【K歌之王】回到過去﹐我搶了表哥的新娘

多謝支持

「Elton﹐見到你真係好﹐我好想搵人抒發下﹐你知唔知呀，我個卸膊上司呀﹐明明係佢做錯咗嘢﹐落錯咗指示，但岩岩開會果陣佢仲屈我﹐攪到我俾大老闆話﹐真係勁唔開心。」Maria一入到琴室﹐就向我發牢騷抱怨今日開會的事情。

「你上司又會咁衰都有。」我嘗試開解她。

「係喎，勁衰囉﹐好在其他同事都知係佢做錯﹐開完會都走嚟安慰我﹐不過我而家仲有啲嬲。」Maria深深不忿地說。

「咁一陣我同你出去食飯﹐啤啤佢發洩下。」我提議。

「好呀﹐去附近好出名果間大排檔小炒啦﹐我想去咗好耐。」Maria道。

「好呀，果度仲可以用戰鬥碗飲啤酒。」我和應。

「咁你快啲執嘢閂門出發啦。」Maria急不及待地道。

「唔駛咁急﹐而家先五點﹐間大排檔五點半先開﹐不如喺度坐一陣先。我啱啱練緊首歌，想你聽下比啲意見。」我說。

「哦…….仲有半個鐘﹐都可以呀。」Maria答應後﹐便隨我走到一間放了三角琴的琴房﹐優雅地在門口的小梳化凳上﹐跟大學時一樣坐定定望住我。

我走到三角琴前﹐坐上琴凳﹐深吸一口氣﹐集中精神﹐然後開始彈奏「我願意」﹐經過下午的練習﹐我彈得非常流暢﹐而且唱得比平時還要好﹐完完全全投放了我所有的情感﹐演繹出我對Maria的愛意﹐那琴音彈出來的樂韻完美得連我自己都被感動﹐將我對Maria那麼多年的千語萬言都寄放在這三角琴的琴鍵上﹐自覺我賣力演唱的聲線連鋼琴都為之動容﹐深感這世界上再沒有人及得上我對Maria深深的愛意﹐我真的好希望未來能與Maria攜手沈浸在愛河中﹐當我彈到最後一個音符﹐感動的淚水從眼框中流出﹐然而，當我準備拿出鮮花，望向Maria，準備向她表白﹐期望看到她像之前西貢那次感動落淚時，她竟然⋯⋯⋯⋯

打了一個呵欠，那一刻，我的心情頓時由陽光燦爛的藍色天空，瞬間跌落到不見天日，黑得伸手不見五指的谷底﹐完全說不出話來，也不知我下一步要怎樣做。

「唔好意思﹐我今日開咗成日會，有啲攰﹐不過你彈得真係好好﹐又唱得好好聽﹐不愧係我哋學校嘅『鋼琴王子』。」Maria平靜地道出讚美我的字句﹐但我有點不能接受﹐於是追問：「妳有冇覺得感動？」

「唔……都算有既﹐似平時聽演唱會果種感動。」Maria想了想道。

「咁即係？」我不死心，一再追問。

Maria望了望鋼琴後面，似乎望到了靜靜地躺在琴後，現在毫無意義的玫瑰花﹐停頓幾秒後﹐帶點尷尬，微笑地對我說：「即係咁﹐我同你咁多年嚟一直都係好朋友﹐我覺得你真係好叻﹐彈琴又好聽﹐我真係好開心，亦希望可以keep住呢種關係﹐你唔好再浪費時間係我身上﹐我真係只當你係朋友。」意識到自己已經失敗了﹐於是替自己找下台階﹐打完場地說：「傻嘅﹐你講咩呀﹐我哋不嬲都係好朋友嚟㗎﹐永遠都唔會變﹐我下星期有演出﹐只係想你比下意見之嘛，你諗左去邊。」

「啊……早講呀嘛﹐你彈得好好﹐把聲又夠實淨﹐投入咗好多感情，平時同你唱K都唔覺你唱得咁好﹐下星期一定Good Show。」Maria收回那尷尬的語氣﹐開懷地對我說。

「好啦﹐等我去埋廁所就出去食飯﹐你喺門口等我一陣。」我強忍着自己的情緒﹐勉強地笑着回應她。

目送她走出琴房﹐我內心突然有種難以形容的痛﹐是由心臟一直傳送到全身﹐整個身體都被這種痛牽引得顫抖﹐眼淚也情不自禁地流下﹐我很想放聲痛哭﹐但怕被Maria聽到﹐只好強忍淚水﹐跪在洗手間的地上宣洩心中的痛苦。

現在的我很絕望﹐原來一直以來我在Maria心目中只是一位『鋼琴王子』﹐回到過去做那麼多事都沒有用﹐歷史不會因此而改變。

我開大水喉，將水潑到臉上，希望盡快令自己冷靜下來﹐隔了數分鐘，終於收拾好心情﹐收起內心的失望和痛苦，與Maria出去吃飯﹐也一如往昔般碰見表哥﹐重新介紹雙方認識。

但不同的是﹐今次我的心情十分沮喪﹐全程只能像個局外人一樣看着他們互動。如觀眾般旁觀的我﹐到現在才驚覺，原來Maria跟表哥從第一次見面就已經那麼投契，笑聲不絕。

（待續）

之前心急，短時間自推得太多﹐若果影響到講故台嘅巴打絲打﹐想講聲唔好意思﹐希望見諒

令外雖然主角今日俾人派好人卡好傷心，但都祝大家中秋節快樂

聽日休息﹐星期四先再出文，多謝支持

而你那呵欠絕得不能絕

絕到溶掉我～～～～～

通常呢啲都係 leng 嘢收場，不過總算知道咗女方點諗，以後就唔會再有幻想，in a way 都係一種解脫

講得好啱
雖然嗰刻好難受，但總好過自己繼續FF，一直單方面去估其實仲辛苦，不如瀟灑啲重新出發

自推一下

終於又到凌晨十二時，又一次失望地回到現代﹐我嘆了一口氣﹐灰心地跟天使說：「我最後都失敗咗﹐不過都好感謝您比機會我﹐能夠努力爭取過已經無憾啦，我聽朝帶您返去教堂。」

「弟兄﹐我明白你嘅感受﹐希望你能夠悉懷﹐有時命運就係咁，時也命也。」天使安慰我。

「多謝你安慰我﹐我攰啦，要返房休息下。」我低着頭﹐垂頭喪氣地走回房。

「等等﹐弟兄﹐我幫咗你﹐你可唔可以幫我做返一件事。」天使截住我道。

「嗱﹐我都估到冇咁著數㗎啦﹐如果要我出賣靈魂﹐我唔得㗎﹐你之前都冇講過。」我擰擰頭想拒絕天使。

「唔駛緊張﹐其實只係一件好簡單既事﹐就係你返去3年前﹐幫我還返你書架上呢本琴譜比一個人就得啦。」天使指住我書架上的一本琴書對我說。

「呢本咪係陳輝陽第一次出嗰本琴譜﹐你唔講我都唔記得係借返嚟﹐我記得好似係幾年前問師弟James借嘅。」我托住頭想著回應。

「冇錯﹐將佢還返比你師弟James就得喇。」天使點頭說。

「講開又講，我都好耐冇搵過師弟喇﹐你真係只係要求我還返本琴譜比佢咁簡單？」我帶點疑惑地問。

「冇錯呀，弟兄﹐我唔會講大話。」天使承諾道。

「咁好啦。」我拿著琴譜﹐坐在梳化上，閉上雙眼祈禱﹐一陣暖風吹過﹐然後一開眼﹐就發現我正坐在演藝學院出面的小公園，手上拿着剛剛帶住的琴譜。

不過感覺左手好像有點痛﹐看看手機﹐現在是2021年4月9日下午5時﹐我有點印象﹐那天我打了疫苗﹐還要到演藝彩排﹐辛苦到不得了﹐之後一日還發燒﹐我心想估不到回到過去，竟然還要受著這痛苦﹐早知叫天使選另外一日。

我很快就找到了James，並將琴譜還給他，因為我這天與他彩排後天的演出。不過當我還琴譜給James時，他顯得有點錯愕。

再次看到他，我真的有點慚愧﹐「那件事」到現在我都覺得很遺憾﹐James是我的師弟﹐我從來都未遇過像他這樣有天份的人﹐不論音感﹐節奏感﹐還是表現方式﹐他都是我遇到過最出色的一個﹐我相信只要給他多點時日，他一定會有所成就﹐我好想告訴他「那件事」﹐但想起天使最初的話「回到過去，不可改變別人的命運」﹐於是我唯有選擇放棄。

完成任務後，我發現還有6小時才能回到現代﹐心想天使是不是在作弄我﹐要我忍着手痛等到凌晨12時﹐於是我便打算回家休息﹐正想搭扶手電梯落大堂時﹐突然聽到後面有一把熟悉的聲音叫我：

（待續）

[鳩估] 嚟喇，係時候遇見 Anna 喇 [/鳩估]

聽日開估

「Elton﹐你又會咁啱喺度嘅。」我轉身一看﹐發現叫住我的是一位熟人。

「Anna﹐點解會喺度撞到你？」雖然戴住口罩﹐但只要仔細看，她那標誌性的馬尾，我還是輕鬆地認出面前的人是Anna。

她看上去似乎有了身孕﹐雖然身穿較寬鬆的長裙﹐但仍難以掩蓋住她的孕肚。印象中這是我第一次看到她穿裙子。

「我而家係演藝度做講師﹐你呢？」Anna語帶輕鬆地回答我。

「我遲啲有演出﹐所以嚟彩排。」我回答。

「啊﹐原來係咁。係啦﹐我有件事想多謝你。」Anna突然跟我道謝﹐令我有點疑惑﹐想起今早她在教堂對我說了相同的說話，然後我疑惑地問道：「多謝我？」

「上星期﹐你係咪喺對面嗰間琴房練琴？」Anna指住對面三樓的房間問。

「你又知嘅。」我很快就回應﹐因為每次在演藝彩排前﹐我都會託朋友幫我預約那間琴房練琴。

「可能講出嚟你會覺得好奇怪，其實嗰日我喺你嘅琴室出面，咁啱你又冇鎖門，道門打開左少少……」Anna對我說。

「真係？我都唔知出面原來有人，但係你點解要多謝我？」我問。

「其實嗰時﹐我一時諗唔開……本來……本來……想由3樓跳落去。」Anna很少這樣吞吞吐吐，低著頭﹐細聲說。

「吓，你講真㗎？做咩事呀？點解會咁諗唔開？」聽到Anna竟然想不開要跳樓﹐我感到非常震驚﹐於是即刻追問。

「我……我同咗一個男人拍拖，後尾先知道做咗第三者﹐仲比佢攪大咗……爸爸媽媽知道咗之後好嬲﹐差啲唔想認我呢個女，唔比我返屋企。」Anna吞吞吐吐地回答。

「對唔住﹐我唔知你發生過咁多事。」我回想起今天﹐Anna只是跟女兒一起，一直都不見她的老公出現﹐原來她沒有結婚﹐是單親媽媽。

「嗰日我心情本身已經好差﹐嗰個人嘅老婆突然走嚟演藝﹐喺大庭廣眾鬧我，仲對我指指點點﹐我為咗避開佢走咗上去三樓﹐當時我覺得自己好冇用﹐好絕望﹐喺三樓望住地下大堂﹐好想了結自己，於是爬上欄邊個花嘈坐低咗﹐準備跳落去﹐一了百了﹐唔駛再獻世。」Anna失落地說。

「千祈唔好咁傻﹐你咁樣做，你家姐同屋企人都會好傷心。」我試圖開解她。

「就係我想跳落去果一剎那﹐聽到有人彈傅佩嘉嗰首《絕》。」Anna對我說。

「我Warn Up既時候多數會彈呢首歌。」我回應。

「嗰一刻我成個人被琴聲吸引住﹐好想聽完先跳落去。」Anna停頓了一下﹐然後繼續說：「當首《絕》彈完嘅時候﹐我企咗起身﹐本來想踏前一步﹐準備跳嘅時候﹐突然間我最鍾意嘅巴哈C大調前奏曲又再喺琴房傳到我耳邊﹐於是我轉頭一望，發現原來一直喺琴房彈琴嘅人係你﹐嗰一刻我諗起好多嘢﹐覺得好感動﹐大喊起上嚟﹐之後我同事經過見到我咁樣就即刻扶返我落嚟﹐陪我去休息室。不過無論點都好﹐真係好多謝你﹐打消咗我跳落去嘅念頭﹐而且你嘅琴聲咁多年嚟都係一樣﹐令我好感動﹐係我心靈嘅避難所……。」

（待續）

星期六日都停更，星期二會係結局
希望大繼續支持
感激不盡

BOOM！果然係 Anna。

不過佢做咗人小三呢下就真係估唔到

Cat變佢個女呢點中咗？斷估唔會淨係講中妖精出現掛

其實呢個位我都諗咗好耐
寫佢做咗小三﹐係希望睇故嘅人感受到Anna對自己的遭遇既個種痛苦同無奈﹐同埋佢打算自殺果刻既絕望無助
不過我寫唔出點解佢聽到首歌後會打消自殺念頭﹐若果係影片有埋音樂，大家就可以容易啲感受到

多謝巴打支持
Cat會唔會變咗主角個女﹐我覺得要睇主角夠唔夠努力
星期二結局都會交代一下

我嗰陣打錯字；本身係 tip 有妖精，然後Elton 用盡三次機會回到過去但都同唔到 Maria 一齊，但誤打誤撞之下反而同咗 Anna 一齊，而 Cat 就唔知點解變咗佢個親生女。

其實都估到巴打係打錯字﹐不過嗰時冇出聲問

會唔會透露下隻歌係邊首