唔容許任何過失

09:14 東武特急Revaty


Revaty係2017年面世既特急
都仲算係新型特急既

以前有特例下今市去東武日光/鬼怒川溫泉特急免料金
但2022年就廢除左，所以依家就每人550


車廂設計具有未來感
不過坐一陣就落車了

點解20分鐘車程都要坐特急
因為鄉下D車疏，根本唔到你揀
如果要堅持唔坐特急就要早成個鐘以上出發

09:37 秘境快速 AIZU MOUNT EXPRESS


是日主角之一：
快速AIZUマウントエクスプレス (Rapid Aizu Mount Express)
在鬼怒川溫泉有2分鐘轉車，無壓力直頭係seamless，一秒都無擔心過趕唔到下班車既問題




一開車去到下個站鬼怒川公園之間就有正野睇
如果你有機會搭呢條線上去記得一定要留意左邊


相信唔少人已經知道或者估到，就係傳說中既廢墟
因為泡沫年代爆破留下來既大量廢棄溫泉酒店
拆左佢都要錢仲要億億聲所以就所囉媽媽遺留到今日喇
風景帶有一點葵涌大連排既味道

(當中還是有D建築物開緊門的)


我地尋日本身就想試圖探索廢墟
不過地圖都無睇走錯了方向
結果在車上看已經足夠了

架車去到野岩鉄道開始，車掌會過來查飛
我地揸東武PASS包到東武最後一個站，新藤原到會津高原尾瀨口30km要1090都唔係平，但山卡啦地方有車搭真係要感恩
接下來就進入秘境區間


首先就係龍王峽
開始穿過18條隧道、64條橋樑，到處都是男鹿川絕景
全線幾乎屬於日光國立公園範圍




https://www.youtube.com/watch?v=GgioHxnB8f4&
有興趣既話youtube有4K前面展望

LM舊年都搭咗SPACIA X

早知都買個SL大樹便當食下

一定要買打卡道具

之前去久能山東照宮好似又話係德川家康個墳周圍都見到佢