開始之前，我整理咗一啲比較冷門嘅手術資訊同經驗，如果有姊妹想去做手術都可以參考吓：
1. 最好唔好自己去做手術，一定要搵人照顧
我知道有唔少姊妹都會選擇自己去手術，亦都有啲醫院有提供好好嘅配套，包括出院之後嘅基本生活照料。但其實真係唔會夠，尤其係出院之後冇咗護士嘅照顧，其中一個難題就係出院之後仲掛著尿袋，傷口又可能會好痛，基本上你唔會想半夜爬起身倒尿袋。仲有各式各樣嘅困難同風險，例如手術後三個星期落床都仲係會頭暈，有個人喺身邊睇住一定安全啲。
2. 考慮清楚用邊種手術模式
下身手術主要有三種做法：皮瓣、結腸、腹膜。皮瓣做出嚟嘅陰道係冇潤滑功能嘅，但康復速度較快，手術併發症亦都比較罕見。如果有潤滑需要嘅朋友，就要考慮做結腸或者腹膜，相比之下，結腸嘅技術都係比較成熟，失敗率比較低。另外，除咗手術方式之外，大家都要考慮埋陰道深度，一般情況下，個深度會係16-18cm（視乎你本身陰莖有幾長），但如果冇需要咁深嘅朋友，亦都可以考慮做淺深度（大概8-10cm）甚至零深度手術。淺深度嘅好處係唔需要接駁皮瓣，傷口會細啲，觸及腸道而出現併發症嘅機會都會低啲。大家唔需要擔心嘅係，無論任何深度，陰蒂都係會保留嘅，而陰蒂其實係性刺激嘅主要來源，所以唔洗太過擔心自己嘅性福。
3. 重建出嚟嘅陰部唔一定完美對稱
嚟一點糾結咗我一段時間，因為我比較執著對唔對稱嘅問題，我經常用鏡去照，比較左右陰唇，發現有少少唔對稱（其實真係好少）。可能唔少姊妹都希望自己嘅陰部會係完美嘅，不過大家都要記住即使係順性別女性嘅陰部都唔會完美，我上網睇咗好多相，比較之後發現其實自己已經靚過好多順性別女性嘅陰部。
4. 手術唔一定能夠治癒性別不安/焦慮
決定得做手術嘅姊妹一定或多或少有受到性別不安/焦慮嘅困擾，曾經我以為做完手術就一了百了，但其實並唔係咁。手術之後，我發現都仲係啲不安同焦慮，所以心理嘅關口依然要靠自己努力跨過去，大家加油！
5. 有任何問題一定要同醫生問清楚
手術之後大家需要一段時間去重新認識自己嘅身體，有好多嘢其實真係唔識。記住要趁喺泰國就捉住自己嘅醫生問得清清楚楚，返到香港再搵醫生去睇就好貴啦。
6. 手術之前記得量度一下自己陰莖嘅直徑
哩個建議我喺網上冇見人講過，但我個人覺得都幾重要。哩個直徑係用嚟決定你手術之後做dilation做到幾粗，因為如果你滿意自己手術前嘅size嘅話，基本上你可以淨係用返嗰個size嘅dilator，唔需要勉強自己通到最大。當然如果你期望自己sex partner比你手術前更粗更大嘅話，就要用返比自己粗嘅dilator啦。
講住咁多先，大家有問題可以繼續問～
