歡迎想砌模型嘅巴絲入嚟 (205) rg2.0高達貼合真實設定，簡直完美

真係睇撚到眼濕濕
唔知點樣解釋嗰種感動
https://youtu.be/N-gOccgfF-Y?si=8ml8MFoE4PSBhSYZ
喱幾年俾東歐廠撳著嚟打嘅日本終於還拖了

https://finemolds.co.jp/FZ/FZ02.html
https://finemolds.co.jp/FZ/FZ01.html







剩係喱到已經好痴線

擋風玻璃分件真係世界奇觀

我真係唔知點解釋好
總之佢真係改寫咗1/48戰鬥機嘅設計定義
Eduard話下年出1/48 52型, 無印52型就慳返啦, 直接出啲甲乙丙啦

個分件算係易咗？
起碼唔使噴好晒個駕駛艙先再痴埋個機身做無縫再遮蓋上色

你有砌過架啦, 你應該都明左右對夾到底有幾濕鳩
但基本上係好難跳出喱個設計
需要好多因素成就喱件事
首先架飛機要本身有返咁上下錐形先啤得靚, 少啲分模要求(上下對吸)
第二要對自己射膠有返咁上下自信, 即使你對模開得再靚再精密都好, 啤塑差少少就係差少少
差嗰少少就可以由膠水都唔落, 變成要抆畢地
喺喱兩項之上配合埋其他detail考慮咁
係咪可以唔使噴好晒成個駕駛艙先痴就未必
或者咁講, 噴好晒先痴嘅優勢我覺得依然好明顯, 即係組裝上你唔洗再拆嚟拆去, 拆多兩嘢又易有意外喱啲
不過finemolds, 甚至日本模型廠唔係第一次做喱種分件設計
個重點係喺近年東歐廠嘅強勢之下
日本可以話冇任何回應咁濟
早兩年Eduard出咗隻超高水準嘅零戰前、中期之後
連韓國愛德美都有樣學樣出一隻
連大陸仔都嚟緊染指大比例日本機, 佢個1/35系列零戰應該走唔甩
我會話今次喱隻1/48零戰真係吐氣揚眉

買咗未試睇落好勁咁

其實左右夾係鳩但我接受到
但要修好個機駕駛艙去噴好晒
之後先翻手去無縫機身修件就好on9
仲要一個唔好彩駕駛艙遮蓋唔好噴漏就收皮
Btw今次擋風玻璃真係慳極多工夫
以往一係遮蓋遮餐死一係手髹極肉酸

未玩過飛機，見到介紹都想試下

打斜少少擺就佔大概一張A4紙咁上下面積
如果Finemolds保持到當初1/72 隼嘅啤膠水準唔撻Q嘅話
我諗喱副係最理想嘅第一副螺旋槳戰鬥機
但最後見真章都係要等到12月

睇完巴打段嘢都覺得精神一震
巴打可以寫介紹文

你想知零戰本身嘅事定係戰鬥機模型最近嘅風起雲湧
定還事真係嚟緊喱隻零戰嘅事
前兩樣如果你真係有興趣知下(先唔好砌唔砌先), 想知下我都可以講下
因為喱排我喺朋友圈子到都講得多
係可能要諗下點樣講得易理解啲
但如果你係想知嚟緊嗰隻零戰嘅事我唔係Insider, 肉眼可見以外嘅嘢知道得唔多

我對戰機無咩認識
但見講佢工藝嗰段最正，分件、塑膠成形之類

喔...ok我陣間解釋下其實砌螺旋槳戰鬥機喱一回事到底係點
啲零件嘅分佈, 點解啲零件會係咁樣, 點解會有個趨同習慣, 主流分件方法有咩利弊之類
gather下啲書先

佢次次都出幾千字介紹文你完全睇唔到？

唔係成日追post

1：48 比例大唔使做到眼都盲
希望到時買到啦

喺開始之前我想指一指啲戰鬥機嘅部位出嚟俾大家留個印象先




好, 咁嚟喇, 係咁咦講一講正常組裝一隻飛機大概會有咩流程先
以Tamiya 1/48 零戰52型/52型甲為例


首先, 如Phoenix巴話齋, 搞咗個駕駛艙先

略略睇得架喇細節唔係太重要著

跟著就係引擎


然後機身, 留意下半部份講到機身要左右合埋痴實
最後放入去嘅係之前組裝好嘅駕駛艙


再之後係機翼, 一樣都係上下夾埋嘅, 中間放咗個起落架內籠入去


集齊上面嘅部份之後就可以拼埋一齊, 連埋機尾零件一齊插好


咁樣呢, 喱個情況就叫做「士字狀態」, 我喺喱到停一停先
已經有好多好多值得留意嘅地方出現咗架喇, 我而家續樣續樣講有咩伏位先

首先講咗最重要最重要嗰樣, 就係機身左右夾喱一個設計
你係可以想像到個接合位就係打直貫穿成架飛機底面兩面咁濟
所有機身部份都俾佢打直分開
即係話我哋砌飛機嘅人首先要諗嘅就係消除咗喱條接合瑕疵
所以可以話喱條線嘅存在就注定咗喱條線左右嘅表面都要遭殃
我哋有三個選擇
1. 溢膠法
好處係唔洗落畢地, 直接磨走咇起嘅膠, 而且密合度高, 結構穩固
壞處係膠水所到之處所有細節都會遭殃
2. 用滲透式膠水之後直接打磨
好處係保留到大部份細節
壞處係對邊線整齊度有要求, 即係如果廠家嘅模具開得唔靚, 或者啤得唔靚
條邊唔sharp少少圓起咗, 刻線對唔齊, 同埋本身清水口嘅時間切深咗
都會得到唔理想嘅效果
3. 落畢地, 不論種類
最下策, 好處係喱招永遠係你嘅可選之舉
然而真係乏善可陳, 不但畢地所到之處所有細節都會喺打磨過程中遭殃
包括刻線, 鉚釘(不論凹凸), 整體輪廓都會受到影響, 繼而有機會影響之後表面細節嘅組裝

所以就如同高達一樣, 可以嘅話分件最好喺裝甲與裝甲之間分起
戰鬥機都唔係一體成形嘅, 最少二戰時唔可能啦
所以最理想嘅分件方法就係沿著表面金屬板材(蒙皮), 同組裝零件嘅邊界分起
喱個就係finemolds第一步神來之筆


佢就係沿著機身前半同後半兩段嘅連接位分開機身
唔係左右分, 係前後分, 咁樣你就可以直接滲膠水落去個夾口到
份量得怡嘅話, 可能連磨都慳返, 但一般情況下綠蓋膠水乾透用1000號輕鬆秒殺
其實砌任何模型都好, 最唔應該做得多嘅步驟就係打磨
首先打磨影響身心健康, 我諗我話所有模型步驟入面最多人反感嘅係打磨應該錯極有譜
第二就係打磨係直接削除緊模型本身嘅表面細節, 所以係絕對應該控制到最小程度

然而即使當年世界上大部份嘅戰鬥機都係咁樣前後分割組裝都好
目前喱個世界上大部份嘅戰鬥機模型都係機身左右分件嘅
無他, 一對模上下夾埋薄薄地啤一啤, 搞掂下一件
而finemolds佢而家咁做隻模就未必咁簡單喇
實際而言係點我就唔知, 但根據我對管形, 筒形零件嘅模具印象就比啤扁平零件複雜得多
極端起上嚟可以睇睇喱個例子(建議熜聲睇):
https://youtube.com/shorts/IJPQjimYVB4?si=ki_WiNLxpME6YBZU
當模具愈複雜, 啤塑嘅操作細要求就愈高, 喱個係因為塑膠流入空腔嘅時候已經有阻力同溫度改變
雖然我就一日廠佬都未做過, 但作為一個degree係工業系統嘅畢業生, 喺final exam嘅時候例牌要正面硬食plastic injection machine嘅input parameters calculation(一條佔全卷總分數20-25%)
我深深體會到前線操作手同熟練技工嘅重要性, 喱個係生產線嘅核心

喱個都係我覺得日本模型廠相對於來勢洶洶嘅東歐模型廠依然佔有優勢嘅原因
因為相比起日本模型廠以組合度行先再講其他嘅設計思路
東歐模型廠係完全唔同以細節為前題設計, 以細節為前題開模
後者相對於前者有個重大嘅問題, 記唔記得上面講過關於落畢地同溢膠法嘅問題
即係話如果你出到啲模型碎濕濕又冇人哋日本廠咁好心機啤好啲膠
其實你精心設計嘅嗰啲細節係會遭殃, 保唔著嘅
舉個例子, Miniart 1/48 P-47D, 烏克蘭廠牌




屌你睇3D rendering幾撚咁巴屎閉
一睇實物review



並唔係因為佢打緊仗乜乜柒柒原因
知唔知點解佢哋會搞成咁, 我哋睇下佢本說明書


愈多零件就即係愈多黏接位, 直接增加咗間隙、高低差、水口失誤嘅出現
愈多零件就即係模具空腔愈多, 直接增加咗加工成本、檢驗難度、成形優良率
既然咁ON9點解東歐人都仲要咁樣做?
答案就係兼用
冇錯, 喱個就係通往宇宙神廠Bandai嘅關鍵字
因為其實軍事武器其實好多小變動, 即係你想像下unicorn gundam咁
我好哋哋引擎整流罩拆成4塊做乜? 唔係因為我唔要開多面模
而係因為我下個月出個新嘅子型號, 佢左邊面板多凸起咗嘅, 我剩係轉裝另一塊就得喇
同樣嘅道理運行全架機每一個角落, 所以每一個角落都可以拆出嚟再啤
我哋睇下佢個product timeline

砌開軍事模型嘅巴打就會明我講咩, 因為日本廠牌真係出得慢好多
唔會好似佢哋東歐廠咁一年幾個子型號狂射

所以軍事模型個世界就係咁大
我剩係要講1個設計已經要咁撚大篇, 不過有咗喱個例子之後
後面嘅設計解釋就簡單直接得多, 食個宵夜再繼續

福巴我想 預訂你篇文入頭posr
btw 我真係好憎打磨
情願用筆刀冒住隻手批到出血嘅風險都唔撚磨

福巴我想 預訂你篇文入頭posr
btw 我真係好憎打磨
情願用筆刀冒住隻手批到出血嘅風險都唔撚磨

冇問題, 小事啦
同埋要買應該就唔難, 1999同amazon都應該買到
本地鋪頭就唔洗諗啦

跟著講下同上面有少少關係嘅一個設計細節
尾翼部份

粉紅色箭咀指著嘅就係垂直尾翼同機身匯合位置
我哋再睇返之前, 機身左右夾嘅設計例子
首先係我認為目前市面上1/48零戰最高之作, Eduard

然後係Hasegawa

跟著就係Tamiya, 即係上面隻例子

最後係韓國, 愛德美


點解要specific咁講喱個位呢, 就係因為其實喺左右夾嘅過程入面有個好令我討厭, 特別討厭嘅打磨位置
就係喱個垂直尾翼同機身匯合位置
你想像下你用溢膠法, 打磨到喱個位係好容易磨走咗喱片蒙皮嘅高低差
一般情況係補返條刻線俾佢
但問題嚟喇, 喱個位刻線其實好棘手, 第一佢唔係圓型, 係弧線嚟
第二佢好窄喱個位, 第三就係佢locate喺一個曲面上面
種種問題都令到我好難搵到個好穩陣嘅方法修整喱個問題
所以佢而家就特別好似機身咁對待, 將成隻垂直尾翼分出嚟, 就咁套落去
只要啤得夠好(而過往經驗話我聽佢係做到)就都係1000號夠做
絕對係腦細胞嘅守護天使

藍色圈圈著嘅喱對水平尾翼做咗一個水平對接嘅榫其實係一個非常友善嘅設計
點解? 我哋望真啲現有嘅模型設計出現咗咩問題


留唔留意到喱個高低差, 喱個位嘅打磨瑕疵會直接影響到水平尾翼有幾水平, 左右有幾平行
因為你痴完膠水, 對啱位之後並唔係就搞撚掂咗
除非你係用好似gsi紫蓋喱啲強力又快乾嘅高流動滲透膠水
如果唔係就好易喺組裝過程入面撞斜咗隻水平尾翼嘅一邊
咁就會有左右唔對稱唔平衝, 仲有機會斜上斜落
其實Hasegawa喱個位就醒啲, 特登整凹落去, 咁樣都可以避到一開始就唔水平
但當然冇好似finemolds咁樣左右扣著你中有我咁穩固

壓軸講喱個非常之eye-catching嘅擋風玻璃分件

其實佢就唔係第一次整喱種分件方法, 我就喺佢之前喺雜誌入面送嘅1/72 隼體驗過一次喱種組合
喱個位我直接貼成品俾大家感受下, 如果唔刻意去留意嘅話整體觀感如何





我相信如果你真係聞落去睇嘅話都會見到啲破綻嘅
但相對地, 你慳返嘅係遮蓋同費神處理透明件嘅功夫
加上我喱隻係1/72, 個框係分咗件, 而嚟緊1/48係似乎前中後三part每部份都係一體過, 透明件相應地對齊每個框
詳細嘅實物review可以睇喱到
https://nippper.com/2021/09/37845/
雖然佢close-up勁近影出嚟嘅相個框係有啲誇張地粗
不過我諗喺喱個基礎之下望返我隻成品, 大家就會明白點解我對finemolds非常之有信心
因為佢真係有啲料到

咁好睇嘅介紹，幫推

推

$200一隻2.0喺香港完全冇可能買到
而家隻嘢出面仲賣緊$280
幾時入手好 又驚之後個模有水波紋
https://youtu.be/t0oJ9XnylXs?si=KUDkOGoumVz-VHLT

專千人色嗰間百貨公司賣緊258咋

有冇砌咗嘅巴打講吓而家值唔值得買