【挑戰自己】十月攝影馬拉松交流

顧名思義
攝影馬拉松交流
唔係玩一兩日就算嘅活動
係成個十月，每日有一個影相嘅主題
一連三十日，日日唔同題目
同埋係純粹交流，唔係攝影比賽

呢個玩法其實源自鬼佬嘅畫師界
話說十幾年前有人發起一個
將十月分叫做 INKTOBER 嘅畫界交流活動
每一日定一個關鍵字當題目，下面就係今年嘅三十個關鍵字

參加嘅畫師不論國界（全部自願參與，但就希望參加者俾足心機，畫晒全程，唔好半途而廢）
每日按指定關鍵字
用筆墨創作一幅畫作（油畫、水彩到漫畫都可以）
（之前硬性規定真係要用真筆墨畫，但近兩年好似多咗人電腦出稿）
一連三十日咁畫
（INKTOBER 亦都有半馬形式，即係隔日畫一幅；另外有個攤開一年期嘅玩法⋯）
目的係俾畫師交流同認識朋友（亦可以幫畫師開拓接job機會）

攝台呢度咁多大師同高手，亦有唔少想學攝影嘅朋友
如果廢腦我發起一個攝台嘅攝影馬拉松交流
暫定叫 PHOTOBER （PHOTO + ocTOBER)
中文叫《拾悅 映》

唔知各位有無興趣參加？

廢腦打算參考 COURTNEY SLAZINIK 嘅
30 Day Photo Challenge
https://clickitupanotch.com/30-day-photo-challenge/
所定嘅三十日嘅題目
作為今年第一次 PHOTOBER 嘅 prompts 題目關鍵字

（嘗試用廣東話譯英文出來嘅，有部分可能要修改）
（題目具體要求，請查看上面條link嘅Courtney原文
我都會試下譯做廣東話，但要一兩日時間）

雖然話係每日一個主題一幅相
（當中有啲題目係要一組三幅相嘅）
但唔一定要當日影當日交（例如遇著下雨天，我都唔會出街影相嘅）
（交相即係放上攝台，廢腦打算每日開個post PHOTOBER DAY X __ 咁
方便大家放相，又或者放IG tag #photoberdayX #(題目）
—不過廢腦無玩 IG… )
即係你可以交之前影落又啱題目嘅作品都得
例如呢幅例子
係廢腦响電腦入面搵出來 2016 年行過荔枝角公園時用iPhone 影嘅

當然，大家影啲新作品更好啦
我斷估其中一條題會令部分師兄卻步
就係 Day 20 嘅「鏡中的我」，即係自拍照
响連登po自拍照，即係會自爆，估有啲師兄唔想被人起底
其實呢，自拍照唔一定要影到自己清清楚楚嘅
例如，幾年前我都影咗幾張自拍照嘅練習

（係，名副其實嘅「帽子戲法」加埋慢少少嘅快門同 hand held 嘅手震
聽住快門聲郁一郁就影咗張咁嘅相
斷估咁「藝術性」嘅相，點整都睇唔到廢腦我副衰樣啩）



參加資格：無限制

器材限制：無，不過有啲題材可能係用手機會難啲完成嘅（例如長曝咁）

作品規則：基本上唔想要「擺」拍。當然，題目係自拍同人像就可以接受「擺」嘅。其次，交嘅相建議先加工，一來可以加上exif 資料，二來可以加上連登ID水印，減低俾人偷圖嘅機會。

作品規格：最低要求 150 dpi, 最高 600 dpi。尺寸限制最長一邊 1080< long side < 1920
（純粹為免filesize太大，令loading太長時間）

評分：講到明係交流，所以不設評分。我鼓勵大家用回帖方式去講你對果張相嘅讚賞或者提出可以改善嘅地方，等新手們由大家嘅有益評價中獲益。當然，交流就唔想見到有人身攻擊嘅事情出現。

獎品：講到明係交流，加埋廢腦退休人士無收入，所以無辦法提供獎品。




最後重申一下，呢個係攝影交流，唔係器材或技術比拼。
好似上面講嘅，我會由十月一日零時起，每日開一個帖
標題用咁嘅形式：
【拾悅 映 PHOTOBER ‘24】Day 1 框實你 Frame in Frame
……
【拾悅 映 PHOTOBER ‘24】Day 21 鏡花水月 Reflections
……
【拾悅 映 PHOTOBER ‘24】Day 30 圓方 Patterns



有興趣交流嘅各位師兄
可以用回帖方式po自己按當天題目拍攝嘅作品
有讚賞或指點嘅不妨留言講兩句
廢腦自己信奉有批評先有進步呢個真理
所以歡迎各位師兄實話實說


最最後，廢腦我無因為提出呢個活動而獲得任何金錢或物質利益
同埋無論有無師兄參與
我都會响十月自己試下做好呢件事
（啱啱諗起可以開個 PHOTOBER Discord Channel/server 可能比放連登容易啲，我聽日會去研究下，搞得到就放個 Discord Invitation code 上來俾有興趣嘅師兄用）

聽住先，到時肯定好多火花

以下係《拾悅 映 PHOTOBER 》嘅三十日馬拉松題目
所附圖例均為廢腦舊功課
僅作參考
部分照片並不能完全達到Courtney列出嘅題目要求

10月1
框實你

Discord Server Invitation
https://discord.gg/tQKJQRwP
邀請碼七日有效
若失效請留言
我會gen新碼

廢腦要向各位準備參與這次三十日攝影交流的朋友致歉

對不起
因為健康原因
廢腦決定取消這次計劃

事緣
今朝早出街
想尋找符合三十日題目的拍攝題材

行咗半個鐘，影咗兩三張相之後
開始覺得氣喘兼頭暈
因為我有前科
無幾耐之前曾經响街上突然black out
所以決定唔再影相
返番屋企抖陣再去搵醫生（醫生星期日休息，所以明早先睇到症）

考慮到廢腦我已經係老弱殘軀
如果唔好彩要入廠
睇怕成個禮拜無得出街
咁嘅情況下
都無辦法日日update
無可奈何下，唯有取消呢個【拾悅 映】嘅計劃

再一次向各位講聲對唔住

（部70D同廢腦一樣，七，八年無開機就神下神下咁，睇怕醫完自己就要搵部二手R?，俾70D退役）

身體要緊，休息好再復出

謝謝

因為瞓唔著
望住窗外枝街燈
百無聊賴之下
拎起床頭部70D
推盡ISO上12800
一來可以用高速快門減少手震機會
最主要係想要好粗嘅微粒感（數碼相嘅訊噪效果）
咁就出咗張咁嘅相
因為我枱頭只得好微弱嘅夜燈
所以個題目要求嘅「框」（即係我個窗花）
上邊框溶咗入黑夜之中


因為醫生明日會決定
使唔使去排期做血管造影
咁廢腦明日可能趁去見醫生時
睇下用電話影唔影到「長曝」先

今日要玩「長曝」於是朝早 down 咗個 PROCAM app 來試
搞咗個幾鐘都舞唔掂
無法將 ISO / Aperture / Shutter speed 全部獨立控制
心諗咁樣好難搞長曝
唯有拎埋部70D去見醫生
心血來潮順手拎埋隻少少發霉嘅 ND filter
就係靠隻ND，幾乎擰到盡（估計400～500之間）
下晝三四點都影到長曝
（無帶腳架，主要放部機响欄杆或電箱上面影，即係加咗啲手震效果）


另，張相標題係《明明綠燈》
出處係鄭融首《紅綠燈》其中一句歌詞
「明明綠燈　轉眼變成紅燈⋯
來又去　要找的際遇未接近」
（本來想用達明《馬路天使》但Google神主動推咗紅綠燈俾我，而我係頭先先第一次聽鄭融嘅歌）

第四日題目係「講故仔」
因為仲未諗到有乜題材可以影到「故仔」
今日（十月三號）打算日頭留响屋企
按醫生指示，做啲身體狀況記錄
（因為廢腦呢幾日血壓同港股咁突然「爆」升）
俟晚先去周圍行下搵下靈感
因為星期日「響警報」之前影咗兩三張相
今日第三日「靜活」用嘅就係其中一張相

油蔴地呢條後巷出奇地乾淨
快門啱啱完
張凳旁邊度鐵門就打開咗
有個好似茶記厨師嘅阿叔行咗出來⋯
以為佢會坐落張凳，然後扯返口烟
點知又無喎⋯
唔通張空凳唔坐得嘅？
於是就有咗呢幅相嘅標題《一張丟空了無人坐的凳》
係，呢句都係歌詞來嘅
出自夏韶聲嘅《空凳》
「今天發覺最愛他
　呼叫永遠也愛他
　聽我叫喊只得一張空凳⋯」
呢首歌紅緊嘅果一年
我老豆肺癌走咗，當年聽到首歌都會頂唔住⋯

啲圖好小畫家feel
相不予置評廢事鬧戰

開心就好

我唔係反駁隊
所以歡迎任何批評指導
一定不會反駁，更加唔會變巴士廢老阿叔

謝謝

自膠先，因為係套返day2嘅Polaroid template
唔記得刪走 ND filter果行字
因為影呢張相果朝係無帶filter出街
用咗ND嘅話，快們都無乜機用到1/100秒⋯

第四日嘅【講故仔】無預先計劃
又無人物做主題嘅話
真係比較難交功課
比如話原先想搵個街頭補鞋伯伯做主題
但係伯伯好似好耐無開檔（或者只係開好短時間）
結果食咗白果
唯有摷下舊相睇下有乜可用

下晝走咗轉深水埗
影咗幾張前身係「為民公寓」而家修葺改建成嘅「輝豪居」






除咗頭兩張相係下晝新影嘅
其餘都係2016年幾次路過深水址時執嘅

16年初，丟空多年嘅「為民公寓」
基本上俾人遺忘咗咁
到年中見到地下嘅圍板同鐵閘拆走咗
當時仲以為終於拆「為民」起新樓
（好似「為民」對面街咁清拆然後起咗個「南昌一號」）
隔咗一排又經過深水埗，見到「為民」仍然安在
但就各層都圍晒板
上網查先知新業主打算「修葺改建」

廢腦將呢個故仔圖輯
用咗「石頭他朝成翡翠」做題（都係歌詞）
就係想講睇落唔起眼嘅廢屋
都可以搖身變成「金碧輝煌」嘅「現代感」建築
（同睇到周街空鋪就會諗起
「每當變幻時，便知時光去」嘅感覺完全天南地北）
如果「為民」新業主拖到今年先做
仲會唔會搞座嘢？

第五日 【三等分】
《紅日向山邊降》

呢張相係喺大角嘴凱帆軒近油蔴地避風塘嘅海邊公園影嘅
呢個位置係廢腦幾鍾意嘅一個影日落嘅spot
因為個鹹蛋黃落山個位任何季節都係幾正嘅

好多年前通常得我自己一條友趴响石柱度影
（我會帶包大紙巾或者頭巾，用來响石柱上面抬高少少鏡頭，就唔洗帶腳架）
旁邊一般有三幾個大叔好悠閒咁釣魚
前幾日去，遇到最少七八個龍友
同埋數以十計嘅情侶或一家幾口用手機打卡
更令廢腦驚訝嘅係普通話不絕於耳⋯
（凱帆軒都幾多大陸人住，唔止咁，由凱帆行去奧海城地鐵站，都係煲冬瓜多過廣東話）

講返張相先
有稍為响電腦校咗少少brightness
(因為開大一級光圈果張又少少over)
f22呢張就稍為暗咗半級，所以係咁意推光少少）
故意將鹹蛋黃同島同船同海面
放晒响張相嘅下三分之一嘅地方
而個天就佔三分之二
係廢腦自己嘅留白習慣

第六日「入光」

好耐無响下晝行去西洋菜街啲人多地方
前幾日因私順便响旺角街頭影第三日「長曝」張相後
行咗轉彌敦道，女人街同麥花臣
（完全唔知道麥花臣改建到咁新型⋯）
估計係因為十一黃金周好多大陸人來香港嘅關係
女人街估計八成以上係普通話人
因為趕路嘅本地人應該唔會行女人街去人逼人

又講返張相
今次係偶然所得
本來想影出來係
太陽直射下，路人嘅全黑剪影
來襯托主題要求嘅sunburst
點知剛剛入鏡嘅巴士
Block咗遠景地面嘅太陽反光
我後面嘅建築物反射嘅日光
又啱啱好幫我前面嘅路人補咗光
雖然因為用咗ND同埋1/50“快門有廢腦手震
但出來嘅效果又幾過癮
加上多咗巴士暗位襯托
個sunburst出來好強啊
於是張相都幾貼題《某一刻你的光照亮了我》

來緊幾日唔出得街
所以提前將幾日來影定嘅「功課」預先交上來先

第七日 「大光圈」
講多次先呢度「大」係指F16/22 嘅大冧巴

呢張相都係帶咗ND出去影「長曝」果日影嘅
相入面雖然睇唔到題目講嘅「紅色跑車」
不過，trust me bro
呢兩秒曝光期間
應該有好幾架香港最地道嘅「紅色跑車」飛過同留低殘影

呢張相係目前唯一谷盡iPhoto個brightness 同color saturation嘅
（因為屋企部mac機太舊，前年開始用唔到adobe，去年完約後就停咗sub adobe，無lightroom用）
因為ND+F22+2”結果都係under exposed
（我估計其實應該曝5“先會差唔多）
不過，咁樣谷一谷個saturation
結果張相嘅顏色變得好鬼過癮好鬼rich
左上角個藍天
同左下角個電箱蓋嘅訊噪可能係敗筆（但係廢腦鍾意個粗糙感）
仲有個藍天仲可以見到塊ND邊緣嘅「發毛」印⋯
（今次呢個顏色效果，以後可能用來玩多啲唔同嘢）

另外，當日身上仲帶住塊 750 IR filter
試過影咗幾張相
齋黑同紅兩色效果又係幾有趣

第八日　「連線」

Courtney Slazinik嘅原題 Connection
係話用相片去令到看官同相中人有共鳴
廢腦諗咗幾日無乜頭緒
前日出旺角行咗花墟
然後由洗衣街兜行人天橋再落返彌敦道
好彩唔係星期日
橋上面無姐姐
只係周圍都大陸游客
仲要唔知點解佢地咁鍾意响呢條橋上對住條街打卡
似乎本地人好多都見怪不怪（除咗廢腦我）
於是出現咗呢張相
「假如有日你我真係响路上撞到⋯
　你有你嘅生活，我有我嘅忙碌⋯」

第九日　「虛空」
留白（negative space）係廢腦好鍾意玩嘅構圖之一

本來想保留座樓嘅外牆顏色（綠色為主，窗外細窗台係橙色）
試咗幾個版本
最後都係用monochrome version
感覺上可以由行人天橋頂嘅灰色
同對面大廈嘅光影
過渡到行人天橋梯級圍牆嘅黑色
（原來都係灰色，但因為無馬路地面嘅反光，所以圍牆變成under exposed嘅黑色）
吞噬一切光線嘅黑洞一樣

第十一日　「常滿」
因為有個影人像嘅諗法
特登走去大南街嘅「新」文青據點掃下街
睇下有無機撞到合適嘅model人選
（之前又話大南街啲鋪位好搶手
但呢日行嘅兩三個block
都一樣有空鋪待頂⋯）
以前會喺大南街啲鋪頭買背景布
深水埗棚仔布藝市場搬場後
大南街嘅布料鋪似乎都無受影響
（廢腦每兩個星期會經過呢度一次）
有時會見到啲設計學生同啲鋪頭老闆講價買料做功課
（以前棚仔都一樣係學生勝地）
廢腦問咗一個老闆同意後
响佢鋪頭外面堆貨度
影咗呢幅相



手頭上，第十二日開始嘅題目都未有著落
睇下重陽當日有無機
晨早出去影張「末世」風景相先

第十二日 「天與地」
喺香港影風景相
老實講一般景點來來去去都係見慣見熟
所謂「網紅」打卡位又係上網睇一大堆
所以廢腦今次想玩長曝，影市區街頭飛走啲人同車
試下做唔做到末世廢城feel

本來驚禮拜五重陽假期
旺角道行人橋會俾「賓賓」佔據晒
於是提前一晚
星期四下晝四點半左右上咗橋
企咗差唔多一粒鐘
校盡22光圈同ISO100搭ND fader500
試唔同曝光時間睇下效果
最後一張用咗十分鐘曝光
（之後相機同電話齊齊無電
因為我用部iPhone 遙控B「失打」)

仔細睇，相入面除咗右邊停咗成十分鐘嘅白色私家車
（壞我計劃， 嘿）
基本上無晒明顯嘅車或人
（其實响白色私家車後邊嘅巴士站
竟然係有幾個等緊巴士嘅人留下倩影⋯）
左邊去尖咀方向馬路
就有一堆等緊綠燈嘅車嘅車尾紅燈留痕

因為唔滿意個效果
星期五朝早六點幾鐘又去返彌敦道條行人橋等天光
估唔到七點開始
橋上就出現一批「賓賓」開始霸位鋪地蓆
由於日出後天色會越來越光
所以估計影兩張之後
塊ND可以做到嘅曝光時間會短過十分鐘頭
結果我影咗兩張十二分鐘嘅相
第一張ok，但第二張已經稍為over少少⋯

呢張就係第一張
基本上唔似前一晚果張咁會有較明顯燈影同車殘影
十二分鐘影出來無乜車同人嘅殘影
加上我特登轉做monochrome
同校低咗少少亮度
感覺幾接近我想要嘅「廢城」feel
（雖然而家PS嘅AI執相功能超強大
Click 兩嘢就可以整走晒相入面嘅多餘物件
不過，PS就無辦法俾到攝影師
培養出睇現場光去判斷嘅能力
亦無咗俾攝影師汲取現場觀察同決定構圖嘅經驗值）

第十三日：「一模樣」

老老實實交代先
其實好多年前經過長沙灣西九地方法院附近時
用手機影過同上面張相差唔多嘅相
不過就唔係影到是日題目要求嘅左右對稱構圖
所以特登趁去荔枝角四小龍驗眼配新老花鏡時
去返法院果邊
用相機影返呢張牆角相

講到法院
今次經過先知道
長官們响法院周圍擺滿「鐵馬」
之前經過都無見到啲「鐵馬」拉到去近荔枝角昇悅居果邊咁遠
（成兩條街咁多，而且仲要封咗呢段路，兩條行車線嘅其中一條）
都唔明點解長官們要咁緊張
話晒而家响國安法「罩」住嘅香港地
都唔會再有人敢出來造次啦⋯
（廢腦都影咗張「鐵馬」圖作為過幾日嘅題材用）

第十四日：「暗影」
重陽前夕，响彌敦道行人橋影咗成粒鐘後
沿彌敦道慢行去太子附近
睇下有無位啱下星期張「自拍」題
同埋睇下有無啱老鬼嘅「偽文青餐廳」可以做後面嘅「食好西」題
然後行去大角嘴睇下仲有無咖喱腩食
由橫街行出塘尾道期間
影到呢張相


講開食，呢轉「經濟低迷」嘅打擊
大小食肆似乎係重災區
咪話十一黃金周多咗大陸人來香港「玩」
廢腦親眼所見（我屋企附近啲茶記、酒家、老麥同大乜乜大物物）
唔少大陸人（講普通話嘅）都係响餐廳門口
揭下啲menu就算
真正受大陸客惠嘅食肆竟然係兩餸飯！
（屋企附近間兩餸飯每晚六七點就人頭湧湧，大部分都係附近嘅「酒店客」）
另外，有次排响我前面買叉雞飯嘅肥仔「同胞」
用普通話問阿收銀姐姐「飯可不可以加多些？」
阿姐答佢話「加個飯俾多十元啦」
肥仔「同胞」就斬釘截鐵咁叫停加飯⋯
然後企响鋪頭外等外賣時就自言自語嫌十元加個白飯太貴⋯