1989年，一首由潘偉源填詞、陳百強主唱嘅電視劇主題曲《一生何求》，裏頭有一段歌詞就涉及以上相類信息：
誰計較讚美與詛咒
沒料到我所失的，竟已是我的所有
呢幾句歌詞，一唱就唱咗幾十年。除咗對語文有一定認識嘅人之外，一般人都係因為呢首歌咁流行，而接受咗陳百強唱「詛」字嗰陣唱咗做「咀」呢個讀音。唔好意思，咁嘅讀法係錯嘅！即係話：
一咀就咀咗幾十年，一唱就唱錯幾十年
「詛」咒讀做「佐」咒先至啱！
齋聽，唔睇歌詞或者字幕係睇唔出有咩問題，因為「詛咒」、「咀咒」係同義詞，不過寫「詛咒」就唔做得讀「咀咒」啫！提提大家，只有「沮喪」，係冇「沮咒」嘅！
喂，呢隻鑊應該邊個孭先？唔使問阿桂，一定係填詞人喇，因為詞係佢寫嘅，咬字呢個位當然係由佢把關。今次出錯係源於填詞人本身，誤以為「詛」嘅讀音係「咀」嘅原故；所以只要將歌詞嘅「詛咒」改返做「咀咒」，咁就乜嘢問題都冇嘞！
