【挑戰自己】十月攝影馬拉松交流

第十五日：「背後光」
本來想喺啲燈飾鋪影（旺角上海街同新填地街附近都幾多呢啲鋪頭）
收工時間前後去咗兩次都撞唔啱好嘅場口
有一日就撞到幾個龍友
當中不乏用拉記嘅大師
一見到「拉記」出現
廢腦即刻將部爛鬼70D放返入袋
然後扮等小巴，𥄫下龍友影相，偷下師先⋯
（其實有幾間燈飾鋪係好正嘅
如果有個靚女（或靚佬？）model
可以試下問下老闆借少少地方影相
不過就要留心啲燈嘅色溫
同埋記得帶反光板用返啲背景燈做補光）

廢腦我放棄咗响燈飾街影相後
沿住塘尾道行咗過深水埗（其實係行錯路）
點知錯有錯著响欽州街尾
見到太陽差唔落晒
餘暉影照，人影拉長
感覺好有feel
就影咗呢張相

影嘅時候特登稍為under
然後响電腦再㩒低啲個亮度
推返少少saturation
簡簡單單就係我想要嘅效果出咗來

半總結
三十日馬拉松題目
叫做完咗一半
（雖然有幾日係「預製品」
但都係今個月內影嘅
無用陳年舊相）
同埋都趁重陽嘅周末
去返啲好耐無去過嘅舊區「景點」
剩低嘅另一半題目
目前只剩大約三分一未有諗法 / 着落
（本來以為出街影人像係我最無符嘅一題
不過，星期六亂打亂撞走咗去美孚
响荔枝角公園個極限「運動場」
睇啲後生仔女踩roller踩板
影到幾張相可以用做portrait
而家剩低最難嘅應該係食⋯）

《拾悅 映》臨時加插中途站特別任務：「捕彗星」

朝早响隔離台見到話
今晚有機會見到幾萬年一遇嘅
紫金山-阿特拉斯 彗星（據講阿特拉斯係指希臘神話嘅巨神 ATLAS）
當即用之前追星睇時玩過嘅iPhone app查下
為咗搵個方便嘅地點試下捉彗星
（廢腦以前有試過影星空，但捉彗星係第一次）
五點左右去到大角嘴海旁開始等
又影左一輪日落（今日嘅黃昏彩雲好正）

過咗六點半左右，個天先叫做黑齊
（太陽落晒但遠處海平線仲有黃昏餘暉）
於是開始用肉眼同相機viewfinder去搵粒彗星
搵咗十幾分鐘都捉唔到粒「星」
心諗應該係粒嘢光度唔夠
於是開始用相機「長曝」兩到十秒嘅方法去搵
到大約六點十個字（我部機嘅時間同iPhone 同步）
先喺相發現彗星出現了
因為viewfinder睇唔到彗星
只好靠估調校鏡頭角度
試咗七八張相終於捕到粒星係相嘅中央位置

之後試唔同嘅ISO+F stop+曝光時間
叫做影到幾張比較清楚嘅彗星相
但係都要事後推下光同色



到七點三左右
係粒彗星俾雲層遮住前最後一刻

等左幾分鐘都再見唔到粒星出現（相都影唔到星痕）
咁就執嘢去買叉雞飯返屋企食

後記：是日無用腳架影嘅
係帶咗個好多年前响淘寶發現嘅腳架平移slider頭
然後放响海皮嘅石欄杆柱上面
包保唔會出現腳架俾風吹郁嘅煩惱

第十六日：「坦蕩蕩」
人老咗，身體機能退化
老來多病就預咗
但係對廢腦我來講
最慘莫過於雙膝關節退化
最近唔單止踎低起身有難度
連想用單膝跪攞低角度影嘢都艱難咗好多

好似影呢張相時
（係早幾日影落，唔係昨日油蔴地起卸區大火後影嘅）
就因為膝頭痛兼用唔到力
幾乎跌坐地上

之前來油蔴地呢個位影相
係無留意到有呢個「塗鴉」嘅
但睇落唔似新嘅
唔知當日留低呢句話嘅仁兄
而家係咪仲堅持緊MK嘅生活態度呢

第十七日：「導線」
之前提到過
响長沙灣/荔枝角西九地方法院附近影相時
見到由法院到荔枝角四小龍之間段路
長官放晒伸縮式鐵馬
呢張就係當日靈光一閃影低
做「導線」題嘅相

「導線」就係指引人向預定嘅方向走
而鐵馬都係唔俾任何人越雷池半步⋯
有規有矩、或者循規蹈舉係好事
不過，太多框架只會令人麻痺
唔敢think outside the box
或者唔敢跳出comfort zone
咪正正係當今班高官嘅心態

（今朝係高官發表施政報告，約略睇過啲所謂振經濟措施之後，藉張相來借題發揮。）

第十八日：「有feel」
偷得浮生半日閒
响櫃底摷返枝舊Lomo嘅art lens Petzval 出來
睇下仲用唔用到
呢枝鏡最大嘅問題係
光圈係要換唔同插片
（當年係有啲唔同形狀嘅插片做bokeh特效，例如心形、星形⋯
光圈最大係F2.2 （另一款好似係 F1.9)
所以鏡身上面會有個開口
容易入塵
隔咗咁多年，竟然只係有塵，無發霉，萬幸
但啲插片嘅漆面就變咗，有啲脫落
所以暫時未拎到枝鏡去影嘢

話說前幾日行過柏麗大道
（唔係去果個乜鬼美酒節踩場，廢腦唔飲得酒嘅）
見一條入口階梯換咗啲本土漫畫人物插圖
心諗，仲玩啲咁老套嘅「塗鴉」？

行到另一個入口嘅梯級
就見到有個女士停咗响階級上面
咁我就順手影咗幾張相

因為梯級塗鴉啲色麻麻地
於是轉做黑白來睇
稍稍tune咗下contrast同shadow（因為成張相大部係唔同嘅綠色）
個插畫就變得比彩色更出
成個畫面就似個女士猶疑緊（佢都停响階級上幾耐）
係咪要穿越去階梯後面嘅異世界桃花源咁樣⋯
（廢腦係由近年流行過嘅「躺平」「我們是最後一代」⋯
呢啲諗法而引用咗「豹哥」呢句歌詞《世界與你無關》做標題）

第十九日：「影後」
忽然諗起深水埗個南昌公園
原來已好幾年無去睇花
（春夏之間嘅火鳳凰同黃花風鈴好靚㗎
係前幾年山竹吹壞晒之後都無去過）
諗起南昌公園
係因為想去公園連接去大角嘴海旁嘅天橋度影「自拍照」
因為印象中呢條橋其中一頭
裝咗隔音屏障
即係可以消除橋外嘅景色入鏡

因為記得果度都好多晨運客
所以朝早六點幾就出發
去到條橋大約七點半左右
搞一輪之後
用iPhone 遙控70D試下效果
點知除咗晨運客
一早都有幾多人行經呢條橋

而經過嘅人唔少又係講普通話
仲有衣著大致相同
當時就諗點解咁多好似「著住制服」嘅普通話人出現
返到屋企上網一查
先記返起立咗國安法後
同國安法相關嘅「機關部門」
就係落戶喺南昌公園附近嘅大角嘴區
廢腦就聯想朝早見到嘅普通話人
係咪就係「國安」人員？！

第二十日：「鏡中的我」
尋日提到原本想喺大角嘴一條天橋
影第二十日嘅「自拍照」

不過，由於用咗張同一個景嘅「三人行」剪影做第十九日嘅功課
所以決定放棄呢張相（拍法）
（原本諗法係向羅大佑張《未來的主人翁》/《之乎者也》封套造型致敬
（網上圖片）
點解要致敬羅大佑？
廢腦後生响大專讀嘅影視製作第一分功課
就係用當年我好鍾意嘅《未來的主人翁》首歌
用我自己影嘅幻燈片（而家啲人叫正片）
配合隻歌變成MV响堂上交功課⋯
所以一見到自拍題
第一時間就係扮羅大佑造型影自己⋯）

唔扮羅大佑，諗咗幾日都無替代方案
（其實係有嘅，一人分飾四角，油白塊面再扮KISS樂隊，不過，廢腦無化裝品亦都唔識化裝⋯）
星期五下晝去咗幾個公園搵位/景
睇下有無靈感，結果行到身水身汗都係得個桔
唯有用最懶嘅方法
趁住有太陽就即刻响馬路邊舉機影張selfie

Ok, 算搞掂咗



來到呢度
呢個【拾悅 映】馬拉松完成咗三分之二
因為下星期一開始又要「閉關」幾日
所以星期日晚會預先交埋第廿二到廿四日嘅功課

第廿一日：「鏡花水月」
前幾日行去大角嘴海皮捕彗星期間
見到個半月已經升咗
咁啱响座玻璃幕牆大廈頂咁上下位
而玻璃幕牆就反映咗另一座大廈出來
頭頂盞燈胆閃一閃
於是順手映咗張相做是日嘅功課
不過，夜晚返到屋企响電腦睇
弊傢伙，個月球outfo…
唯有第二日再去返原位等月光
不過白等一場，因為月升位置唔同咗
因為食白果，於是慢慢行出太子
就係講都唔信
無心插柳竟然响太子見到月光
雖然前景座大廈嘅幕牆
反映嘅雲就唔多而且好似碎片
所以就影低咗呢張相


又藉相借題發揮下
奉勸啲高官咪發咁多無聊開口夢
乜乜經濟、物物中心
諗太多都係水月鏡花
好似乜狗搶高才來香港
真高才嘅又點會無公司搶住請？
仲有班唔知乜水竟然話
政府要多多照顧班搵唔到工嘅專才咁on9？
俾我就設定專才來港半年到九個月
都搵唔到合適自稱專才嘅工作（洗碗唔係專才啦）
就取消留港資格，要執包袱離港
咁又可以名正言順搵過批「專才」

第廿二日：「化作幻影」
呢個題目對廢腦來講
係技術上比較難嘅
因為要盡開光圈爭取個虛化背景
同時又要將前景虛化
如果影靜物就還好
但如果會郁嘅就隨時outfo

呢張相係攞枝舊Lomo Art Lens Petzval
(ISO 160 85mm F2.2 1/500”)
响公園試影嘅
條松枝唔係人工綁喺條榕樹「鬚」度
只係松枝勾住响條「鬚」度
因為少少風就令到個focus走晒
响另一個公園就見到一片細細嘅「芒草」

因為啲草吹得幾亂
所以把心一橫變做黑白相
效果幾好
仲有一張係保留顏色嘅
因為有慢跑客入鏡
幫張相加咗啲人氣


繼續借題發揮先
今日有兩個高官講嘅笑話
一個係超高官話
「唔好得把口，自己就只做實事」（大意如此）
好想問當初話「一日解決一個問題」嘅說話
有無實現到一半？
第二個笑話係
管交通嘅高官
提議地鐵同巴士要加埋阿拉伯話通告？
咦，我睇果啲中東炫富YouTube片
啲酋長出入都超豪超級房跑車喎
政府唔係想吸引呢啲大戶來港
而且想吸引班來香港逼巴士地鐵嘅人？！

第廿三日：「黑黑白白」
本來以為要等黃金時刻
或者日頭好猛
先出到對比高嘅畫面
好似呢張咁
就算陽光強，附近嘅圍牆同坡面嘅反光
都削弱咗個暗位嘅暗度
即使將contrast推到盡都無法做到淨黑淨白

反而又係無心插柳

响松樹下面避過雲微雨
抬頭一望見松枝上嘅小水滴
於是舉機一影
稍為over exposed少少
就得到上面張得黑同白嘅功課
都係阿Sam哥果句歌
「命裡無時莫強求」
趁機會向班自以為好掂嘅高官議員
送上一句逆耳忠言
雖然話命裡有時終須有
不過，隨口噏話想點想點
係唔會改變到命裡無時莫強求嘅現實嘅
要扭轉命運，要做嘅唔係求神拜佛或者做「啃老」族
而係腳踏實地咁做好自己應該做嘅事

第廿四日：「食好西」
影食物對唔講究食嘅老鬼來講
真係諗唔到計
點影都唔會似《黑白大㕑》或者職業Foodie影得咁好
所以廢腦我就由人出發啦

對廢腦來講
大排檔係食嘢嘅最好回憶地
細個時候，老豆贏馬嘅話（買廿次都有一次中嘅）
通常會一家大細去深水埗碼頭附近嘅大排檔食飯
（碼頭填咗海幾十年，近年個公園變咗露宿者天堂⋯
以前深水埗碼頭同時都係漁人碼頭
一早一晚都有唔同嘅漁家賣海鮮）
雖然都係普通嘅通菜腐乳牛肉
紅燒蝦碌、豉椒鮮魷果啲家常菜
但大排檔嘅火候真係另有一番風味
而家諗起都回味無窮

上面張相係下晝時分
响深水埗愛記影嘅
夜晚再去見唔到以前開响街邊嘅枱
原來搬晒入去啲街鋪裡面
同埋，雖然幾好生意
但就完全聞唔到以前大排檔嘅果種撲鼻嘅爆炒鑊氣⋯
（夜晚影嘅相失敗咗，所以要用下晝試影果張相頂檔）

提到通州街公園
每日下晝五點唔到
就有好多阿公阿婆沿公園條街排隊等免費飯
以前係北河飯店嘅明哥派俾啲「無家者」嘅
但廢腦見到每晚條龍（未計班「無家者」）
都最少一二百個老人
係咪明哥仲做緊？
話說超高官話「而家經濟正面」
咁點解仲有咁多老人家
要日日走出街响馬路邊排成粒鐘
等個救濟飯？

第廿五日：「靈光現」

之前因為住嘅樓層比較高
窗口又向住東北
所以好鍾意朝早未天光
就set定腳架等日出
因為日出時分嘅雲同日光變化都比較多
而且好易影到所謂嘅「耶穌光」

最近一來半夜先䀫著眼
起身都已經八點幾
完全miss晒日出嘅時機
唯有改捕黃昏嘅「聖光」
上星期一連幾日試
一係陽光唔強同無乜雲
一係就光到爆晒錶
好彩都影到張似樣嘅

（隻飛機堅係由赤鱲角起飛嘅，唔係某「得獎大作咁」後期key上去㗎）


又借題講下無聊嘢
話說睇新聞講話赤洲發現恐龍化石
高官就形容係好大件事咁
又話乜鬼可以連擊到大灣區咁犀利
廢腦坐响床度就諗
都未搵到成條恐龍嘅骸骨
就話要關閉成個赤洲島
（廢老之前未去過）
如果塊恐龍化石同大灣區有關
咁政府係咪應該停晒啲填海計劃
尤其係近珠江口大灣區範圍嘅明日大嶼項目？
以免填海有機會埋沒咗可能响海床嘅恐龍化石

第廿六日：「入屋請熄燈」

閉關前有日由九龍塘經窩打老道
出返旺角去「火車」站
順便响而家叫做MOKO嘅新世紀廣場兜咗個圈
抬頭一見幾盞吊燈幾有趣
咁就影咗呢張同「熄燈」嘅主題剛好相反嘅相

（影嘅時候為免俾人誤會我偷影樓上裙底
特登將相機放腰平位置
鏡頭垂直向上
咁就順理成章反咗個LCD mon仔出來
等身邊個鋪頭職員都睇到我影緊乜嘢）




果日行MOKO有個奇怪嘅發現
係同張相無關嘅
下晝成四點咁滯都仲係好旺（好似星期四？）
但响同一層打對家嘅兩間周乜乜金鋪
同一時間，一間（好似係周孖生，可能撈亂咗）就人頭擁擁（湧湧）
另一間（好似係周小福，可能同周孖生掉轉咗）就無客
得幾個職員傻傻地望住對面鋪啲客
呢個現象廢腦真係諗唔通
因為行前啲間賣鑽飾（好似係）間鋪都有幾個客喎⋯

第廿七日：「鏡中的你」

原本計劃係想响老尖街頭
搵個靚女做model
結果廢腦當然食咗好多白果啦

好在之前去美孚極限公園影到些少相
都可以當係「造像」照片
因為係運動照片
所以廢腦就用最粗糙嘅合成手法
將兩組相各自合成一張
第一組相對簡單
原相

結果只用咗當中三張砌成呢張
（第三同四張嘅滑板仔疊住咗，所以放棄咗第四張）

呢組相對廢腦最難嘅
係張最尾張相要扭到同前兩張同一角度
（橫直度鏡頭個透視感係少少唔同嘅）

另一組就相對䌓複啲
原相

前後整咗幾次
都因為背景太多嘢
加埋前景仲有個踩緊滑板車嘅小朋友要執走
（因為電腦太舊跟唔上PS對CPU嘅要求，所以用唔到PS嘅移除物件嘅特異功能，廢腦只可以用比「小畫家」先進小小嘅「大畫家」，人手執相⋯真係執到眼都矇）
成品（執完第四版終於覺得無乜大穿崩）

不過因為呢張相係明刀明槍執走前景個細路
如果係參加正式比賽，咁做係foul play，唔准嘅
所以廢腦只係用上面張滑板仔飛躍果張當功課交
（另外，順便講埋
唔係特登用呢組女仔跌倒相
來貶低女仔嘅運動能力
相反呢個女仔其實練得幾落力㗎
我有另一組係佢成功嘅，無其他人入鏡
但係啲相outfo…
）


又到借題發揮
去極限運動場果日係星期六（應該係，除非唔係）
下晝睇咗成粒幾鐘
場入面同一時間有細路仔學緊踩板
有上面位女仔同朋友練緊rollerskate
有幾個少年玩滑板車
仲有𡃁仔練單車（幾似BMX)
我一路影一路諗
個場無管理員（應該係無）
亦唔見附近有救傷站之類的
（話晒極限運動喎）
咁樣俾唔同項目嘅人同時間用同一個場地
康文署係咪提供場地後就懶理風險？

政府可以用三百幾億搞啟德體育園
實際只係用來辦「盛事」
但對培養本地運動員嘅支援就出手其低
用起體育園嘅零頭果十幾億
已經可以响唔同區起幾個分類嘅極限場
俾有心玩嘅小朋友可以有更好嘅練習場所？

第廿八日：「行街唔係遊蕩」

唔經唔覺（其實係有驚有覺）呢個三十日挑戰自己嘅玩法
終於到咗倒數第三日
Slazinik定嘅題目係街拍（其實之前廿幾日，基本上都算係街拍）
今日嘅功課，係兩張相夾埋先有故事嘅


兩張相並排一齊睇
就可以看圖作文話兩個人
互相錯過咗對方，無緣無分咁囉⋯
（相係前排去搵free model期間
同一日捕咗大約十零分鐘影到嘅

幾分鐘前喺網睇viuTV個專題節目講「無處不打卡」
話說之前睇新聞引述某官定「已完」話
各區嘅打卡點應該同當區嘅「文化」要有呼應⋯
老老實實，官府出錢搞嘅所謂打卡位
老土到極點
根本就無文化特色可言
不如開放多啲各區政府物業外牆
俾啲本土或外地畫家
定期負責真係有藝術價值嘅塗鴉或畫作
（即係好似民間個HKWalls Project咁
不過唔係一年搞一次
亦唔係搞完咗就任由業主處理咗啲塗鴉咁）
（唔係ArtBasel果啲先叫藝術㗎）

（不過好似呢啲咁小朋友畫風嘅就畫咗都吸引唔到人睇）

同場加影：油蔴地呢幅私人樓嘅外牆

（記唔記得之前呢度有幅「老翻」Banksy?)

第廿九日：「簡而清」

（當日譯原題Minimal做「簡而清」
的確係諗起後生初出茅𠫂時
偶然會响報紙拜讀簡老嘅文章）

香港市區見唔到鶴，當然更唔會有真嘅塘邊鶴啦
野鴿就隨處可見
果日响深水埗行街
見斜對面馬路口座乜鬼學院
最高嘅通風窗外
企咗一隻野鴿
高高在上咁望住世人
於是就快快手影低呢張相
（其實隻野鴿可能俾政府嘅禁餵令搞到無啖好食
餓過頭飛唔郁啫）

廢腦是日一於做塘邊鶴
唔用肺講說話
一於冷眼旁觀大政府
仲有乜嘢「中心」可以噏得出來
（廢腦收聲前講多句先
香港政府應該向聯合國申請
將「簡樸房」呢種富有中國香港特色嘅居住環境
申請成為「非遺」（非物質文化遺產）
咁香港就可以明正言順成為「世界『簡樸房』中心」）

第三十日：「圓方」

終於完成咗呢個三十日嘅自我挑戰項目
最後一張習作係用形狀做題目

其實呢幅相唔係一道高牆
其實係康文署一座嘢嘅長樓梯嘅扶手牆
啲鋼圈其實係樓梯外用來掛宣傳大海報嘅掛鈎
廢腦見到排掛鈎咁有趣
就行去趴响樓梯扶手牆影咗呢張相
有時影相或者畫圖會撞到牆
影極畫極都唔滿意
換個角度（或者叫做跳出「舒適圈」comfort zone）
有時會睇（影）到不一樣嘅景物

簡單總結一下
呢個月來廢腦自己嘅收穫
唔計中途要「閉關」嘅日子
基本上出得街嘅日子
都會拎相機出去四圍蕩三、四粒鐘（一來當運動）
睇下周圍嘅人同地點
有乜嘢有趣而可以變成一個故仔嘅畫面
然後用個故仔去構思個構圖
加埋試用唔同嘅setting影嘢
老實講，無出街影相成七八年
本來以為鋪癮已經消磨晒
但呢個月嘅「挑戰」完自己後
發現用定格畫像講故事都係有可為嘅
（廢腦退休前大部分時間拍片剪片多過影硬照）
所以之後都會繼續出街（未必日日出）影嘢



最後
想講呢個唔係最後一個po
我會試下正式總結呢個長三十日
有不同題材同要求唔同攝影技術要求嘅玩法
廢腦得出乜嘢「心得」
可能要用幾日整理一下

經過一個月長嘅「自我挑戰」影相「活動」後
廢腦我有啲得著
想請大家俾下意見

1。跟住果三十個題目去影嘢
真係要自己堅持到
廢腦頭一個禮拜
覺得應該無問題（因為唔係限住要跟個list 一日一日咁影）
但係第十日開始嘅幾日（尤其係有啲題目比較難去影出來）
可能會有影相怠惰嘅感覺
然而撐得到，影完兩個禮拜後
廢腦會不停諗今日去邊度影相
同埋張相要影啲乜嘢咁⋯
到最後一個禮拜
就慢慢出現「咁快就完成⋯」嘅輕微失落感

2。其實今次除咗每日一個獨特題目
廢腦自己响第一晚幅突發第一題之後
由第二題開始
加多咗兩個「挑戰自己」嘅條件
第一個條件係全部用正方形嘅尺寸
因為影相嘅時候就要考慮個構圖
點樣先可以將自己想要嘅嘢放到入個正方形裡面
第二個條件係每張相嘅標題
要用一句本地廣東歌歌詞
而句歌詞可以同相嘅故事有呼應嘅
兩個條件，廢腦覺得變相令影相選材變得有趣啲

3。因為廢腦係以街拍作為自己嘅拍攝手段
所以有機會出街，都會帶住相機响身邊
即使唔係近幾日內嘅題目
但見到啱用嘅靜態畫面
我會先影低一個版本
（夜晚可以响電腦上研究
係咪啱用同點樣可以影出好啲效果）
到啱用果日嘅題目時再去現場重影一次
就算重影失敗，至少重有張第一版本頂住
基於呢個考慮
廢腦避免去鄉郊影風景
（一來要兼顧身體狀況，二來坐車去影一張相太嘥時間）

第二 part 仲未寫完，待續


題外話：大家有無睇過呢個鬼仔Hayden Peterson嘅YouTube channel?
https://www.youtube.com/@HaydenPedersen/videos
前日俾YouTube推咗佢一條攝影對戰嘅片我睇
係佢同一個攝影師朋友嘅限時比賽
https://youtu.be/9khAQTpTWwM?si=n1adLjI3LS3LiW75
睇得好過癮
另外一條係佢同兩個攝影朋友
又係限時响市內唔同地點拍人像相
https://youtu.be/0VBAV0ln95w?si=KuzhVQBCq0oDrN9_
睇完之後
搞到廢腦都想玩吓 creative photography

廢腦的總結，part 2


4。出街四圍𥄫搵素材期間
記得要小心
廢腦星期五由太子沿砵蘭街行去廟街
再經廣東道折返
期間掛住周圍望，無留意自己企响路中心
幾乎俾車撞（係幾乎，即係大吉利是人無事）
（題外話，行到近廟街附近
即係以前夜晚變成大笪地果一帶（唔係搞夜繽紛果段內街）
原來而家下晝開始會有啲街檔（太耐無响午後去廟街）
見啲檔賣嘅幾乎清一色係性玩具⋯
廢腦當場被震憾了）


5。要應付一個咁長時間嘅活動
最最最重要嘅
一定係預先做好拍攝計劃
因為，如果逐日跟題目去影，隨時係會食白果
用返呢次【拾悅 映】嘅三十條題目講
廢腦係先將三十條題
按難度用唔同marker mark 响月曆表度
（靜態同固定物體，例如建築物、風景，屬於最易處理
涉及人物或需要創意處理嘅題目屬於高難度⋯）
廢腦計劃係每次出動
可以做到三到五日內嘅兩到三個題目
一個考慮係突發嘅條件限制
例如天氣惡劣、現場太多人
好似今日經過舊油蔴地差館
竟然企滿晒大陸遊客⋯
另一個原因就係
有啲容易嘅題目可能涉及去鄉郊離島出海嘅拍攝
咁可能影足一日都係做到一條題目
如果係高難度嘅題目
隨時要用多過一日嘅時間去影
預先訂好拍攝時間表係好重要嘅


應該仲未寫完，part 3 待續

廢腦的總結 Part 3 繼續


6。部分題目會涉及輔助工具
基本如腳架、特殊濾鏡（長曝可能會用ND濾鏡幫手）
影人像、自拍照就要帶補光燈、閃光、反光板
以至創意攝影需要唔同嘅道具咁
廢腦以前後生時會揹埋兩級梯去影嘢
而家張兩級梯尤如揹住兩舊啞鈴咁
（而家諗緊買張矮膠摺凳代替）


7。呢次【拾悅 映】，廢腦盡量只係用「單機」影
（減負重為主，一部機連鏡，有時會帶多枝做後備
如果要帶腳架就枝kit鏡，18-135mm）
好處係唔使成日掛住轉機換鏡
錯失捕捉畫面嘅最佳時機
（街拍如此，但係拍人像或stage/setup/studio shot
就當然係想點都得啦）


8。修圖⋯
三十日裡面，絕大部分廢腦係無做「精修」（喺一個婚攝po新學識嘅詞語）
除咗「鏡中的你」影人像果張
做咗三相合拼為一嘅手法
（另一張用六幅相合成果張
好似廢腦當時講咗
為咗減少幅相入面嘅物件
我人手移除咗女主角前面嘅一個板仔）
而無用電腦修圖移走相入面唔要嘅人或物件
有多餘嘅物件
一係影嘅時候盡力避走
或者用裁相嘅方法唔俾佢响相片入面出現
呢個係維持照片真實性嘅合理手法
唔會俾多事之徒有藉口批評影相佬造假

當然，相片加工（有變無或者無變有）
响而家AI咁先進嘅技術下，真係易如反掌
不過，廢腦覺得靠電腦加工
有少少失咗用照片記錄事實嘅原意


就算意𨠫未盡，都係就此擱筆
再次多謝咁多位正皮同腐皮死老鬼呢次自我挑戰嘅師兄們

Ciao.